1 "उसे दिन दाऊद के कुण्बे अर यरुशलेम के माणसां कै खात्तर पाप अर मलिनता धोण कै खात्तर एक बैहन्दा होया सोता फूटैगा।"

2 "सेनाओं के यहोवा की या वाणी सै, के उस बखत मै इस देश म्ह तै मूरतां के नाम मिटा दियुँगा*, अर वे फेर याद न्ही रहवैंगी; अर मै नबियाँ अर अशुद्ध आत्मा नै इस देश म्ह तै लिकाड़ देऊँगा। 3 अर जै कोए फेर भविष्यवाणी करै, तो उसके माता-पिता, जिनतै वो पैदा होया, उसतै कहवैंगे, ‘तू जिन्दा ना बचैगा, क्यूँके तन्‍नै यहोवा के नाम तै झूठ कह्या सै;’ इस करकै जिब वो भविष्यवाणी करै, फेर उसके माता-पिता जिनतै वो पैदा होया उसनै बेध डाल्‍लैगें। 4 उस बखत हर एक भविष्यवक्ता भविष्यवाणी करदे होए अपणे-अपणे दर्शन तै लज्जित होवैंगे, अर धोक्खा देण कै खात्तर काम्बळ के कपड़े* ना पहैरेंगे, 5 लेकिन वो कहवैगा, ‘मै उन झूठ्ठे भविष्यवक्ता म्ह तै न्ही, किसान सूं; क्यूँके बाळकपण तै ए मै दुसरयां का दास सूं*।’ 6 फेर जै उसतै यो पूच्छया जावै, ‘तेरी छात्ती पै ये घाव किस तरियां होए,’ फेर वो कहवैगा, ‘ये वेए सैं जो मेरे प्यार करण आळयां के घर म्ह मेरे ताहीं लाग्गे सैं।’"

7 सेनाओं के यहोवा की या वाणी सै, "हे तलवार, मेरे ठहराए होए पाळी कै खिलाफ यानिके जो माणस मेरा स्वजाति सै, उसके बिरुध्द चाल। तू उस पाळी नै काट, फेर भेड़-बकरी आस्सै-पास्सै हो जावैंगी; अर बच्यां पै मै अपणे हाथ बढ़ाऊँगा। 8 यहोवा की या भी वाणी सै, के इस देश के सारे निवासियां की दो तिहाई आबादी मार डाल्‍ली जावैंगी अर बची होई एक तिहाई उस म्ह बणी रहवैगी। 9 उस एक तिहाई नै मै आग म्ह देकै इसा निर्मल करुँगा, जिसा चाँदी ताहीं निर्मल करया जावै सै, अर इसा जाचुँगा जिसा सोन्‍ना जाँच्या जावै सै। वे मेरे तै प्रार्थना करया करैंगे*, अर मै उनकी सुणूँगा। मै उनके बारे म्ह कहूँगा, ‘ये मेरी प्रजा सैं,’ अर वे मेरे बारे म्ह कहवैंगे, ‘यहोवा म्हारा परमेसवर सै।’"*