1 Aakhar, yꞌarawaan, baraak Wꞌankwana Yasuuꞌiib tikatiinihoob, hinin allamnaneet toonaatiit tikweerneet toona hookna nhariw. Malya Ukwaasana afirhisi tiyadna. Baraak suur akay been usalaliib tikweerna, laakiin winneet akrakaab tikatiineet toona jarrabaana. 2 Wꞌankwana Yasuuꞌi aamananaayeet, tiwasi bareekna soonaneet shꞌaana.

3 Ukwaasana mugaddasaab tikatiineet toona isehariiw hookna. Aflaay jikuuniit hayꞌa baadꞌiina. 4 Timꞌateekna hamooysamaawwa mugaddaswa salalii geeb tikweerneet toonaati. 5 Tiniyaateekna whii baakishiyaamaana tari Ukwaasana baakaan udehayiit baakwiriina. 6 Jikuuniit hayꞌaatiib Wꞌankwanaay yꞌaamanana ibakii baatilisna. Teen teena sakiiniibka Ukwaasana jasaayi indiyeet toona soonaneetookna toona baabaadhiinna. 7 Ukwaasana maagnaaytii dehaay waasaayoon kiiki, laakiin mugaddasaab nikatiyi jillaay waasiya hoon. 8 Aflaay een ibhali bitsinaakiirneek, baraak hinin eebhat kitꞌamꞌakaarna, laakiin Ukwaasana bareekna iniiweeb Ishuukeeh Imugaddasa han timꞌakiirna.

9 Baraakna taktak areeteeneet toonaatiib dehookna nikatibeet toona shanhatiyaat dehaay kinbari. Ukwaasana taktak areeteeneet toona allamiya hookna. 10 Baraak kasseeh oodehay Magadoonyaay eefeen areetaaneet toona suur akay rhistaana. Laakiin yꞌarawaan, masi gwidakaana tidꞌaneet toona hookna nhariw.

11 Diiseet tikweerneet toona daayiib jarrabaana, ishanhookna gwꞌadna, aree akraab shagaamaana, hinin bareekna allamnaneet toonaatiit dꞌiinaa. 12 Malya uudehay Wꞌankwana aamanaab baakay, hamooysi hookna iyadna, aflaay weernaay kehii adehami kitdiina.

13 Yꞌarawaan, baliin yꞌaamanana suur akay iiyaan kak ikatiineeb afhisi hookna niyad. Malya bareeyooh kehii itehis kitdiina, oodehay isꞌaya baabariib tꞌiiteeb iikti kitdiina. 14 Yasuuꞌa iiyaayt malya yakiyaneet toona hinin aamannay, aree aflaay Ukwaasana Yasuuꞌaab aamaniin oodehay han bariiyooh geeb haay yꞌiiniyeet toona aamannay. 15 Een ibhali Wꞌankwana ooknaay ibhaliyee soonay hookna: hinin masi idhhaniib, Wꞌankwana yꞌiiniyeet tooyin ookiik idhhaniib, hinin baliin oodehay suur ayaani suurii saki kindi. 16 Akra sootiiwwa, umalaktaayi oowinnaayt waliiktiiwwa, Ukwaasanaay oodꞌaay thiwtiiwwa, Wꞌankwana tibreetee itꞌigir indi. Malya uudehay suur Umasiih aamanee iiyaan baliin iidhhan iyadna. 17 Malya, Wꞌankwana tibreeteeb nimeeri jillaay, hinin idhhani kassaan hiddaab bꞌaluukiib reewi niyad. Been udoori harꞌii, hinin kassaan diimaab Wꞌankwanaay geeb daamni niyad. 18 Shaawti een ibhaliyee taktak sꞌakirna.