मत्ती 25

बन्दड़े की बाट देखदी होई दस कुँवारियाँ का उदाहरण

1 यीशु नै अपणे चेल्यां ताहीं एक और उदाहरण देकै कह्या, "सुर्ग का राज्य उन दस कुँवारियाँ के जिसा होगा जो अपणी मशाल लेकै बन्दड़े तै फेटण लिकड़ी। 2 उन म्ह पाँच बेअक्ल अर पाँच समझदार थी। 3 बेअक्ली कुवारियाँ नै अपणी मशाल तो ली, पर अपणे गेल्या फालतू तेल न्ही लिया; 4 पर समझदारां नै अपणी मशालां कै गेल्या अपणी कुप्पियाँ म्ह तेल भी भर लिया। 5 जिब बन्दड़े कै आण म्ह वार होई, तो वे सारी ऊँघण लाग्गी अर सो गई।"

6 "आध्धी रात नै धूम माच्‍ची: ‘देक्खो, बन्दड़ा आण लागरया सै! उसतै फेटण नै चाल्‍लों।’"

7 "फेर वे सारी कुँवारियाँ उठकै अपणी मशाल ठीक करण लाग्गी। 8 अर बेअक्लियाँ नै समझदारां तै कह्या, ‘अपणे तेल म्ह तै कुछ हमनै भी द्यो, क्यूँके म्हारी मशाल बुझ्झण लागरी सै।’"

9 "पर समझदारां नै जवाब दिया, ‘कदे यो म्हारै अर थारे खात्तर पूरा ना पड़ै; भला तो योए सै के थम बेचणीयाँ कै धोरै जाकै अपणे खात्तर मोल लियाओ।’"

10 जिब वे मोल लेण नै जावै थी तो बन्दड़ा आण पोंहच्या, अर जो त्यार थी, वे उसकै गेल्या ब्याह कै घर म्ह चली गई अर बारणा मूंद दिया गया।

11 "इसकै पाच्छै वे दुसरी कुँवारियाँ भी बोहड़कै आई अर बन्दड़े तै कहण लाग्गी, ‘हे माल्‍लिक, हे माल्‍लिक, म्हारै खात्तर किवाड़ खोल दे।’"

12 "उसनै जवाब दिया, ‘मै थारे ताहीं साच्‍ची कहूँ सूं, मै थमनै कोनी जाण्दा।’"

13 इस करकै चोक्‍कने रहो, क्यूँके मेरे आण के उस दिन नै थम कोनी जाणते, ना उस घड़ी नै जिस दिन म्ह आऊँगा।