ራጋ 18

እያኖ ካባብሎን

1 ሂካኮ አባባየረ ካአቲ ሁና ካአባናየ ካካለ ኤርግቻት ዳሩርኮ ዳጋ ግራን አን ዴ፤ ካባጃተሳኮክ ሀንቃኮ ካከይ ኡል ዱባ ሀንቃየ፤ 2 ጦቂ ታአንተ ያዬ ሃ አማ ኦኬ፤ "ታንጂንት ባብሎን ኢተታ! ኢተታ! ዱርሳኮክ ምን ሌተታ፤ ባቲክ አያና ካኮባራሮ ምን ሌተታ! ባቲክና እሊ ድን ካሜልላሮ ክምብር ካኮባራሮ ምን ሌተ!✝18፡2 ኢሳ. 13፡21፤ 21፡9፤ ኤር. 50፡39፤ 51፡8፤ ራጋ 14፡8። 3 ካሴቲሳሮ ሻርሙጣኖክሴኮክ ካዎይኒ ጣሞ ጎሳ ዱባ ጣመራ፤ ካኡሌ ዎኖላልና ኤሰነ ዎታ ሻርሙጠራ፤ ዳዳላተ ካባራረ ካኡሌ እባዶ ባሪሳኖኦትሴ ኣሎ ኤካታኖኮ ካከይ ዱረሳ ሌራ።"✝18፡3 ኢሳ. 23፡17፤ ኤር. 51፡7።

4 ታካለ ያየ ዳሩሪ ሃ አማ ግራን አን ማለ፤

"ጎሳኬ! ጩቦክሴነ ዎታ ኡና አሮሌተን፤

ኤሰ ታግናቶ ኤንገ ኦሄዴዳማታን አሮሌተን፤

ኤሰ ኦሮኮ ብያ!✝18፡4 ኢሳ. 48፡20፤ ኤር. 50፡8፤ 51፡6፥45።

5 ጩቦክሴክ ቱላ ዳሩር ጌራ፤

ዋ ባስክሴ ሻደራ፤✝18፡5 መጣ 18፡20-21፤ ኤር. 51፡9።

6 ኤሰ ካስሰቶኮክ ጅልባ ማለ ኤሰን ስሳ፤

ኤሰ ኦፈልተቶ ፈሎን አምባ ሙራ፤

ኤሰ ጣሞ ካሞጋን ታኮለለደቶ ጡጋ ኦሮ

አምባ ካአቲ የላዴን ለሌዳ፤✝18፡6 ማዛ. 137፡8፤ ኤር. 50፡29።

7 ኤሰ ካባጃትሴዉና ባሪሳኖኦትሴ ኢድሳይን እስኦትሴዉን ካስሰቶ ግታክ

አቦሳና ጋዳ ኤሰን ስሳ፤

ኤሰ ዎዳናትሴይ

‘አን ኦር ዎኖ ኣን ሀማጼራ

ጋልታንቴ ላኮዮ፤

ጋዳና ኢን ሱረ ላኮጌሮ’ አማ ጣዳተ።

8 ሃንሱን ኤሰ ታግናታ ኤንገ ዱባ አሪ ቶይ ኤሰ ግናታ

ጎይና ጋዳ ኡኢና ኤሰ ግናራ፤

ኤሌኒና ጉባይናታ፤

ኤሰ ጉት ካፍርዳራ

ጎታ ሄዶ ካአቲያ።"

9 ኤሰነ ዎታ ካሻርሙጠራና ግር ካኢዳኒ ካግረ ዎኖላል ኤሰ ጉባታ ግራን ኢይ ካብያሮ ካኮድያረን ጎራታ ኤሰን ኦካ ኦታራን፤ 10 አቦሳክሴ አብሳታናኮ ካከይ ኤባ አሌንጉረን "ተ አት ታንጂንት ካታማት፥ ተ አት ታአቲ ካታማ ባብሎን! ፍርዳ ሳቲ ቶይ ኦሮ ኩ ቶስ ማንኮኤመተሮ ማራን ተ ኣኔ ኩን! ኣኔ ኩን!" አማራን።✝18፡10 ሕዝ. 26፡16-17።

11 ማርካፋክሶት ስዳነ ሆረንባን ካኢምናራ ማንኮዋታመሮ ማራን ኡሊ ጉት ዳዳላተን ኦባራራን ኦታራን፤ ኤሰን ጋዳራን፤✝18፡11 ሕዝ. 27፡31-36። 12 ማርካፋክሶ ካስደሮ ዎርቂ፥ ብር ታአማማቶ ማርጮ፥ ካካባጃመ ኤኤሞ፥ ኢንቁ፥ ካጭምን ሳርስ፥ ዳማክ ሳርስ፥ ካሀር ሳርስ፥ ሄላክ ሳርስና ታኢዳን ኡርት ካአቦ ጋ ዱባ፥ ታዳኖ ኢልክ፥ አዉኣሎክ ጋ፥ ነሃስ ታአማማቶ ማርጮ፥ ማርጮኮና ጫቢቾኮ ካፈላመሮ ሁ ዱባ፥ 13 ያጋንዶ፥ ሳዎ፥ ካኡራሮ ጋ፥ ፉልፉሊሶ፥ ኢጣና፥ ካዎይኒ ጣሞ፥ ታኤጀርሳ ዛይቲ፥ ጣመ፥ ዳርጋማ፥ ሳዬ፥ እዳድ፥ ፋራዴል፥ ካኮጉሉፋራን ፋራድ፥ ድይና ካካለ እባዶነያ።✝18፡13 ሕዝ. 27፡12፤ 13፡22። 14 ዳዳላተን ኦባራራና "ተ አት ካሀልቻታ ካእዳን ኮኮ ዱባ ኩኮ ፋክመራ፤ ዱሩማታና ኩ ታኢድሳተ ካባጃታ ዱባ ባተታ፤ ጎርታ ሂታኮ ሆረንባን ሂካ ዱባ ሱረ ላኮሄላይናቶ!" አምናራን። 15 ሂካ ኮኮ ዱባ ኩኮ ኢምናታ ዱረሳ ኦሌረን ዳዳላተን ኦባራራን አቦሳክሴ አብሳታናኮ ካከይ ፋክም አልናራን፤ ኦታና ጋዳ፥✝18፡15 ሕዝ. 27፡31-36። 16 "ካጭምን ሳርስ፥ ዳማክ ሳርስና ሄላክ ሳርስ ሳርሳታ ታግቴ፥ ዎርቂና ካካባጃመ ኤኤሞ ኢንቁይና ታኢዳተ፤ ታንጂንት ካታማ ኣኔ ኤሰን! ኣኔ ኤሰን! 17 ሀኑኡ ግታኒዕ ኡራዎ ሳቲ ቶይ ባዬን፤" አማራን።

ማርካፋ ኦአጃጃሬን ዱባ፥ ማርካፋይ ካሰሰታረ እባዶ ዱባ፥ ማርካፋይ ኦፈላታረን ዱባ፥ በከይ ሰሴተን ኦዳዳላታረን ዱባ ኤባ ፋክም አልናራን፤✝18፡17 ኢሳ. 23፡14፤ ሕዝ. 27፡26-30።

18 ኤሰ ጉባታ ግራን ካበያሮ ኢይ ካኮድያረን ጎራታ "ህታ ታንጂንት ካታማ ኣን ታላታ ታካለ ካታማ ሱረ ግቶ?" አማ ኦኬን።✝18፡18 ሕዝ. 27፡32። 19 እስኦትሶ ጉት ጎራ ክክባቴን፤ ኦታና ጋዳ ሃ አማ ኢይናራን፤ "በከ ጉት ካሰሴታሮ ማርካፋ ኦአባን ዱባ ኡራዎኦትሰይ ዱረሳ ኦሌራን፥ ሀሴ ታንጂንት ካታማ ሳቲ ቶይ ኦሮ ማንኮኢተቶ ማራን ኣኔ ኤሰን! ኣኔ ኤሰን!"✝18፡19 ሕዝ. 27፡30-34።

20 ተ አት ዳሩሪ! ኤሰ ገጌላ! ዋ እስን ማራን ኤሰ ጉት ማንኮፍርዴሮ ማራን እስን ቁሎለ፥ ኦፋራንቴታና ሄገሮል ገጌላየን!✝18፡20 አዳ. 32፡43፤ ኤር. 51፡48።

21 ሂካኮ አባባተረ ካአቲ ኤርግቻት ካንጂንክ ሪም ግታክ ኤኤሞ ኮ ኬሰጉረ ሃ አማ በከ ኦሮ ሉጉደ፤ "ታንጂንት ካታማ ባብሎን ሃ ሁናይ ሻፋም ኢናታ፤ ሂታኮ ሆረንባን ሱረ ላኮሄላንቶ፤✝18፡21 ኤር. 51፡63-64፤ ሕዝ. 26፡21። 22 ክራን ኦባሳራና ታዱዱሮ ያየ፥ ሱሱሌ ኦኡፉፋራና ማላካታ ኦኡፉፋራንኮት ያየ ካላም ኩዬ ኦሮ ላኮማልሳንቶ፤ ማዮና ፈሎ ኦገኔ ንፍርተ ሌ ካፈላራ ሎማስ እባዶ ሂታኮ ሆረንባን ኩ ኦሮ ላኮሄላምሮ፤ ካሪመ ኤኤሞኮት ያየ ኩ ኦሮ ላኮማልሳንቶ።✝18፡22 ሕዝ. 26፡13፤ ኢሳ. 24፡8። 23 ካኮሮንታ ኢፋ ሂታኮ ሆረንባን ኩ ኦሮ ላኮሀንቃይሮ፤ ካማሻሼኮትና ታማሻሼት ያየ ሂታኮ ሆረንባን ኩ ኦሮ ላኮማልሳንቶ፤ ዳዳላተ ካባራረ እባዶካ ካአላም እባዶ ካጂንጂንየ፤ ሙሩናካይ ጎሳ ዱባ ሽርሰታ።✝18፡23 ኤር. 7፡34፤ 25፡10።

24 "ኤሰ ኦሮ ካሄገሮልኮክና ካቁሎሌ እባዶኮክ ኢግና፥ ኡሊ ካላጋዴራን እባዶ ዱባኮክ ኢግ ሄላመራ።"✝18፡24 ኤር. 51፡49።