1 हे लबानोन, आग नै रास्ता दे के वा आकै तेरे देवदारां नै भस्म करै! 2 हे सनोवर के दरखतों, हाय, हाय, करो! क्यूँके देवदार गिर ग्या सै अर बड़े तै बड़ै दरखत नाश होगे सैं! हे बाशान के बांज दरखतों, हाय, हाय, करो! क्यूँके अगम्य वन काट्या गया सै! 3 पाळीयाँ के हाहाकार का शब्द सुणाई दे रहया सै, क्यूँके उनका वैभव नाश होग्या सै! जवान शेरां का गरजणा सुणाई देवै सै, क्यूँके यरदन घाटी कै किनारे का घणा बण नाश करया गया सै!

4 मेरे परमेसवर यहोवा नै यो हुकम दिया: "घात होण आळी भेड़-बकरियाँ का चरवाहा हो ज्या। 5 उनके मोल लेण आळे उननै घात करण पै भी अपणे नै दोषी न्ही जाणदे, अर उनके बेचण आळे कहवैं सैं, ‘यहोवा धन्य सै, हम अमीर होगे सां;’ अर उनके पाळी उनपै कुछ दया न्ही करदे। 6 यहोवा की या वाणी सै, मै इस यहूदा के राज के रहण आळयां पै फेर दया न्ही करुँगा*। देक्खो, मै माणसां नै एक दुसरे के हाथ म्ह, अर उनके राजा के हाथ म्ह पकड़वा दियुँगा; अर वे इस देश नै नाश करैंगे, अर मै उसके रहण आळयां नै उनके बस तै ना छुड़ाऊँगा।"

7 इस करकै मै घात होण आळी भेड़-बकरियाँ नै अर खास करकै उन म्ह तै जो दीन थी उननै चराण लाग्या। अर मन्‍नै दो लाठ्ठी ली; एक का नाम मन्‍नै अनुग्रह धरया, अर दुसरी का नाम एकता। इन ताहीं लिए होए मै उन भेड़-बकरियाँ नै चराण लाग्या। 8 मन्‍नै उनके तीन्‍नु बुरे पाळीयाँ ताहीं एक महिन्‍ने म्ह नाश कर दिया, लेकिन मै उनके कारण अधीर था, अर वे मेरे तै घृणा करैं थी। 9 फेर मन्‍नै उनतै कह्या, "मै थमनै ना चराऊँगा*। थारे म्ह तै जो मरै वो मरै, अर जो नाश हो वो नाश हो, अर जो बची रहवैं वे एक दुसरे का माँस खावैं।" 10 अर मन्‍नै अपणी वो लाठ्ठी तोड़ गेरी, जिसका नाम अनुग्रह था, के जो करार मन्‍नै सारी गैर जातियाँ कै गैल करया था उसनै तोड़ूँ। 11 वो उसे दिन ताेड़या गया, अर इसतै दीन भेड़-बकरियाँ जो मेरे ताहीं देक्खैं थी, उननै जाण लिया के यो यहोवा का वचन सै। 12 फेर मन्‍नै उनतै कह्या, "जै थारे ताहीं आच्छा लाग्गै तो मेरी मजदूरी द्यो, अर न्ही तो ना द्यो।" फेर उननै मेरी मजदूरी म्ह चाँदी के तीस टुकड़े तौल दिए।* 13 फेर यहोवा नै मेरे ताहीं कह्या, "इननै कुम्हार कै आगै फेंक दे," यो कितना भारी दाम सै जो उननै मेरा ठहराया सै? फेर मन्‍नै चाँदी के उन तीस टुकड्यां* ताहीं लेकै यहोवा के घर म्ह कुम्हार कै आगै फेंक दिया।* 14 फेर मन्‍नै अपणी दुसरी लाठ्ठी जिसका नाम एकता था, इस करकै तोड़ गेरी के मै उस भाईचारे के नात्ते नै तोड़ गेरूं जो यहूदा अर इस्राएल कै बीच म्ह सै।

15 फेर यहोवा नै मेरे ताहीं कह्या, "इब तू मूर्ख पाळी के हथियार ले ले। 16 क्यूँके मै इस देश म्ह* एक इसा पाळी ठहराऊँगा, जो खुई होई नै ना टोहवैगा, ना आस्सै-पास्सै तै कठ्ठी करैगा, ना घायलां नै चंगा करैगा, ना जो भली चंगी सै उनका पालन-पोषण करैगा, बलके मोटियां का माँस खावैगा अर उनके खुरां नै पाड़ गेरैगा। 17 हाय उस निकम्मे पाळी पै जो भेड़-बकरियाँ नै छोड़ जावै सै! उसकी बाँह अर ओळी आँख दोनुआं पै तलवार लाग्गैगी, फेर उसकी बाँह सूख ज्यागी अर उसकी सोळी आँख फूट ज्यागी।"