1 उनके पूर्वजां के घरान्‍ने के खास-खास आदमी ये सैं, अर जो माणस राजा अर्तक्षत्र के राज म्ह बाबेल तै मेरे गैल यरुशलेम म्ह गए उनकी वंशावली या सै: 2 यानिके पीनहास के वंश म्ह तै गेर्शोम, ईतामार के वंश म्ह तै दानिय्येल, दाऊद के वंश म्ह तै हत्तूश। 3 शकन्याह के वंश के परोश के गोत्र म्ह तै जकर्याह, जिसकै गैल डेढ़ सौ माणसां की पीढ़ी होई। 4 पहत्मोआब के वंश म्ह तै जरहयाह का बेट्टा एल्यहोएनै, जिसकै गैल दो सौ माणस थे। 5 शकन्याह के वंश म्ह तै यहजीएल का बेट्टा, जिसकै गैल तीन सौ माणस थे। 6 आदीन के वंश म्ह तै योनातान का बेट्टा एबेद, जिसकै गैल पचास माणस थे। 7 एलाम के वंश म्ह तै अतल्याह का बेट्टा यशायाह, जिसकै गैल सत्तर माणस थे। 8 शपत्याह के वंश म्ह तै मीकाएल का बेट्टा जबद्याह, जिसकै गैल अस्सी माणस थे। 9 योआब के वंश म्ह तै यहीएल का बेट्टा ओबद्याह, जिसकै गैल दो सौ अठारह माणस थे। 10 शलोमीत के वंश म्ह तै योसिव्याह का बेट्टा, जिसकै गैल एक सौ साठ माणस थे। 11 बेबै के वंश म्ह तै बेबै का बेट्टा जकर्याह, जिसकै गैल अट्ठाईस माणस थे। 12 अजगाद के वंश म्ह तै हक्‍कातान का बेट्टा योहानान, जिसकै गैल एक सौ दस माणस थे। 13 अदोनीकाम के वंश म्ह तै जो पाच्छै गए उनके ये नाम सैं: यानिके एलीपेलेत, यूएल, अर शमायाह, अर उनके गैल साठ माणस थे। 14 अर बिगवै के वंश म्ह तै ऊतै अर जक्‍कूर थे, अर उनके गैल सत्तर माणस थे। 15 इन ताहीं मन्‍नै उस नदी के धोरै जो अहवा नगर की और बहवै सै कठ्ठा कर लिया, अर ओड़ै हम लोग तीन दिन डेरे डाले रहे, अर मन्‍नै ओड़ै माणसां अर याजकां ताहीं देख लिया पर किसे लेवीय ताहीं ना पाया। 16 मन्‍नै एलीएजेर, अरीएल, शमायाह, एलनातान, यारीब, एलनातान, नातान, जकर्याह अर मशुल्‍लाम नै जो खास आदमी थे, अर योयारीब अर एलनातान नै जो बुद्धिमान थे 17 बुलवाकै, इद्दो कै धोरै जो कासिप्या नाम की जगहां पै लेवियाँ का प्रधान था, भेज दिया; अर उन ताहीं समझा दिया, के कासिप्या जगहां म्ह इद्दो अर उसके संगी भाई नतीन माणसां तै के-के कहणा, वे म्हारै धोरै म्हारे परमेसवर के भवन कै खात्तर सेवा पाणी करण आळयां नै ले आए। 18 म्हारे परमेसवर की कृपादृष्टि जो म्हारे पै होई इसकै मुताबिक वे म्हारै धोरै ईश्शेकेल नै जो इस्राएल के परपोत्यां अर लेवी के पोत्ते महली के वंश म्ह तै था, अर शेरेब्याह ताहीं, अर उसके बेट्यां अर भाईयाँ नै, यानिके अठारह जण्या ताहीं; 19 अर हशब्याह ताहीं, अर उसकै गैल मरारी के वंश म्ह तै यशायाह नै, अर उसके बेट्यां अर भाईयाँ ताहीं, यानिके बीस जण्या ताहीं; 20 अर नतीन माणसां म्ह तै जिननै दाऊद अर हाकिमां नै लेवियाँ की सेवा करण खात्तर ठैहराया था दो सौ बीस नतिनां ताहीं साथ ले आए। इन सारया के नाम लिखे होए थे। 21 फेर मन्‍नै ओड़ै यानिके अहवा नदी के किनारे पै उपवास का प्रचार इस उम्मीद तै करया, के हम परमेसवर कै स्याम्ही दीन हों; अर उसतै अपणे अर अपणे बाल-बच्यां अर अपणी सारी सम्पत्ति खात्तर आसान सफर माँग्गै। 22 क्यूँके मै राह के दुश्मनां तै बचण खात्तर सिपाहियाँ का दल अर सवार राजा तै माँगण तै सरमाऊँ था, क्यूँके हम राजा तै न्यू कह चुके थे, "म्हारा परमेसवर अपणे सारे खोजियाँ पै, भलाई कै खात्तर कृपादृष्टि राक्खै सै अर जो उसनै त्याग दे सैं, उसका बल अर कोप उनकै खिलाफ सै।" 23 इसे कै बारै म्ह हमनै उपवास करकै अपणे परमेसवर तै प्रार्थना करी, अर उसनै म्हारी सुणी। 24 फेर मन्‍नै खास याजकां म्ह तै बाराह माणसां ताहीं, यानिके शेरेब्याह, हशब्याह अर इनके दस भाईयाँ नै न्यारे करकै, जो चाँदी, सोन्‍ना अर बरतन, 25 राजा अर उसके मंत्रियाँ अर उसके हाकिमां अर जितने इस्राएली मौजूद थे उननै म्हारे परमेसवर के भवन कै खात्तर भेंट दिए थे, उननै तौल कै उनतै दिया। 26 मन्‍नै उनके हाथ म्ह साढ़े छः सौ किक्‍कार चाँदी, सौ किक्‍कार चाँदी के बरतन, सौ किक्‍कार सोन्‍ना, 27 हजार दर्कमोन के सोन्‍ने के बीस कटोरे, अर सोन्‍ने सरीखे अनमोल चमकण आळे पीतळ के दो बरतन तौल कै दे दिये। 28 मन्‍नै उनतै कह्या, "थम तो यहोवा कै खात्तर पवित्र हो, अर ये बरतन भी पवित्र सैं; अर यो चाँदी अर सोन्‍ना भेंट का सै, जो थारे पितरां के परमेसवर यहोवा कै खात्तर खुशी तै दिया गया। 29 इस करकै जागदे रहो, अर जिब ताहीं थम इन चिज्जां नै यरुशलेम म्ह प्रधान याजकां अर लेवियाँ अर इस्राएल के पितरां के घरान्यां के प्रधानां कै स्याम्ही यहोवा के भवन की कोठड़िया म्ह तौल कै ना द्यो, तब ताहीं इनकी हिफाजत करदे रहो।" 30 फेर याजकां नै अर लेवियाँ नै चाँदी, सोन्‍ने और बरतनां नै तौल कै ले लिया के उननै यरुशलेम ताहीं म्हारे परमेसवर के भवन म्ह पोहचावै। 31 नीसान नाम के पैहले महिन्‍ने के बारहवें दिन म्ह हमनै अहवा नदी तै चालकै यरुशलेम का राह लिया, अर म्हारे परमेसवर की कृपादृष्टि म्हारे पै रही; अर उसनै म्हारे ताहीं दुश्मनां अर राह म्ह घात लगाण आळयां कै हाथ तै बचाया। 32 अन्त म्ह हम यरुशलेम पोहचे अर ओड़ै तीन दिन रहे। 33 फेर चौथे दिन वो चाँदी-सोन्‍ना अर बरतन म्हारे परमेसवर के भवन म्ह ऊरिय्याह के बेट्टे मरेमोत याजक के हाथ म्ह तौल कै दिए गए। उसकै गैल पीनहास का बेट्टा एलीआजर था, अर उनकै गैल येशुअ का बेट्टा योजाबाद लेवीय अर बिन्‍नूई का बेट्टा नोअद्याह लेवीय थे। 34 वे सारी चीज गिणी अर तोल्‍ली गई, अर उनका तौल उसे बखत लिख्या गया।

35 जो गुलाम्मी तै आए थे, उननै इस्राएल के परमेसवर कै खात्तर होमबलि चढ़ाए; यानिके सारे इस्राएल कै बारे म्ह बाराह बाछड़े, छियाणवे मिंढे अर सतहत्तर मेम्‍ने अर पापबलि कै खात्तर बाराह बकरे; यो सब यहोवा कै खात्तर होमबलि था। 36 फेर उननै राजा के हुकम फरात नदी के इस पार के अधिकारियां अर अधिपतियाँ तै दिए; अर उननै इस्राएली माणसां अर परमेसवर के भवन के काम म्ह मदद करी।