1 Dunu da amane sia:i, "Na dogolegei amola na uda! Na da na ifabia golili sa:i dagoi.

Na da na hedama:ne fodole nasu

amola na gabusiga: ‘me’ amo da gagadolala.

Na da na agime hano amola agime hano diasu nana.

Na da na waini hano amola gebo dodo maga:me nana." Uda da amane sia:i,

"Sasagesu dabe dilia! Ha:i moma!

Amola waini hano naleawane, sasagesu hou amoga feloama:ma!"

2 "Na da golai dialoba, na dogo da nedigi dialu.

Na sasagesu da logoa lulu fugilaloba, na da golaia ba:lu." Dunu da amane sia:i,

"Na dogolegei! Na ‘dafe’ sio! Na misa:ma!

Na dialuma da oubi mogele amoga nanegai gala." Uda da amane sia:i,

3 "Na da na abula gisa:i dagoi. Na da abuliba:le amo bu gasisa:lima:bela:?

Na da na emo dodofei dagoi. Na da laluba:le na emo bu nigima:ma:bela:?

4 Na sasagesu dunu da logo ga:suga lobo ligisi.

E da na gadenene esalebe, amo na dawa:loba, nodoi.

5 Na da e ganodini misa:ne momagei dagoi ba:i.

Na lobo da ‘me’ gabusiga: hano amoga dedeboi ba:i.

Na da logo ga:su geda gagui.

6 Na da na sasagesu dunu misa:ne logo doasi. Be e da asi dagoi ba:i.

Na da ea sia: nabimusa: bagadewane hanai. Na da e hogoi be hame ba:i.

Na da e wei be alofebe hame nabi.

7 Sosodo aligisu dunu amo da moilai bai bagade sisiga:ha lala, na ba:i.

Ilia da na fane, fofonomagia:i.

Moilai bai bagade gagoi sosodo aligisu dunu

ilia da na abula sawa:figi houga:le fasi.

8 Yelusaleme uda, dilia! Nama sia: ilegema!

Dilia na sasagesu dunu ba:sea, ema na da sasagesu hou ha:giwane hamobeba:le

gasa hame gala adoma:ne, sia: ilegema." Yelusaleme uda ilia amane sia:i,

9 "Saga! Dia noga:idafa ba:su da eno uda huluane baligisa.

Be dia sasagesu dunu da eno dunu huluane baligisala:?

E da baligili noga:idafala:? Ninia da abuliba:le dima ilegele sia:ma:bela:?"

Uda da amane sia:i,

10 "Na sasagesu dunu da noga:idafa ba:sa amola e da gasa bagade gala.

E da dunu 10,000 gilisisu ganodini baligili noga:idafa ba:sa.

11 Ea odagi gadofo da osoboya:i amola hohona:boi.

Ea dialuma hinabo da helo amola balega sio defele, bunumai gala.

12 Ea si da ‘dafe’ sio amo da dodo maga:mega dodofei

amola hano yogo dalebe ea bega: esala, amo defele, noga:idafa ba:sa.

13 Ea ba: da ifabi amo da hedama:ne fodole nasu bugi amoga nabai defele,

noga:idafa ba:sa.

Ea lafi gadofo da ‘lili’ mosoi amo ‘me’ hano amoga nanegai agoane ba:sa.

14 Ea lobo da noga:le hamoi ba:sa amola ea lobo sogo gasisalasu

amo da igi noga:idafa amoga nina: hamoi.

Ea da:i da hohona:boi ‘aifoli’

amo da ‘sa:faia’ igi noga:i amoga nina: hamoi, agoane ba:sa.

15 Ea masele da ‘a:laba:sade’ ganumu amo da gouli bai amoga sali agoane ba:sa.

E da Lebanone Goumi alelaloi (amo da:iya da dolo ifa sedadedafa)

amo agoane baligili noga:idafa ba:sa.

16 Ea lafi da nonogosea hedasa. Na da ea hou huluane ba:sea, nodosa.

Dilia, Yelusaleme uda! Na sasagesu dunu da agoaiwane gala."