1 Hina Gode da amane sia:sa,

"Dilia adi dawa:bela:?

Na da dunu ea uda fisiagasu defele, Na fi ga asunasibela:?

Agoai galea, fisiagasu meloa dedei da habila:?

O dunu ea mano udigili hawa: hamoma:ne amo ili bidi lasa defele, Na da dili mugululi se iasu diasu hawa: hamoma:ne bidi labala? Hame mabu!

Dilia da wadela:i hou hamobeba:le fawane, mugululi asi.

Dilia wadela:i hou hamobeba:le, Na da dili ga asunasi.

2 Na da Na fi dunu gaga:musa: ahoasea,

ilia da abuliba:le Nama hame sinidigibala:?

Na da ilima wele sia:beba:le, ilia da abuliba:le hame adole ibala:?

Dilia adi dawa:bela:?

Na da gasa hameba:le, ili gaga:mu da hamedebela:?

Na sia:beba:le fawane Na da hano wayabo bagade hafoga:musa: dawa:.

Amasea, menabo da hano hameba:le bogosa.

3 Na da mu afadenene, gasi agoane

bogoi dunu amoma asigi didiga:su hou defele hamomusa: dawa:."

4 Na da helebe dunu ilima gasa ima:ne,

Hina Gode Ouligisudafa da nama sia:ne iasu olelei dagoi.

Ea da hamobeba:le, na da hahabe huluane, Ea nama olelesu liligi nabimusa:, bagade hanai.

5 Hina Gode da nama bagade dawa:su hou i dagoi.

Na da Ema hame higa:i, amola Ema hame baligi fa:su.

6 *Dunu da na famusa: mabeba:le, ilia noga:le fama:ne, na da na abula gisa:i.

Ilia da nama gadebeba:le, amola na mayabo hinabo a:le fasibiba:le,

amola na odagia defo adugala:beba:le,

na da ilia logo hame hedofai amola dabe bu hame i.

7 Be ilia nama gadesea, na da se hame naba.

Bai Hina Gode Ouligisudafa da na fidilala.

Na da amo houba:le, mae dafama:ne, na dogo denisisa.

Na gogosiasu hame ba:mu, amo na dawa:.

8 *Bai Gode da na gadenene esalebeba:le,

E da fofada:nanu, na hou da moloi amo olelemu.

Nowa da nama fofada:ma:bela:?

Defea! Ania da gilisili fofada:musa: masunu da defea.

Amola amo dunu da nama diwaneya udidimu da defea.

9 Hina Gode Ouligisudafa Hisu da na gaga:sa.

Amaiba:le, nowa da nama fofada:nanu,

na da wadela:i hamoi dagoi sia:ma:bela:?

Nama diwaneya udidisu dunu da hobeamu.

Aowaba da abula na dagosea, abula da hame ba:mu.

Amo defele, nama diwaneya udidisu dunu da bu hame ba:mu.

10 Dilia huluane Hina Godema nodosu dunu!

Amo Ea hawa: hamosu dunu ea sia: nabasu dunu! Mae beda:ma!

Amabela:! Dilia da logoga ahoasea, gasi bagade ba:ma:bela:?

Be Hina Gode Ea hou dafawaneyale dawa:ma amola lalegaguma.

11 Be dilia da eno dunu amo gugunufinisimusa: ilegesu dunu!

Dilia da dilisu wadela:i ilegesu amoga wadela:lesi dagoi ba:mu.

Hina Gode Hisu da amo hou ba:ma:ne hamomu.

Dilia da se nabasu gugunufinisisu hou bagade ba:mu.