1 Baawloos, Umasiih Yasuuꞌi jillaay abuukiib ikatiinaaywa, usanoon Tiimootiinaaywa, wꞌaraawoon geeboon shagaamiiniib Filiimuun ookiik uun ujawaab eebi. 2 Tukaniisi ugawiyook teefeetwa, tukwaatoon Abfiyaawwa, Arkhibboos ukajaraayiit Wꞌankwana shagaamiiniibwa ookiik eebi:

3 Ukwaasana Baabuunwa Wꞌankwanaayuun Yasuuꞌa Umasiihwa nꞌimaatwa mꞌasigwa baꞌiyaaw hookna.

4 Filiimuun, tusiileeltiyu barook shꞌaniyeebka, ani diimaab Ukwaasanaayu ahammiid. 5 Wꞌankwana Yasuuꞌiib wꞌiimaanookwa, kasseeh Ukwaasanaay oodehayi reerookwa amaasiw. 6 Wꞌiimaanook wari dehayi geeb andhiidhihoob, baraah yꞌeetiit kasteeh tibaraka Umasiih hiiyyaayeen ikatiyeet ikteeniineet toonaatii dehaay siileelani. 7 Wꞌaraawuun, ureeruuk winneet afirhisiyaheeb aree daayiib isꞌakirheeb. Masi aree Ukwaasanaay oodehayi ginꞌa han rayhiya.

8 Shaawti, baruuk naan saki tindiyeet toonaati sooti hag Umasiih yhiiheeb. 9 Laakiin ureeri sabbii toon toona baruuk saktiniyeet toona hook aharriiw. Awooh, ani Baawloos wꞌeegrim, aree oontꞌa Umasiih Yasuuꞌi jillaay abuukiib akati. 10 Oonsiimus teeshtiimeet toona hook aharriiw. Baruuh wꞌooriitu ikati, tooy usijniib ani barooh Umasiih beeti milhaabi. 11 Suur baruuh bariiyook dehaay nafꞌaat kiibari, laakiin oontꞌa baruuh barookwa aneebwa mhalleen nafꞌaat dehoon ibari.

12 Oontꞌa Oonsiimus barook beeti angiir, aree bariiyooh geeb uginꞌu giigiini. 13 Ani barooh tooy geebu ikatiyeet toona ahariw, ani usakana udaayiinaay ibhaliiti sabbii tooy usijniib eefi, aflaay baruuh bariiyook oomhiin aneeb eeshtiimeet toona ahariw. 14 Laakiin baruuk agbilaab baakaay, ani naat han saktiib ahariwaab kaaki, aflaay barook uknaayook nhast niyaatii eetniyeet toonaatu aree akruurii kiiki. 15 Oonsiimus shalik door hook giigaab ikati, aflaay baruuh daayiinaaytii agarti yꞌiiniib ikati hook. 16 Laakiin ukishiyaayt kiiki. Oonsiimus kishiyaayka hayiskaab ikati. Baruuh anii hamadhꞌa ikati, laakiin bariiyook dehaay araawiika winkaab dehook ikati. Baruuh wꞌaadamiitwa Wꞌankwanaay aamananaaytwa hiddaab ikati.

17 Umasiihi sabbii baruuk aneeb araaw tikwasiyeek, aflaay Oonsiimus han aneeb tꞌiiteena daayiib ashisha. 18 Baruuh amaagna hook dꞌiyaab ikatiyeek, tari barooh naat han tinshiikeek, beet toona anii dehaay hasiba. 19 Ani Baawloos, toon toona wꞌayiisu akantiib. Toon toona ikwaas hook andi. Laakiin baruuk han umidhhanook ookna anshiikeetook toona baabaadhiina. 20 Usanoonwa Wꞌankwana Umasiihiib wꞌaamananaawwa, anaahook toon toona Wꞌankwanaay jillaay anii dehaay dꞌiyaat afirhisaheeb. 21 Baruuk toon batooh ani hook aharriiweet saktiniyeet toona eetehak kaabari. Masi gwidakaana han saki tindiyeet toona akteen.

22 Aree masi gaana: Anaahook gaw anii dehaay soomira. Tusiileeltuukna agbilamiit ani bareekna beeti harꞌa attiyeewiyeet toona minniimani.

23 Abaafraas han Umasiih Yasuuꞌi aamanana ikatiyi sabbii tooy usijniib eefi. Baruuh han salaamiini hook. 24 Maarkooswa, Ariistaarkooswa, Deemaaswa, Luugaawwa anii geeb hiddaab shagaameen han salaameen hook. 25 Wꞌankwana Yasuuꞌa Umasiihiit tinꞌima kasseekna geebookna badaayiin.