1 सुणो, यहोवा का एक इसा न्याय का दिन आणआळा सै* जिस म्ह यरुशलेम का धन लूट कै तेरे बिचाळै बाँट लिया जावैगा। 2 क्यूँके मै सब जात्तां नै यरुशलेम तै लड़ण कै खात्तर कठ्ठा करुँगा, अर वो नगर ले लिया जावैगा। अर घर लूटे जावैंगे अर जनानियाँ भ्रष्ट करी जावैंगी; नगर के आध्धे माणस गुलाम्मी म्ह जावैंगे, लेकिन प्रजा के बाकी माणस नगर म्ह ए रहण पावैगें। 3 फेर यहोवा लिकड़कै उन जात्तां तै इसा लड़ैगा जिसा वो पिछले बखत म्ह संग्राम कै दिन म्ह लड्या था। 4 अर उस दिन वो जैतून के पहाड़ पै पैर धरैगा, जो पूर्व की और यरुशलेम कै स्याम्ही सै; फेर जैतून का पहाड़ पूरब तै लेकै पश्चिम ताहीं बीचों बीच तै पाटकै घणा बड़ा खड्डा हो जावैगा; फेर आध्धा पहाड़ उत्तर की और अर आध्धा दक्षिण की और हट जावैगा। 5 फेर थम मेरी बणाई होई उस तराई तै होकै भाग जाओगे, क्यूँके वो खड्डा आसेल ताहीं पोंहचैगा, बलके थम इसे भाज्जोगे जिसे उस भूकम्प* अर यशा. 6:4 म्ह दिया गया सै। के डर तै भाजे थे जो यहूदा के राजा उज्जियाह के दिनां म्ह होया था। फेर मेरा परमेसवर यहोवा आवैगा, अर सारे पवित्र माणस उसकै गैल होवैंगे।*

6 उस दिन कुछ उजियाळा ना रहवैगा*, क्यूँके ज्योतिगण सिमट जावैंगे। 7 अर लगातार एके दिन होवैगा जिसनै यहोवा ए जाणै सै, ना तो दिन होगा, अर ना रात होवैगी, लेकिन साँझ के बखत उजियाळा होगा।*

8 उस दिन यरुशलेम तै जीवन का पाणी फूट लिकड़ैगा उसका एक हिस्सा पूरब के ताल अर दूसरा पश्चिम के समुन्दर की और बहवैगा, अर धूप के दिनां म्ह अर सर्दी के दिनां म्ह भी बराबर बैहन्दा रहवैगा।*

9 फेर यहोवा सारी धरती का राजा होवैगा; अर उस दिन एके यहोवा अर उसका नाम भी एके मान्या जावैगा।*

10 गेबा नगर तै लेकै यरुशलेम के दक्षिण की और के रिम्मोन नगर ताहीं सारी धरती अराबा की तरियां हो जावैगी। लेकिन वो ऊँच्‍ची होकै बिन्‍यामीन के फाटक तै लेकै पैहले फाटक की जगहां ताहीं, अर कुण्यां आळे फाटक ताहीं, अर हननेल के गुम्मट तै लेकै राजा के दाखरस कुण्डा ताहीं अपणी जगहां म्ह बसैगी। 11 माणस उस म्ह बसैंगे क्यूँके फेर सत्यानाश का श्राप ना होवैगा; अर यरुशलेम बेधड़क बसी रहवैगी।* 12 अर जितनी जात्तां नै यरुशलेम तै युद्ध करया सै उन सारया नै यहोवा इसी मार तै मारैगा, के खड़े-खड़े उनका माँस सड़ जावैगा, अर उनकी आँख अपणे गोलकां म्ह सड़ जावैंगी, अर उनकी जीभ उनके मुँह म्ह सड़ जावैगी। 13 अर उस दिन यहोवा की और तै उन म्ह बड़ी घबराहट बेठ्ठैगी, अर वे एक दुसरे के हाथ नै पकड़ैगें, अर एक दुसरे पै अपणे-अपणे हाथ ठावैंगे। 14 यहूदा भी यरुशलेम म्ह लड़ैगा, अर सोन्‍ना, चाँदी, कपड़े वगैराह च्यांरु और की सारी जात्तां की जायदाद उस म्ह बटोळी जावैगी। 15 अर घोड़े, खच्‍चर, ऊँट अर गधे बलके जितने पशु उनकी छावनियाँ म्ह होवैंगे वे भी इसे महामारी तै मारे जावैंगे।

16 फेर जितने माणस यरुशलेम पै चढ़ण आळी सारी जातियाँ म्ह तै बचे रहवैंगे, वे हर साल राजा नै यानिके सेनाओं के यहोवा नै दण्डवत करण, अर झोपड़ियां का त्यौहार मनाण कै खात्तर यरुशलेम नै जाया करैंगे। 17 अर धरती के कुलां म्ह तै जो माणस यरुशलेम म्ह राजा, यानिके सेनाओं के यहोवा नै दण्डवत करण कै खात्तर ना जावैंगे, उनके ओड़ै बारिस न्ही होवैगी*। 18 अर जै मिस्र का कुल ओड़ै ना आवै, तो के उनपै वो मरी ना पड़ैगी जिसतै यहोवा उन जातियाँ नै मारैगा जो झोपड़ियां का त्यौहार मनाण कै खात्तर ना जावैंगे?

19 यो मिस्र का अर उन सारी जातियाँ का पाप ठहरैगा, जो झोपड़ियां का त्यौहार मनाण कै खात्तर न्ही जावैंगे। 20 उस बखत घोड़यां की घंटियाँ पै भी यो लिख्या रहवैगा, "यहोवा कै खात्तर पवित्र।" अर यहोवा के भवन की हाण्डी उन कटोरयां कै लायक पवित्र ठहरैगी, जो वेदी कै स्याम्ही रहवैं सैं। 21 बलके यरुशलेम म्ह अर यहूदा देश म्ह सारी खाणा बणाण आळी हाण्डी सेनाओं के यहोवा कै खात्तर पवित्र ठहरैगी, अर सारे मेलबलि करण आळे आ आकै उन हाँड़ियाँ म्ह माँस पकाया करैंगे। फेर सेनाओं के यहोवा के भवन म्ह फेर कनानी व्यापारी ना पाया जावैगा।