1 हबक्‍कूक नबी नै कह्या मै अपणे पहरे पै खड्या रहूँगा, अर गुम्मट पै चढ़कै ठहरया रहूँगा, अर देखदा रहूँगा के मेरे ताहीं यहोवा के कहवैगा? मै अपणे दिए होए उल्हाणे कै बारै म्ह के उत्तर दियुँ?*

2 फेर यहोवा नै मेरे ताहीं जवाब दिया, "दर्शन की बात लिखदे; बलके पटियाँ पै साफ-साफ लिखदे के भाजदे होए भी वे आसान्‍नी तै पढ़ी जावैं। 3 क्यूँके इस दर्शन की बात सही बखत म्ह पूरी होण आळी सै*, बलके इसके पूरे होण का बखत रफतार तै आवै सै; इस म्ह धोखा न्ही होवैगा। चाहे इस म्ह देर भी हो, फेर भी उसकी बाट देखदे रहणा; क्यूँके वो जरुर पूरी होवैगी अर उस म्ह देर न्ही होवैगी। 4 देख, उसका मन फुल्या होया सै, उसका मन सीध्धा न्ही सै; फेर भी धर्मी अपणे बिश्वास के जरिये जिन्दा अर परमेसवर के खात्तर वफादार रहवैगा।* 5 दाखमधु तै धोखा होवै सै; घमण्डी माणस घर म्ह न्ही रहन्दा, अर उसकी लालसा अधोलोक की तरियां पूरी न्ही होन्दी, अर मौत की तरियां उसका पेट न्ही भरदा। वो सारी जातियाँ नै अपणे धोरै खींच लेवै, अर सारे देशां के माणसां नै अपणे धोरै कठ्ठे करे राक्खै सै।"

6 के वे सारे उसका उदाहरण बताकै, अर उसपै तान्‍ना मारकै न्ही कहवैंगे "हाय उसपै जो पराया धन खोस खोसकै अमीर हो जावै सै? कद ताहीं? हाय उसपै जो अपणा घर बन्धक की चिज्जां तै भर लेवै सै!" 7 जो तेरै तै कर्ज लेवै सैं, के वे माणस चाणचक न्ही उठैगें? अर के वे ना जागैंगे जो तन्‍नै संकट म्ह गेरैगें? 8 अर के तू उनतै लूट्या न्ही जावैगा? तन्‍नै भोत सी जात्तां ताहीं लूट लिया सै, इस करकै सारे बचे होए माणस तेरे ताहीं भी लूट लेवैंगे। इसका कारण माणसां की हत्या सै, अर वो उड़दंग भी जो तन्‍नै इस देश अर राजधानी अर इसके सारे रहण आळयां पै करया सै।

9 हाय उसपै, जो अपणे घर कै खात्तर अन्याय के फायदे का लोभ्भी सै ताके वो अपणा घोंसला ऊँच्‍ची जगहां म्ह बणाकै मुसीबत तै बचै। 10 तन्‍नै भोत सी जात्तां ताहीं काटकै अपणे घर कै खात्तर शर्म की युक्ति बाँधी, अर अपणे ए प्राण का दोषी ठहरया सै। 11 क्यूँके घर की दीवार का पत्थर दुहाई देवै सै, अर उसके छात की कड़ी उनके स्वर म्ह स्वर मिलाकै जवाब देवै सैं।

12 हाय उसपै जो हत्या करकै नगर नै बणावै, अर कुटिलता करकै शहर नै मजबूत करै सै। 13 देक्खो, के सेनाओं के यहोवा की और तै यो न्ही होन्दा के देश-देश के माणस मेहनत तो करै सैं पर वे आग का निवाळा होवैं सैं; अर राज्य-राज्य के माणसां की मेहनत बेकार ए ठहरै सै? 14 क्यूँके धरती यहोवा की महिमा के ज्ञान तै इसी भर ज्यागी* जिस तरियां समुन्दर पाणी तै भर ज्यावै सै।

15 हाय उसपै, जो अपणे पड़ोसी नै शराब पिलावै, अर उस म्ह जहर मिलाकै उस ताहीं मतवाळा कर देवै सै के उसनै नंगा देक्खै। 16 तू महिमा कै बदले बेजती ए तै भरग्या सै। तू भी पी, अर अपणे आप नै बिना खतना के साबित कर! जो कटोरा यहोवा के सोळे हाथ म्ह रहवै सै, वो घूमकै तेरी और भी जावैगा, अर तेरा वैभव तेरी उल्टी तै अशुद्ध हो जावैगा। 17 क्यूँके लबानोन* म्ह तेरा करया होया उड़दंग अर ओड़ै के जंगळी-पशुआं पै तेरा करया होया उत्पात, जिनतै वे डरगे थे, सिर्फ तेरे पैए आण पड़ैगें। यो माणसां की हत्या अर उस उत्पात के कारण होवैगा, जो इस देश अर राजधानी अर इसके सारे रहण आळयां पै करया गया सै।

18 खुदी होई मूरत म्ह के फायदा देखकै* बणाण आळे नै उस ताहीं खोद्या सै? फेर झूठ सिखाण आळी अर ढळी होई मूरत म्ह के लाभ देखकै ढाळण आळे नै उसपै इतणा भरोस्सा राख्या सै के ना बोलण आळी अर निकम्मी मूरत बणावै?* 19 हाय उसपै जो काठ तै कहवै सै, जाग, या अणबोल पत्थर* तै, उठ! के वो सिखावैगा? देक्खो, वो सोन्‍ने-चाँदी म्ह मढ़यां होया सै, लेकिन उस म्ह साँस न्ही सै।*

20 पर यहोवा अपणे पवित्र मन्दर म्ह सै; सारी पृथ्वी उसकै स्याम्ही शान्त रहवै।