1 Horkkooskko kayere Waa raa kamoogganinna goorata kamoogganii gara kahegeroolnne odojoolkkaanuun ayeesere; 2 gidda goɂameen kagachchoo geesii kameen dubba goggoɂeelloon kayelero erekkeessakokki garane noon ayeesera; alami dubba kakkomet't'eera usuuya. 3 Usu kabaja tawaa hank'k'ayise katusaroya; yadaliitteessana Waanne wota taɂekkaattotta, haafurakokki hunnaayi alami dubba isikkise abera, ibaaddo c'ubbokko k'ullooyise abbaabatere daruurii kaɂatii Waakotti merggee hamas's'ee.

4 Usuun kabeera mege kaɂerggichcha megekko karooraro mankkollee maraan, ere kawaa erggichchakko aaloo karooraroya.

5 Waa duuddo erggichchaal orroo,

«Ati erekkeetta, ani ku hittaari umulera»

goorttun

«Ani odo leerowa, usuna erekkee linnara»

kakkoonɂamere maayyona laagire.✝

6 Waa barkki erekkeessa alami tos kakkofarare goorata,

«Erggichcha kawaa dubba usuun hasagade» amera.✝

7 Erggichchakokki gara,

«Erggichchaalnna ambbal aani,

ohandaaranna lac'a kaɂeleenee aani yelinnara» amara.✝

8 Erekkeessakokki gara ade;

«Hedo! Korffinjekka jiruu jiroommakko taa jiruujiroomma geeroon girnnara;

wononatikkaanna rummii bariisatta;

9 Ati k'ullumma geelatta; meellaneenna diidatta;

Hikkakkotti aalanttii Waa Hedokka ku assaabate;

Saatilaalttaakko roorise geggeloo tasisatto zayitii kuun shigide» amara.✝

10 Usumaleenna,

Goottakkee! «Ati horaarjje ul met't'iite;

Daruurjjolnna genettaayi met't'iite;

11 Iso dubba bayinnaraan;

Ati adde girnnatta;

Iso dubba sarssi aani doɂayinnaran.

12 Gashe aaninna ati duubinnatta;

Isona sarssi kaddoɂan sarssi kaɂusubii goggoɂiggilssamaro malee iggilissaminaran.

Ati arggetto atitta,

Geeskkaawun gachcho laagitto» amara.✝

13 Waa erggichchaal orroo;

«Diinakkaa odonnatikkaa hegelii taa yellooyi

Merggetteeyi hamas's'ii» kakkoonɂamera maayyona laagiro.✝

14 Erggichchaal dubba Waa ammani kafayyinnaro ibaaddon handdayin ofaramaraan Waawun ohandaaran ayyaanalyyaan.