1 ሆርኮስኮ ካየረ ዋ ራ ካሞጋንና ጎራታ ካሞጋኒ ጋራ ካሄገሮልነ ኦዶጆልካኑን አዬሰረ፤ 2 ግዳ ጎአመን ካጋቾ ጌሲ ካመን ዱባ ጎጎኤሎን ካየለሮ ኤረኬሳኮክ ጋራነ ኖን አዬሰራ፤ አላም ዱባ ካኮመጠራ ኡሱያ። 3 ኡሱ ካባጃ ታዋ ሀንቃይሰ ካቱሳሮያ፤ ያዳሊቴሳና ዋኔ ዎታ ታኤካቶታ፥ ሃፉራኮክ ሁናይ አላም ዱባ እስክሰ አበራ፥ እባዶ ጩቦኮ ቁሎይሰ አባባተረ ዳሩሪ ካአቲ ዋኮት መርጌ ሀማጼ።

4 ኡሱን ካቤራ መገ ካኤርግቻ መገኮ ካሮራሮ ማንኮሌ ማራን፥ ኤረ ካዋ ኤርግቻኮ ኣሎ ካሮራሮያ።

5 ዋ ዱዶ ኤርግቻል ኦሮ፥

"አት ኤረኬታ፥ አን ኩ ህታር ኡሙለራ"

ጎርቱን

"አን ኦዶ ሌሮዋ፥ ኡሱና ኤረኬ ልናራ"

ካኮንአመረ ማዮና ላግረ።✝

6 ዋ ባርክ ኤረኬሳ አላም ቶስ ካኮፋራረ ጎራታ፥

"ኤርግቻ ካዋ ዱባ ኡሱን ሀሳጋደ" አመራ።✝

7 ኤርግቻኮክ ጋራ፥

"ኤርግቻልና አምባል ኣን፥

ኦሀንዳራና ላጫ ካኤሌኔ ኣን የልናራ" አማራ።✝

8 ኤረኬሳኮክ ጋራ አደ፤

"ሄዶ! ኮርፍንጀካ ጅሩ ጅሮማኮ ታ ጅሩጅሮማ ጌሮን ግርናራ፤

ዎኖናትካና ሩሚ ባሪሳታ፤

9 አት ቁሉማ ጌላታ፤ ሜላነና ዲዳታ፤

ሂካኮት ኣላንቲ ዋ ሄዶካ ኩ አሳባተ፤

ሳትላልታኮ ሮርሰ ገጌሎ ታስሳቶ ዛይት ኩን ሽግደ" አማራ።✝

10 ኡሱማለና፥

ጎታኬ! "አት ሆራርጀ ኡል መጢተ፤

ዳሩርጆልና ገነታይ መጢተ፤

11 እሶ ዱባ ባይናራን፤

አት አደ ግርናታ፤

እሶ ዱባ ሳርስ ኣን ዶአይናራን።

12 ጋሸ አንና አት ዱብናታ፤

እሶና ሳርስ ካዶአን ሳርስ ካኡሱቢ ጎጎኢግልሳማሮ ማለ ኢግልሳምናራን።

አት አርጌቶ አትታ፥

ጌስካዉን ጋቾ ላግቶ" አማራ።✝

13 ዋ ኤርግቻል ኦሮ፤

"ዲናካ ኦዶናትካ ሄገሊ ታ የሎይ

መርገቴይ ሀማጺ" ካኮንአመራ ማዮና ላግሮ።✝

14 ኤርግቻል ዱባ ዋ አማን ካፋይናሮ እባዶን ሀንዳይን ኦፋራማራን ዋዉን ኦሀንዳራን አያናልያን።