Apocalipse 4

Daruurii kagiro korffinjje

1 «Hikkakko abbaabayerena ani dee; daruurii kabanamere ufa gire; ani horaarjje maale tagire tat’urunbbaa yaaye aani tallaatta yaaye haa antte; ‹Koyi hittarraa elddee bee; horenbbaan liin kadootisaro ayees ani kuun tusinara;› 2 Banneewa ani Ayyaana K’ulluukkii ammagame; hikkima ani daruurii korffinjje dee; korffinjjeeyi kahamas’eera ibaaddoti koo gire. 3 Korffinjjeeyi gutii hamas’s’ee kagirekotti middi kaɂiyasep’idinna kaserdino awɂallokki eɂemo aani kallaaroye; korffinjjeeyi maraamure kameregidi awɂallokki eɂemo aankkikki jereen kaɂidaamo gire.✝4:3 Hiz. 1:26-28; 10:1. 4 Usumaleenna korffinjjeeyi maraamure lamaattankko afar korffinjjeel gire; korffinjjeeli gutii gumaarakki sarssi kasarssaterana metekkisoo gutii kawork’k’ii kallachcha kakkaatera lamaattankko afarro jaarssa hamas’s’ee gire. 5 Korffinjjekko hank’k’ana yaayena didideennane wota biyaa gitte; korffinjjee horee kabeebaara dab todoba gire; isona todoba ayyaanajjol kawaayyaan.✝4:5 Biy. 19:16; Rag. 8:5; 11:19; 16:18; Hiz. 1:13; Rag. 1:4; Zak. 4:2. 6 «Korffinjje horee tamuc’c’intte mastootii aani wola wola antte tahank’k’aatta labu gitte;

Korffinjje t’eɂeeyinna maraamure horenenna haarre ilɂo omooggan taɂabtta neefo taɂabtta met’t’a afarro gitte; 7 tahoree neefo taɂabtta met’t’a luubaan aani laatte, tallami aar aani laatte, taseedi neefo taɂabtta met’t’ana bebbeed taɂibaaddo aani laatte, taɂafari neefo taɂabtta met’t’ana kabuubaro laboobaa aani laatte. 8 Neefo taɂabtta met’t’a afarro metemeteeyi baalallo le abanaayite; usuu maraamurenna orroɂoottisooyi ilɂo ammagamereen; arriinna hemeen;

«K’ulluukki, K’ulluukki, K’ulluukki

Dubba kadaanddaara Goottaa Hedo,

Kagire; kagirana kaɂemeeyinara» Amano lakkoɂiisareen.✝4:8 Hiz. 1:18; 10:12; Isa. 6:2-3.

9 Hitti neefo taɂabtta met’t’a korffinjje gutii kahamas’eeroonna jiruu jiroommakko taa jiruu jiroomma geeroon kagirnnaroon jiinaan, kabajjana galata kakkosisaraan goorata dubba, 10 lamaattankko afarro jaarssa jiruu jiroommaan kagirnnaroon, korffinjjeeyi gutii kahamas’eeroo hore hore bebbeedii ul oyeeren sagadaraan; kallachchakkisoonna korffinjjeeyi horee kayeengureen, haa ameen;

11 «Goottakkaanina Waa Hedookkaani!

Ati kameen dubba mankkomet’t’iitetto maraan,

Kameen dubba kakkomet’t’aamerana

kakkogirnnara (Giri kahelatera) feɂittaayi mankkollee maraan,

jiininna, kabajjana hunnana kuun dootisara amaa gireen.»