Lucas 19

यरूशलेमो रे विजय प्रवेश

28 ये बोली की यीशु यरूशलेमो री तरफा खे आपणे चेलेया ते आगे-आगे चले। 29 जेबे सेयो जैतून नाओं रे पाह्ड़ो पाँदे बैतफगे गांव और बैतनिय्याहो गांव रे नेड़े पऊँचे, तेबे तिने आपणे चेलेया बीचा ते दो जणे ये बोली की पेजे, 30 "सामणे रे गांव रे जाओ और तेती पऊँची की एक गह्दिया रा बच्चा, जेस पाँदे कदी कोई नि बैठी रा, बाने रा तुसा खे मिलणा, तेस खोली की ल्याओ 31 और जे तुसा खे कोई पूछो कि कऊँ लगी रे खोलणे? तो बताई देणा कि प्रभुए खे एसते कुछ मतलब ए।"

32 जो पेजे थे तिने जाई की तेड़ा ई पाया, जो तिना गे बताई राखेया था। 33 जेबे सेयो गह्दे रे बच्चे खे खोलणे लगी रे थे, तेबे तेसरे मालके तिना ते पूछेया, "एस बच्चे खे कऊँ लगी रे खोलणे?" 34 तिने बोलेया, "प्रभुए खे एसते मतलब ए।" 35 सेयो तेसखे यीशुए गे लयी गे और आपणे टाल्ले तेस बच्चे पाँदे पाई की यीशु तेस पाँदे बैठीगे। 36 जेबे सेयो जाणे लगी रे थे, तेबे बऊत जणेया आपणी-आपणी चादरी बाटा रे बछाइतिया।

37 नेड़े आयी की जेबे सेयो जैतून पाह्ड़ो री टलाना रे पऊँचे, तेबे चेलेया री सारी मण्डल़ी, तिना सबी सामर्था रे कामो री बजअ ते, जो तिने देखे थे, खुश ऊई की जोरे-जोरे साथे परमेशरो री स्तुति करने लगी कि,

38 "धन्य ए से राजा, जो प्रभुए रे नाओं ते आओआ,

स्वर्गो रे शान्ति और सर्गो रे महिमा ओ।"

39 तेबे पीड़ा बीचा ते कई फरीसी यीशुए खे बोलणे लगे, "ओ गुरू! आपणे चेलेया खे बक।" 40 तिने ज्वाब दित्तेया, "आऊँ तुसा खे बोलूँआ कि जे यो लोक चुप ऊईगे, तो पात्थर चींगणे लगी जाणे।"