मत्ती 8

आँधी अर तूफान ताहीं शान्त करणा

23 जिब यीशु किस्ती पै चढ़या, तो उसके चेल्‍लें उसकै पाच्छै हो लिए। 24 अर देक्खो, समुन्दर म्ह एक इसा बड्ड़ा अन्धोड़ उठ्या के किस्ती झाल्‍लां तै ढक्ण लाग्गी, अर वो सोण लाग रह्या था। 25 फेर चेल्यां नै धोरै आकै उस ताहीं जगाया अर कह्या, "हे प्रभु, हमनै बचा, हम डूबके मरण आळे सां।"

26 यीशु नै उनतै कह्या, "हे बिश्वास म्ह कमजोर माणसों, क्यूँ डरो सों?" फेर उसनै उठकै आँधी अर पाणी ताहीं धमकाया, अर सब शान्त होग्या।

27 अर वे अचम्भा करकै कहण लाग्ये, "यो किसा माणस सै के आँधी अर पाणी भी उसका हुकम मान्‍नैं सै।"