Rute 4

बोअज का रूत ताहीं छुड़ाणा

1 फेर बोअज बैतलहम नगर के फाटक कै धोरै जाकै बैठग्या; अर जिस छुड़ाणआळे रिश्तेदार की चर्चा बोअज नै करी थी, वो भी आ ग्या। फेर बोअज नै कह्या, "हे मित्तर, उरै आकै याड़ै बैठ ज्या;" तो वो ओड़ै जाकै बैठग्या।*4:1 वो ओड़ै जाकै बैठग्या। शहर म्ह बड़ण की जगहां कै धोरै पंचायत करण की जगहां सै स्थानीय माणस अक्सर सामाजिक अवसरां खात्तर कठ्ठा होवै सै। 2 फेर उसनै नगर के दस बूढ़े माणसां ताहीं बुलाकै कह्या, "उरैए बैठ जाओ।" वे भी बैठगे। 3 फेर वो उस छुड़ाणआळे रिश्तेदार तै कहण लाग्या, "नाओमी जो मोआब देश तै बोहड़ आई सै वो म्हारे भाई एलीमेलेक की जमीन का एक टुकड़ा बेचणा चाहवै सै। 4 ज्यांतै मन्‍नै सोच्या के या बात तन्‍नै बताकै कहूँगा, के तू उस ताहीं इन बैठ्ठे होया कै स्याम्ही अर मेरे माणसां के इन बूढ़े माणसां कै स्याम्ही मोल ले। अर जै तू उस ताहीं छुड़ाणा चाहवै, तो छुड़ा; अर जै तू छुड़ाणा ना चावै, तो मन्‍नै इसा बता दे, के मै समझ ल्यूँ; क्यूँके तन्‍नै छोड़ उस ताहीं छुड़ाण का हक और किसे ताहीं न्ही सै, अर तेरे बाद मै सूं।" उसनै कह्या, "मै उस ताहीं छुड़ाऊँगा।" 5 फेर बोअज नै कह्या, "जिब तू उस भूमि नै नाओमी कै हाथ तै मोल ले, फेर उस नै रूत मोआबिन कै हाथ तै भी जो मरे होए की जनान्‍नी सै उसतै इस इरादे तै मोल लेणा पड़ैगा, के मरे होए का नाम उसके हिस्से म्ह स्थिर कर दे।"*4:5 मरे होये रिश्तेदार की बिधवा तै ब्याह करण का रिवाज का मकसद मरे होये माणस ताहीं उत्तराधिकारी देणा था। इस तरियां, बिधवा अर इस माणस तै पैदा होया पैहला बेट्टा उस माणस का वारिस मान्या जावैगा जो मर ग्या था। जिस माणस की मौत होई उसकी भूमि अर परिवार का नाम इसी बेट्टे का होवैगा। 6 उस छुड़ाणआळे रिश्तेदार नै कह्या, "मै उस ताहीं छुड़ा न्ही सकदा, इसा ना हो के मेरा खुद का हिस्सा बिगड़ जावै। ज्यांतै मेरा छुड़ाण का हक तू ले ले, क्यूँके मै उस ताहीं छुड़ा न्ही सकदा।"

7 पुराणे बखत म्ह इस्राएल म्ह छुड़ाण अर बदलण कै बारै म्ह सारे पक्‍का करण की या प्रथा थी, के आदमी अपणी जूती तारकै दुसरे ताहीं दिया करदा। इस्राएल म्ह पक्‍का इसी रीति तै होया करदा*4:7 इसी रीति तै होया करदा जूत्ते ताहीं इस्राएल म्ह शक्ति का एक तरियां का निशान्‍नी मान्या जावै था, अर चप्पल या जूत्ते ताहीं उतारणा शक्ति या अधिकारां के आत्मसमर्पण का संकेत देवै था।। 8 ज्यांतै उस छुड़ाणआळे रिश्तेदार नै बोअज तै या कहकै; "के तू उस ताहीं मोल ले," अपणी जूती तारी। 9 फेर बोअज नै अगुवां अर सारे माणसां तै कह्या, "थम आज इस बात के गवाहां सो के जो कुछ एलीमेलेक का अर जो कुछ किल्योन अर महलोन का था, वो सारा मै नाओमी कै हाथ तै मोल लेऊँ सूं। 10 फेर महलोन की जनान्‍नी रूत मोआबिन नै भी मै अपणी घरआळी बणाण खात्तर इस इरादे तै मोल लेऊँ सूं, के मरे होए का नाम उसके खुद के हिस्से पै स्थिर करुँ, कदे इसा ना हो के मरे होए का नाम उसके भाईयाँ म्ह तै अर उसकी जगहां के फाटक तै मिट ज्या; थम आज इस बात के गवाहां ठहरे सो।" 11 फेर फाटक कै धोरै जितने माणस थे उननै अर अगुवां नै कह्या, "हम गवाह सां। या जो जनान्‍नी तेरे घर म्ह आवै सै उस ताहीं यहोवा इस्राएल के घराने की दो उपजाण आळी राहेल अर लिआ कै बराबर करै। अर तू एप्राता म्ह वीरता करै, अर बैतलहम म्ह तेरा बड़ा नाम हो*4:11 बैतलहम म्ह तेरा बड़ा नाम हो राहेल अर लिआ इस्राएलियाँ की पूर्वज थी; 12 अर जो सन्तान यहोवा इस जवान जनान्‍नी के जरिये तेरे ताहीं दे उसके कारण तै तेरा घराना पेरेस का सा हो जावै, जो तामार तै यहूदा के जरिये पैदा होया।"

बोअज अर रूत का वंश

13 फेर बोअज*4:13 बोअज पेरेस एप्रात के कुल का पूर्वज था, जिस म्ह बोअज आप ए का था। नै रूत ताहीं ब्याह लिया, अर वा उसकी घरआळी होगी; अर जिब वो उसके धोरै गया फेर यहोवा की दया तै वा गर्भवती होई, अर उसके एक छोरा होया। 14 फेर बिरबानियाँ नै नाओमी तै कह्या, "यहोवा धन्य सै, जिसनै तेरे ताहीं आज छुड़ाणआळे रिश्तेदार कै बिना न्ही छोड्या; इस्राएल म्ह इसका बड़ा नाम हो। 15 अर यो तेरे जी म्ह जी ले आणआळा अर तेरा बुढ़ापे म्ह पाळणआळा हो, क्यूँके तेरी बहू जो तेरे तै प्यार करै सै अर सात बेट्यां तै भी तेरै खात्तर बढ़कै सै उस्से का यो बेट्टा सै।" 16 फेर नाओमी नै उस बाळक ताहीं अपणी गोद म्ह लेकै उसकी दाई का काम करण लाग्गी*4:16 उसकी दाई का काम करण लाग्गी बोअज नै नाओमी ताहीं अपणे धोरै राख्या, एक दाई के रूप म्ह बाळक ताहीं गोद म्ह लेकै अर उसकी देखभाळ कर सकै।। 17 अर उसकी पड़ोसणां नै या कहकै, के "नाओमी कै एक पोत्ता पैदा होया सै", पोत्ते का नाम ओबेद धरया। यिशै का पिता अर दाऊद का दादा वोए होया।

18 पेरेस की पीढ़ी या सै, यानिके पेरेस तै हेस्रोन, 19 अर हेस्रोन तै राम, अर राम तै अम्मीनादाब, 20 अर अम्मीनादाब तै नहशोन, अर नहशोन तै सलमोन, 21 अर सलमोन तै बोअज, अर बोअज तै ओबेद, 22 अर ओबेद तै यिशै, अर यिशै तै दाऊद पैदा होया*4:22 अर यिशै तै दाऊद पैदा होया यो दाऊद बाद म्ह इस्राएल का खास राजा दाऊद होया ।