1 मलाकी नबी के जरिये इस्राएल लोगां के खात्तर कह्या होया यहोवा का भारी वचन।

2 यहोवा न्यू कहवै सै, "मन्‍नै थारे तै प्यार करया सै, पर थम पूच्छो सो, ‘तन्‍नै म्हारे तै किस तरियां प्यार करया सै?’" यहोवा की या वाणी सै, "के एसाव याकूब का भाई न्ही था?* 3 तोभी मन्‍नै याकूब तै प्यार करया लेकिन एसाव ताहीं प्यारा न्ही जाणकै उसके पहाड़ां ताहीं उजाड़ डाल्या, अर उसकी बुजुर्गां की धरती ताहीं जंगळ के गादड़ां की कर दिया सै।" 4 एसाव के वंशज एदोम कहवै सै, "म्हारा देश उजड़ ग्या सै, लेकिन हम खण्डहरां नै फेर बणावांगें;" सेनाओं का यहोवा न्यू कहवै सै, "जै वे बणावै भी, पर मै गेर दियुँगा; उनका नाम दुष्ट जात्ति पड़ैगा, अर वे इसे माणस कुह्वावैगें जिनपै यहोवा सदा छो म्ह रहवै।" 5 थम इस्राएल के लोग थारी आँख इसनै देखैंगी, अर थम कहोगे, "यहोवा का प्रताप इस्राएल की हद तै भी आगै बढ़दा जावै।"

6 यहोवा याजक तै न्यू कहवै सै, "बेट्टा बाप का, अर दास माल्‍लिक का आदर करै सै। जै मै पिता सूं, तो मेरा आदर मानणा कित्त सै? अर जै मै माल्‍लिक सूं, तो मेरा भय मानणा कित्त? सेनाओं का यहोवा, थम सब याजकां तै भी जो मेरे नाम की बेजती करो हो याए बात पूच्छै सै। पर थम पूच्छो सो, ‘हमनै किस बात म्ह तेरे नाम की बेजती करी सै?’ 7 थम मेरी वेदी पै अशुद्ध भोजन चढ़ाओ सो। फेर भी थम पूच्छो सो, ‘हम किस बात म्ह तेरे ताहीं अशुद्ध ठहरावां सां?’ इस बात म्ह भी, के थम कहो सो, ‘यहोवा की मेज निकम्मी सै।’ 8 जिब थारे आन्धे पशु ताहीं बलि करण कै खात्तर धोरै ले आओ हो तो के यो बुरा न्ही? अर जिब थारे लंगड़े या रोगी पशु ताहीं ले आओ हो, तो के यो बुरा न्ही? अपणे बड़े हाकिम कै धोरै इसी भेंट ले जाओ; के वो थारे तै खुश होवैगा या थारे पै अनुग्रह करैगा? सेनाओं के यहोवा का योए वचन सै।"

9 "इब मै थारे तै कहूँ सूं, परमेसवर तै प्रार्थना करो के वो हम माणसां पै अनुग्रह करै। यो थारे हाथ तै होया सै; फेर के थम समझो सो के परमेसवर थारे म्ह तै किसे का पक्ष करैगा? सेनाओं के यहोवा का योए वचन सै।" 10 भला होन्दा के थारे म्ह तै कोए मन्दर के किवाड़ां नै बन्द करदा के थम मेरी वेदी पै बेकार म्ह आग जळाण ना पान्दे! सेनाओं के यहोवा का यो वचन सै, मै थारे तै कदे भी खुश न्ही सूं, अर ना थारे हाथ तै भेंट ग्रहण करुँगा। 11 क्यूँके उदयाचल तै लेकै अस्ताचल ताहीं गैर जातियाँ म्ह मेरा नाम महान सै, अर हर जगहां मेरे नाम पै धूप अर शुद्ध भेंट चढ़ाई जावैं सै; क्यूँके गैर जातियाँ म्ह मेरा नाम महान सै, सेनाओं के यहोवा का योए वचन सै। 12 लेकिन थम उस ताहीं न्यू कहकै अपवित्र ठहराओ सो के यहोवा की मेज अशुद्ध सै, अर जो भोजन की चीज उसपै तै मिलै सै वो भी निकम्मी सै। 13 फेर थम यो भी कहो सो, "यो किसा बड़ा उड़दंग सै*!" सेनाओं के यहोवा का यो वचन सै। थमनै उस भोजन की चीज कै प्रति नाक सिकोड़ी, अर अत्याचार तै पाए होए अर लंगड़े अर रोगी पशु की भेंट ले आए सो! के मै इसी भेंट थारे हाथ तै ग्रहण करुँ? यहोवा का योए वचन सै। 14 जिस छल कपट करण आळे के रेवड़ म्ह नर पशु हो पर वो मन्‍नत मानकै परमेसवर ताहीं मना करे होए पशु चढ़ावै, वो श्रापित सै; मै तो महाराजा सूं*, अर मेरा नाम गैर जातियाँ म्ह भययोग्य सै, सेनाओं के यहोवा का योए वचन सै।