मरकुस 16

यीशुए रा दुबारा जिऊँदा ऊणा

1 जेबे रामो रा दिन बीती गा, तेबे मरियम मगदलिनी और याकूबो री आम्मा मरियम और सलोमिए, खुशबूदार चीजा मोले लईया, ताकि आई की तिना पाँदे मल़िए। 2 और अफ़्ते रे पईले दिने, जेबे प्याग ऊई और सूरज निकल़ेया ई था, तेबे सेयो कब्रा गे आईया। 3 और आपू बीचे बोलणे लगिया, "आसा खे कब्रा रे द्वारो पाँदो ते पात्थर केस टाणा?" 4 जेबे तिने आखी चकिया तो देखेया कि पात्थर तो कनारे टाये राए। कऊँकि से बऊत बड़ा था। 5 तेबे कब्रा रे पीतरे जाई की तिने एक जवान सफेद टाल्ले पइने रा और दाणे कनारे बैठे रा देखेया और सेयो बऊत हैरान ऊई गिया। 6 तिने तिना खे बोलेया, "डरो नि। तुसे जेस यीशु नासरिये खे, जो क्रूसो पाँदे लटकाया था, टोल़ने लगी रिया। से जिऊँदा ऊईगा रा, से एती निए देखी लो; ये सेई जगा ए जेती से राखी राखेया था। 7 पर तुसे जाओ और तिना रे चेलेया खे और पतरसो खे बोलो, ‘सेयो तुसा ते पईले गलील प्रदेशो रे पऊँची जाणे, जेड़ा तिने तुसा खे बोलेया था, तुसा से तेथी देखणा।’ " 8 तेबे सेयो कब्रा गे ते नठी गिया, कऊँकि सेयो कबराई गिया थिया और तिना दे थुरनी छूटी गी थी, तिने डरो रे मारे केसी गे कुछ नि बोलेया।

मरियम मगदलीनिया खे यीशु दिशणा

9 अफ़्ते रे पईले दिने प्यागा ई, जेबे यीशु मरे रेया बीचा ते जिऊँदे ऊए तेबे सबी ते पईले मरियम मगदलिनिया खे दिशे। पईले जेसा ते तिने सात दुष्टात्मा निकयाल़िया थिया। 10 तेसे जाई की तिना रे चेलेया गे, जो बऊत दु:खी थे और रोणे लगी रे थे, तिना गे समाचार सुणाया। 11 पर तिने मरियम मगदलीनिया री गल्ला पाँदे विश्वास नि कित्तेया कि यीशु जिऊँदे ऊईगे रे और तेसे सेयो देखे।

दुँईं चेलेया खे यीशु दिशणा

12 तिजी ते बाद यीशु दूजे रूपो रे तिना बीचा ते दुँईं जणेया खे दिशे, जेबे सेयो गांव खे जाणे लगी रे थे। 13 तिने बी जाई की ओरी खे समाचार दित्तेया, पर तिने तिना पाँदे बी विश्वास नि कित्तेया।

ग्यारा चेलेया खे यीशु दिशणा

14 बादो ते यीशु तिना ग्यारा चेलेया खे बी दिशी गे, जेबे सेयो रोटी लगी रे थे खाणे और तिना रे अविश्वासो और काठे मनो खे ल़वामा दित्तेया, कऊँकि जिने सेयो जिऊँदे ऊणे ते बाद देखे थे, तिने तिना रा विश्वास नि कित्तेया। 15 यीशुए तिना खे बोलेया, "तुसे सारी दुनिया रे जाई की सारी सृष्टिया रे लोका खे सुसमाचार प्रचार करो। 16 जेस विश्वास करना और बपतिस्मा लणा, तेसरा ई उद्धार ऊणा, पर जेस विश्वास नि करना से दोषी ठईराया जाणा। 17 और विश्वास करने वाल़ेया रे ये चिह्न् ऊणे कि तिना मेरे नाओं ते दुष्टात्मा निकयाल़निया; नई-नई पाषा बोलणिया; 18 साप चकी देणे और जे सेयो नाश करने वाल़ी चीज बी पी लओगे, तो तेबे बी तिना खे कुछ नि ऊणा, तिना बमारा पाँदे आथ राखणा और सेयो ठीक ऊई जाणे।"

यीशुए रा स्वर्गो खे जाणा

19 तिना साथे गल्ला करने ते बाद प्रभु यीशु स्वर्गो खे चकीते और सेयो परमेशरो रे दाँणे कनारे बैठे। 20 तेबे चेलेया हर जगा प्रचार कित्तेया, प्रभु तिना साथे काम करदे रए, और तिना चिह्ना साथे, जो साथे-साथे ऊणे लगी रे थे, और ये सामणे ल्याऊँदे रए कि परमेशरो रा ये सन्देश सच्चा ए। आमीन्।