1 पुराणे जमाने रे परमेशरे बाप-दादेया साथे कई बार लग-लग तरीके ते भविष्यबक्तेया रे जरिए गल्ला कित्तिया। 2 पर इना आखरी दिना रे परमेशरे आसा साथे पुत्रो रे जरिए गल्ला कित्तिया। परमेशरे आपणे पुत्रो रे जरिए ई सारी दुनिया रची और सेई सारी चीजा रा बारस ठराया। 3 पाऊ ई परमेशरो री महिमा रा प्रयासा ए। से तेसरे तत्वो री छाया ए। सेई सब चीजा खे आपणी सामर्था रे वचनो साथे सम्बाल़ी राखोआ; से पापो खे तोई की स्वर्गो रे परमेशरो रे दाँणे कनारे जाई की बैठेया 4 और स्वर्गदूता ते तिथणा ई खरा ठईरेया, जितणा तिने तिना ते बड़े पदो रा बारस ऊई की खरा नाओं पाया।

5 परमेशरे कदी आपणे केसी बी स्वर्गदूतो खे ये नि बोलेया,

"तूँ मेरा पुत्र ए,

आज आँऊ ए एलान करूँआ कि तूँ मेरा पाऊ ए।"

और फेर तिने केसी बी स्वर्गदूतो खे ये नि बोलेया,

"आऊँ तेसरा पिता ऊणा

और से मेरा पाऊ ऊणा।"

6 जेबे परमेशरे आपणा आदरणीय पाऊ दुनिया रे पेजेया तो से बोलोआ,

"परमेशरो रे सारे स्वर्गदूता तेसगे माथा टेकणा।"

7 और स्वर्गदूता रे बारे रे एड़ा बोलोआ,

"परमेशर आपणे स्वर्गदूता खे अवा जेड़ा

और आपणे सेवको खे बऊत जादा सुलगी री आगी जेड़ा बणाओआ।"

8 पर पुत्रो रे बारे रे बोलोआ,

"ओ परमेशर, तेरा सिंहासन जुगो-जुगो तक रणा।

तेरे राज्य रा राजदण्ड न्याय रा राजदण्ड ए।

9 तैं तर्मो खे प्यार और पापो रे कामा साथे बैर राखेया;

इजी खे बजअ ते परमेशर, तेरे परमेशरे तेरे साथिया ते बड़ी की

खुशिया रे तेलो साथे तेरा अभिषेक कित्तेया।"

10 से आपणे पाऊए ते ये बी बोलोआ,

"ओ प्रभु! शुरूओ तेई तैं तरतिया री निऊँ राखी

और स्वर्ग तेरे आथो री कारीगिरी ए।

11 सेयो तो नाश ऊई जाणे, पर तूँ बणे रा रणा

और सेयो सब टाल्लेया जेड़े पुराणे ऊई जाणे।

12 तां सेयो पट्टुए जेड़े लपेटणे

और सेयो टाल्लेया जेड़े बदली जाणे,

पर तूँ नि बदल़णा

और तेरे सालो रा अंत नि ऊणा।"

13 और परमेशरे कदी बी केसी बी स्वर्गदूता खे ये नि बोलेया,

"तूँ मेरे दाँणे कनारे आदरणीय जगा रे बैठ,

जदुओ तक आऊँ तेरे बैरिया खे

तेरे पैरा रे थालली पीढ़ी नि बणाई देऊँ?"

14 फेर स्वर्गदूता रा क्या मकसद ए? क्या सेयो सब परमेशरो री सेवा-टईल़ करने वाल़िया आत्मा निए, जो उद्धार पाणे वाल़ेया री खातर सेवा करने खे पेजिया जाओईया?