እብራዊ 6

1 ጎርታ ክርስቶሳ ማራን ካስሳመሮ ካሆራርጄ አጋልስስ አባብ አባብ ኬሳኖ እስጉነ አጋልስስ ዱባማኖ፤ ጎይ ቶስ ኦጌሳራን ፈሎ፥ ጩቦኮ ጉላ ጋላኖኮክና ዋ አማናኖኮክ ጋራ አባብ አባብ አጋልስሳ ካሆራርጄ ኡኩም ላኮጣቢንሶ። 2 ኡሱማለና ጥንቃታ፥ ገነ ጉት ካኖ፥ ጎይኮ ክያኖ፥ ካጅሩ ጅሮማ ፍርዳኮክ አጋልስስ አድ ላኮጣቢንሶ። 3 ዋ ኖን ፈኢ ጎስሰ ሆረንባን አጋልስሲ ዱባማኖ ቶስ ጂናይናና።

4 አማኖክሶ ካካተሮ እባዶ ጩቦኮ ጉላ ጋላኖ ቶስ አባብን ላኮዳንዳማሮ። ሂካ እባዶን ሂታኮ ሆረነ ኢፋ እሶን ሀንቃየ ግረ፥ ካዳሩረ እላቦና ቃማሰሬን፤ አያና ቁሉክኮ ቆባ ኦአታቴረን፥ 5 ካእዳንክ ሃፉራ ካዋና ኤመይን ካግሮ ጅሩ ጅሮማክ ቃላዳ ካዋኮክ ሁና ኦቃማሰሬን፥ 6 ሂካ ዱባኮ አባባይ አማኖክሶ ጎካካቴን እሶ መተክሶዉን ኤረ ካዋ አባበን ማንኮሱዋራን ማራና ዲዳ ቤሰን ማንኮየራሳናን ማራን እሶ ጩቦኮ ጉላ ጋልስን ላኮዳንዳማሮ።

7 አርጌቶ ኡሱ ጉት ካኡባታሮ ኢዳሞ ካጣማራ አካክልተ ካአባራተሮ እባዶትን ላኦ ታስሳታ ኤረ ዋኮ ኡሶ ሄላታ፤ 8 ኤኤንና ቂንጮና ጎአልሰ አደ ላኦ ካላይት ላታ፤ ኤነ ቃንጋምናታ፤ ኤሰኮ ኤለኒ ጉባምናታ።✝6፡8 መጣ 3፡17-18።

9 አን ኦጌላታሮ ኦቴ! ኖ እስኑን ሂካ ጎአዬንሰና ሱረ ፋይናክስኑን ካሌሮ ካእዳንክ አየስ ጉት ግራኖክስን ኖ አብዳታና። 10 ዋ ታኢዳን ካፍርዳሮያ፤ ሃኑን ፈሎኦትስን ጣየና ሌረ ግዳና መገኬሳ ማራን አማኒል ጋርጋርን እስን ታቱሴታን ጌላንጀ ላኮኢሎሮ። 11 እስን ዱባ አብዲ ካኦራታን አየስ ታ ገነ ጌግሳታኒ አታንክስን ታ ጋቾ ጌታኒ ጎጎቱሳዉን ኖ ሀልቻና። 12 ኖ ካኮንሀልቻናና አማኖይና ኦብሲ አታይጉነ ዋ አብዲ ካስሰሮ አየስ ካኤልናሮ እባዶ ኣን ጎጎሌታኑን ኳሬ ላፋኒዕ ጎጎሌታኑን ላኮዮ።

አብድ ታዋ ታአብዳንተ ላኖ

13 ዋ አብራመን አብድ ካኮስሳረ ጎራታ ኡሱ ካኮአማትራ ኡሱኮ ካሮራራ ካካለ ማዮና ማንኮግኖን ማራን ሃ አማ ኡሱ እሲ አማተ። 14 "ኦግራን አን ኩ ሶማሳይናራ፥ ሳኒታና ሞጋስናራ አመ ዋ አዬሰ።"✝6፡14 መጣ 22፡16-17። 15 አብራመ ኦብሴ ኦራተጉረ ዋ አብዲ ኡሱን ካታበሮ አየስ ሄላተ። 16 እባዶ አማቶ ጎታብሮ መተኬሳኮ ካሮረ መገይ አማታራ፤ አዬስክሶና አማቶይ አታይሳ እሶ ጠኤ ታግቶ ዶጋማ ዱባ ባሳራን። 17 ሂካማሌ ሙርት ታዋ ታኢግልሳሞን ላኖ ኣሎ አዴስስን ዶተጉረ አብዲ ኤልን አብድ አማቶይ እሶን አታይሰራ። 18 ሂካማሌና ዋ ኦኢግልሳሞና ካጣራ ካሌኖን አየስ ላማ፥ ህክና አብድና አማቶ ኖን ስሰራ፤ ሂካ አየስ ላማኮክ ጋራነ ኖ ሆረ ታግቶ አብድ አታይሳይ አባይን ጎጎዳንዴኖን ካኮእስካኖ ሄላይን ኡሱ ቶስ ኦኤሜነና ኖ ካአቲ ጎጎኢና ሄላነና፤ 19 ህት አብድ ግርካንዉን ካአኢኖን ካአብዳመ ማርካፋ ባዲ ታአሊሳቶ ማርጮ ኣንትትታ፤ የሱሳ ታአብና አብድ ጎጎሎኮ ሮርተ ቁሉክ ምን ቶስ ታባታ።✝6፡19 ዎዩ. 16፡2። 20 ሂካ ቁሉክ ምን ቶስ የሱሳ ካመልከጸደቅ ቱቃሞኮክ ሹማታ ኣን ጅሩ ጅሮማን ካቱቃሞል ዎይቻ ሌ ኖ ማራን ጣየ ታበ።