1 सेनाओं* के यहोवा नै उत्तर दिया, "देक्खो, मै अपणे दूत नै भेज्जू सूं, अर वो मेरै आगै के राह नै सुधारैगा, अर प्रभु, जिसनै थम टोह्वो सो, वो चाणचक अपणे मन्दर म्ह आ जावैगा; हाँ करार का वो दूत, जिसनै थम चाहो सो, सुणो, वो आवै सै, सेनाओं के यहोवा का योए वचन सै।" 2 लेकिन उसके आण के दिन नै कौण सह सकैगा? अर जिब वो दिखाई दे, फेर कौण खड्या रह सकैगा? क्यूँके वो सुनार की आग अर धोब्बी के साबण की तरियां सै।

3 वो रूपे का त्याण आळा अर शुद्ध करण आळा बणैगा, अर लेवियाँ नै शुद्ध करैगा अर उननै सोन्‍ने रूपे की तरियां निर्मल करैगा, फेर वे यहोवा की भेंट धार्मिकता तै चढ़ावैंगे। 4 फेर यहूदा अर यरुशलेम के रहण आळा की भेंट यहोवा नै इसी भावैंगी, जिसी पैहले दिनां म्ह अर पुराणे बखत म्ह भावैं थी।

5 "फेर मै न्याय करण नै थारे धोरै आऊँगा; अर टुण्यां, अर व्यभिचारियाँ, अर झूठ्ठी कसम खाण आळयां कै खिलाफ, अर जो मजदूर की मजदूरी नै दबावै, अर बिधवा अर अनाथां पै अंधेर करैं, अर परदेशी का न्याय बिगाड़ै, अर मेरा भय न्ही मान्दे, उन सारया कै खिलाफ मै जिब्बे गवाही देऊँगा," सेनाओं के यहोवा का योए वचन सै।

6 "क्यूँके मै यहोवा बदलदा न्ही*; इस्से कारण, हे याकूब की औलाद थम नाश न्ही होए। 7 अपणे पुरखां के दिनां तै थम मेरे नियम-कायदे तै हटदे आए सो, अर उन ताहीं मान्दे न्ही। थम मेरी ओड़ मुड़ो, फेर मै भी थारी और मुड़ूँगा,"* सेनाओं के यहोवा का योए वचन सै; पर थम पूच्छो सो, "हम किस बात म्ह मुड़ा जिब हम कदे तेरे तै दूर ए न्ही होए?"

8 मै* तेरे तै न्यू पूछूँ सूं के माणस परमेसवर नै धोखा दे सकै सै? देक्खो, थम मेरे ताहीं धोखा देओ सो, अर फेर भी पूच्छो सो "हमनै किस बात म्ह तेरे ताहीं लूट्या सै?" दशमांश अर ठाणे की भेंटा म्ह। 9 थारे पै भारी श्राप पड़या सै, क्यूँके थम मेरे ताहीं लुट्टो सो; बलके सारी जात इसा करै सै। 10 सारे दशमांश भण्डार म्ह ले आओ के मेरे भवन म्ह भोजन की चीज रहवै; अर सेनाओं का यहोवा न्यू कहवै सै, के इसा करकै मेरे ताहीं परखो के मै अकास के झरोखे थारे खात्तर खोलकै थारे उप्पर अपरम्‍पार आशीष की बारिस करुँ सूं के न्ही। 11 मै थारे खात्तर नाश करण आळे नै इसा झिड़कूंगा* के वो थारी धरती की उपज नाश न्ही करैगा, अर थारी दाखलता के फळ कच्‍चे ना गिरैंगे, सेनाओं के यहोवा का योए वचन सै।

12 फेर देशां के लोग थमनै धन्य कहवैंगे, क्यूँके थारा देश मनोहर देश होवैगा, सेनाओं के यहोवा का योए वचन सै।

13 "यहोवा न्यू कहवै सै, थमनै मेरे खिलाफ ढिठाई की बात कही सै। पर थम पूच्छो सो, ‘हमनै तेरै खिलाफ म्ह के कह्या सै?’ 14 थमनै कह्या सै ‘परमेसवर की सेवा करणी बेकार सै। हमनै जो उसके बताए होए काम्मां ताहीं पूरा करया अर सेनाओं के यहोवा के डर के मारे शोक का पहरावा पैहरे होए चाल्‍ले सां, इसतै के फायदा होया? 15 इब तै हम घमण्डी माणसां नै धन्य कहवां सां; क्यूँके दुराचारी तो सफल बणगे सै, बलके सारे देशां के लोग परमेसवर की परीक्षा करण पै भी बचगे सै।’"

16 फेर यहोवा का भय मान्‍नण आळयां नै आप्पस म्ह बात करी, अर यहोवा ध्यान धरकै उनकी सुणै था; अर जो यहोवा का भय मान्दे अर उसके नाम का सम्मान करया करैं थे, उनकी यादगारी कै मुताबिक उसकै स्याम्ही एक किताब लिखी जावै थी। 17 सेनाओं का यहोवा न्यू कहवै सै, "जो दिन मन्‍नै ठहराणा सै, उस दिन वे माणस मेरे बलके मेरे खास भाग ठहरैगें, अर मै उनतै इसी कोमलता करुँगा जिसी कोए अपणे सेवा करण आळे बेट्टे तै करै। 18 फेर थम मुड़कै धर्मी अर दुष्ट का भेद, यानिके जो परमेसवर की सेवा करै सै, अर जो उसकी सेवा न्ही करदा, उन दोनुआं का भेद पिच्छाण सकोगे।"