1 Ilia da silifa lamusa:, uli dogosa.

Ilia da gouli fofoloma:ne, laluga adoba:sa.

2 Osobo bagade dunu da gula lamusa:, osobo dogosa.

Ilia balase lamusa:, igi goudane dadaiyasa.

3 Amo liligi lamusa:, uli dogosu dunu da gasi bagade ganodini hogosa.

Ilia da oso gududafa dogone, hogosa.

Ilia gasi ganodini igi lamusa: dogosa.

4 Dunu esalebe soge amoga badiliadafa, amola dunu ilia emoga ahoasu logoga

badiliadafa, ilia da uli dogosa.

Amogawi, ilisu da efe gaguiwane, uli dogoi ganodini hawa: hamonana.

5 Ha:i manu bugi da osoboga heda:sa.

Be amo osobo haguduga, liligi huluane da gagoudai dagoi ba:sa.

6 Osobo bagade ea igi ganodini da sa:faia (igi noga:idafa) ba:sa.

Osobo gulu ganodini, gouli dialebe ba:sa.

7 Sia sio da gouli uli dogoi ea logo hame ba:sa.

Amola buhiba da amo gadodili hagili hame ahoa.

8 Laione wa:me amola eno nimi bagade sigua ohe da amo logoba:le hame ahoa.

9 Uli dogosu dunu da ga:nasidafa igi dogosa.

Ilia da goumi ilia baiga dogonana.

10 Ilia da igi magufu ganodini dogosea, ilia da igi noga:idafa ba:sa.

11 Ilia da dodogona ahoana, hano ilia banugumaga doaga:sa.

Ilia wamolegei liligi amo hadigiga gaguli maha.

12 Be bagade dawa:su hou ba:ma:ne, ninia habi hogoma:bela:?

Ninia da hou noga:le dawa:digima:ne, habidili hogoma:bela:?

13 Bagade dawa:su hou da osobo bagade dunu ganodini hame ba:mu.

Dunu huluane da bagade dawa:su hou habodayane hamedafa dawa:.

14 Dilia da hano wayabo bagade lugududafa amo ganodini,

bagade dawa:su hou hame ba:mu.

15 Bagade dawa:su hou amo silifa amola gouliga bidilamu da hamedei.

16 Gouli noga:idafa amola igi noga:idafa,

amo da bagade dawa:su hou ea habodayane hame defesa.

17 Bagade dawa:su hou da gouli amola gouliga hamoi faigelei

amola ‘galasi’ noga:idafa amo habodayane baligisa.

18 Bagade dawa:su hou da ‘golole’ amola galasi noga:i

amola ‘lubi’ igi ilia habodayane baligisa.

19 ‘Douba:se’ igi noga:idafa amola gouli noga:idafa

da bagade dawa:su hou amo ea habodayane hame defesa.

20 Amaiba:le, bagade dawa:su hou ea bai da habila:?

Ninia da habodane amo dawa:digima:bela:?

21 Esalebe liligi huluane da amo ba:mu gogolesa.

Sio da hagili ahoasea, amo hame ba:sa.

22 Fedege agoane, bogosu amola gugunufinisisu hou

da bagade dawa:su hou fonobahadi fawane nababeba:le, noga:le hame dawa:.

23 Gode Hi fawane da logodafa dawa:.

Ea fawane da bagade dawa:su hou dialebe sogebi dawa:.

24 Bai Ea fawane da osobo bagade bega: huluane

amola liligi huluanedafa mu hagudu dialebe ba:lala.

25-27 Gode da fo amoga gasa ianoba,

amola hano wayabo amoma alalo sedagi ilegeloba,

amola gibu ea sa:imu sogebi ilegeloba,

amola mu gohona: amoma ilia masunu logo olelelaloba,

amogalu E da bagade dawa:su hou ba:lalu,

amola ea habodayane adoba:lalu, bagade dawa:su hou da defeadafa sia:i.

28 *Gode da nini osobo bagade dunuma amane sia:i,

"Dilia da bagade dawa:su hou lamusa: dawa:sea,

dilia Hina Godema beda:i galawane nodoma!

Amo hou dawa:digima:ne, wadela:i hou fisili, Godema sinidigima!"