रूत 3

रूत के छुटकारै का आश्वासन

1 एक दिन उसकी सास नाओमी नै उसतै कह्या, "हे मेरी बेट्टी, के मै तेरे खात्तर ठिकाणा ना टोह्ऊ के तेरा भला हो? 2 इब जिसकी दासियाँ कै गैल तू थी, के वो बोअज म्हारा रिश्तेदार न्ही सै? वो तो आज रात नै खलिहाण म्ह जौ फटकैगा। 3 तू नहाकै तेल लगा, बढ़िया कपड़े पहरकै खलिहाण म्ह जा; पर जिब ताहीं वो आदमी खा-पी ना ले जिब ताहीं अपणे-आपनै उस ताहीं ना दिखण दिये। 4 अर जिब वो लेट जावै, फेर तू उसकै लेटण की जगहां नै देख लिये; फेर भित्तर जा उसके पाँ उघाड़ कै लेट जाईये; फेर वोए तन्‍नै बतावैगा के तन्‍नै के करणा चाहिये*3:4 के तन्‍नै के करणा चाहिये रूत की या मदद माँगण की एक निशान्‍नी कै रूप म्ह था।" 5 रूत नै उसतै कह्या, "जो कुछ तू कहवै सै वो सारा मै करुँगी।" 6 फेर वा खलिहाण म्ह गई अर अपणी सास कै कहे मुताबिक ए करया। 7 जिब बोअज नै खा-पी लिया, अर उसका मन आनन्दित होया, फेर जाकै नाज कै ढेर कै एक सिरे पै लेट ग्या। फेर वा चुपचाप गई, अर उसके पाँ उघाड़ कै लेटगी। 8 आध्धी रात नै वो आदमी चौंक पड्या, अर आग्गै की ओड़ झुककै के देख्या, के मेरे पायां कै धोरै कोए बिरबान्‍नी लेट्टी सै। 9 उसनै पूच्छया, "तू कौण सै?" फेर वा बोल्‍ली, "मै तो तेरी दास्सी रूत सूं; तू अपणी दास्सी नै अपणी घरआळी होण का हक दे: क्यूँके तू ए म्हारी धरती का छुड़ाण आळा रिश्तेदार सै।" 10 उसनै कह्या, "हे मेरी बेट्टी, यहोवा की ओड़ तै तेरे पै आशीष हो; क्यूँके तन्‍नै अपणी पाच्छली प्रीति तै घणी प्रीति दिखाई सै, क्यूँके तू, के धनी, के कंगाल, किसे जवान कै पाच्छै न्ही लाग्गी। 11 इस करकै इब, हे मेरी बेट्टी, ना डरै, जो कुछ तू कहवैगी मै तेरे तै करुँगा; क्यूँके मेरे नगर के सारे माणस जाणै सैं कै तू भली जनान्‍नी सै। 12 अर सच तो सै कै मै छुड़ाण आळा रिश्तेदार सूं, फेर भी एक और सै जिसनै मेरे तै पैहले छुड़ाण का हक सै। 13 इस करकै रात भर ठैहरी रह, अर सबेरै जै वो तेरे खात्तर छुड़ाणआळे का काम करणा चावै; तो आच्छा, वोए इसा करै; पर जै वो तेरे खात्तर छुड़ाणआळे का काम करण नै खुश ना हो, तो यहोवा के जीवन की कसम मै ए वो काम करुँगा। सबेरै तक लेट्टी रह।"

14 फेर वा उसके पायां कै धोरै सबेरै तक लेट्टी रही, अर इसतै पैहले के कोए दुसरे उस ताहीं पिछाण ना सकै वा उठ्ठी; अर बोअज नै कह्या, "कोए जाणण ना पावै के खलिहाण म्ह कोए जनान्‍नी आई थी।" 15 फेर बोअज नै कह्या, "जो चाद्दर तन्‍नै ओढ़ राक्खी सै उसनै फैलाकै पकड़ ले।" अर जिब उसनै उस ताहीं पकड्या फेर उसनै छः नपुए*3:15 छः नपुए करीब 20 किलोग्राम जौ नापकै उसनै उठवा दिया; फेर वो नगर म्ह चली गई। 16 जिब रूत अपणी सास कै धोरै आई फेर उसनै पूच्छया, "हे मेरी बेट्टी, के होया?" फेर जो कुछ उस आदमी नै उसतै करया था वो सारा उसनै उस ताहीं कह सुणाया। 17 फेर उसनै कह्या, "ये छः नपुए*3:17 छः नपुए करीब 20 किलोग्राम जौ उसनै या कहकै मन्‍नै दिये, के अपणी सास कै धोरै खाल्‍ली हाथ ना जा।" 18 फेर नाओमी नै कह्या, "हे मेरी बेट्टी, जिब ताहीं तू ना जाणै के इस बात का किसा फळ लिकड़ैगा, जिब ताहीं चुपचाप बैठ्ठी रह, क्यूँके आज उस माणस नै यो काम बिना निपटाए चैन न्ही पड़ैगा।"