1 इस्राएल कै बारै म्ह यहोवा का कह्या होया भारी वचन : यहोवा जो अकास नै ताणण आळा, धरती की नींव डालण आळा अर माणस की आत्मा का रचणआळा सै, यहोवा की या वाणी सै, 2 "देक्खो, मै यरुशलेम नै च्यांरु और की सारी जातियाँ कै खात्तर लड़खड़ा देण आळा नशा का कटोरा ठहरया दियुँगा; अर जिब यरुशलेम घेर लिया जावैगा फेर यहूदा की हालत भी इसीए होवैगी। 3 अर उस बखत धरती की सारी जात यरुशलेम कै खिलाफ कठ्ठी होवैंगी, फेर मै उसनै इतणा भारी पत्थर बणाऊँगा, के जो उसनै ठावैंगे वे घणेए घायल होवैंगे।* 4 यहोवा की या वाणी सै, उस बखत मै हर एक घोड़े नै घबरा देऊँगा, अर उसके सवार नै घायल करुँगा। लेकिन मै यहूदा के घरान्‍ने पै दया की नजर राखूँगा*, जिब मै गैर जातियाँ के सारे घोड़यां नै आन्धा कर दियुँगा। 5 फेर यहूदा के अधिपति सोचैगें, ‘यरुशलेम के निवासी अपणे परमेसवर, सेनाओं के यहोवा की मदद तै मेरै गैल मददगार बणैगें।’"

6 "उस बखत मै यहूदा के अधिपतियाँ नै इसा कर दियुँगा, जिसा लाकड़ी के ढेर म्ह आग भरी अँगीठी या पूळे म्ह जळदी होई मशाल होवै सै, यानिके वे सज्जे-खब्बे च्यांरु और के सारे माणसां नै भस्म कर देवैंगे; अर यरुशलेम जड़ै इब बसी सै, ओड़ैए बसी रहवैगी, यरुशलेम म्ह ए।"

7 "अर यहोवा पैहले यहूदा के तम्बूआं का उद्धार करैगा, कदे इसा ना हो के दाऊद के वंश अर यरुशलेम के निवासी अपणे-अपणे वैभव कै कारण यहूदा कै खिलाफ बड़ाई मारै। 8 उस दिन यहोवा यरुशलेम के निवासियां नै मान्‍नो ढाल तै बचा लेगा, अर उस बखत उन म्ह तै जो ठोक्‍कर खाणआळा हो वो दाऊद की तरियां होवैगा; अर दाऊद का घरान्‍नां परमेसवर की तरियां होवैगा, यानिके यहोवा के उस दूत की तरियां जो उनकै आगै-आगै चाल्‍लै था। 9 उस दिन मै उन सब जात्तां का नाश करण की योजना करुँगा जो यरुशलेम पै चढ़ाई करैंगी।"

10 "मै दाऊद के कुण्बे अर यरुशलेम के माणसां पै अपणा अनुग्रह करण आळी अर प्रार्थना सिखाण आळी आत्मा उण्डेलूँगा, फेर वे मेरे ताहीं ताकैगें यानिके जिसनै उन ताहीं बेध्या सै, अर उसकै खात्तर इसे रोवैंगे जिसे एकलौते बेट्टे कै खात्तर रोवैं-पिट्टैं सैं, अर इसा भारी शोक करैंगे, जिसा जेठ्ठे कै खात्तर करदे हों। 11 उस बखत यरुशलेम म्ह इतणा रोणा-पीटणा होवैगा जिसा मगिद्दोन की तराई म्ह हदद्रिम्मोन म्ह होया था।* 12 सारे देश म्ह विलाप होगा, हर एक परिवार म्ह अलग-अलग; यानिके दाऊद के घरान्‍ने का परिवार अलग, अर उनकी बिरबानियाँ अलग; नातान के घरान्‍ने का परिवार अलग, अर उनकी बिरबानियाँ अलग; 13 लेवी के घरान्‍ने का परिवार अलग अर उनकी बिरबानियाँ अलग; शिमियाँ का परिवार अलग; अर उनकी बिरबानियाँ अलग; 14 अर जितने परिवार रहगे हों हर एक परिवार अलग - अलग अर उनकी बिरबानियाँ भी अलग-अलग।"