1 "देक्खो*, वो धधकते भट्ठे के समान दिन आवै सै, जिब सब घमण्डी अर सब दुराचारी माणस अनाज की खूँटी बण जावैंगे; अर उस आणआळे दिन म्ह वे इसे भस्म हो जावैंगे के ना उनकी जड़ बचैगी अर ना उनकी डाळी, सेनाओं के यहोवा का योए वचन सै। 2 लेकिन थारे खात्तर जो मेरे नाम का भय मान्‍नो सो, धार्मिकता का सूरज उगैगा, अर उसकी किरणां के जरिये थम चंगे हो जाओगे; अर थम लिकड़कै पाळे होए बाछड़याँ की तरियां कूदोगे अर फाँदोगे। 3 फेर थम दुष्टां ताहीं लताड़ द्‍योगे, यानिके मेरे उस ठहराए होए दिन म्ह वे थारे पाँव कै तळै की राख बण जावैंगे, सेनाओं के यहोवा का योए वचन सै।"

4 "मेरे* दास मूसा के नियम-कायदे यानिके जो-जो विधि अर नियम मन्‍नै सारे इस्राएलियाँ के खात्तर उस ताहीं होरेब म्ह दिए थे, उननै याद राक्खो अर मान्‍नो।"

5 "देक्खो*, यहोवा के उस बड़े अर भयानक दिन के आण तै पैहले, मै थारे धोरै एलिय्याह नबी ताहीं भेज्जूँगा। 6 अर वो माँ-बाप के मन ताहीं उनके बेट्टयाँ की और, अर बेट्टयाँ के मन ताहीं उनके माँ-बाप की और फेरैगा; इसा ना हो के मै आकै धरती ताहीं सत्यानाश करुँ।"