1 ये सन्देश जो यहोवे मलाकिये रे जरीये इस्राएलो रे लोका ते बोलेया था,

2 परमेशर बोलोआ, "मैं सदा तुसा ते बऊत प्यार कित्तेया ए, पर तुसे पूछोए कि तैं कुणजी गल्ला दे आसा साथे प्यार करी राखेया?" परमेशरो री ये बाणी ए, "क्या एसाव याकूबो रा पाई नि ए? तो बी मैं याकूबो ते प्यार कित्तेया।" 3 पर एसावो ते आऊँ नफरत करूँआ, ओर तेसरे पाह्ड़ी देशो खे नाश करी देऊँआ, ओर तेसरी जमीना खे बणो रे गीदड़ा रे वशो दे करी देऊँआ। 4 एदोमो दे एसावो रे कुलो रे बोलोए, "आसे तो बर्बाद ऊईगे दे ए, पर आसा खण्डहर फेर बसाणे" पर सेना रा यहोवा ज्वाब देओआ, "सेयो फेर बनाणे री कोशिश करी सकोए, पर मां सेयो फेर टाल़ी देणे। तिना रे देशो खे ‘दुष्टा रा देश’ बोलेया जाणा, ओर तिना रे लोक ‘सेयो लोक जिना पाँदे यहोवा सदा गुस्सा करोआ’ बोलेया जाणा।" 5 तुसा रिया आखी ये देखणा ओर तुसा बोलणा, "यहोवा महान ए! से इस्राएलो रे बन्नेया ते बारे बी राज करोआ।"

6 एक पाऊ आपणे बाओ री इज्जत करोआ। एक दास आपणे मालको री इज्जत करोआ। जे आऊँ बाओ ए, तो माखे से इज्जत केई देणी चाईयो? जे आऊँ मालक ए, तो तुसा मेरा डर कितणा मानणा चाईयो? प्रभु, जो सबी पाँदे राज करोआ, बोलोआ, "तुसे पुरोईत माखे बेकार समजोए। पर तुसे पूछोए, आसे तूँ किंयाँ बेकार जाणेया।" 7 तुसे मेरी बेदिया पाँदे माखे अशुद्ध रोटी चढ़ाओए, तेबे बी तुसे पूछोए, "आसे कुणजी गल्ला दे ताखे अशुद्ध ठराऊँए?" तुसे ये बताईता दा ए कि तुसे प्रभुए री बेदिया खे तीतणा खास नि मानदे। 8 जेबे तुसे माखे अन्दे डांगरो खे बलि करने खे नेड़े ल्याओए, तो क्या ये गल़त नि ए? ओर जेबे तुसे लंगड़े या बमार डांगरो खे ल्याओए, तो क्या ये गल़त नि ए? आपणे राज्यपालो गे एड़ी पेंट ल्याओए, क्या से खुश ऊणा या तेस तुसा पाँदे दया करनी? सेना रे यहोवे री येई बाणी ए।

9 एबे परमेशरो ते प्रार्थना ते बिनती करो कि आसा पाँदे दया कर! पर जदुए तक तुसा एड़ी पेंट चढ़ांदे रणा, तेस तुसे किंयाँ ग्रहण करने? सेना रे यहोवे रा येई वचन ए। 10 अच्छा ऊँदा कि तुसा बीचा ते कोई मन्दरो रे दरवाजेया खे बन्द करी देंदा, ताकि ये बेकार बलिदान नि चढ़ाए जाई सको! सेना रे यहोवे रा ये वचन ए, "आऊँ तुसा ते खुश नि आ, ओर मां तुसा रे बलिदान ग्रहण नि करने।" 11 पर दूजी जातिया बीचे मेरा नाओं तड़के ते लई की सांजा तक महिमा वाल़ा ए। सारी तरतिया दे सेयो मेरे नाओं रिया तँईं खुशबू देणे वाल़ा तूप ओर शुद्ध पेंट चढ़ाओए। कऊँकि दूजी जातिया दे मेरा नाओं महान ए, सेना रे यहोवे रा येई वचन ए। 12 पर तुसे मेरे नाओं खे एड़ा मानोए जेड़े कि से पवित्र नि आ। तुसे बोलोए कि यहोवे री बेदी अशुद्ध ए। ओर तुसे तीजी पाँदे मिलणे वाल़े खाणे खे तुच्छ जाणोए। 13 सेना रा यहोवा बोलोआ, "तुसे बोलोए, यहोवे री सेवा करना बऊत कठण ए, ओर मेरी आज्ञा खे नि मानदे। जरा सोचो! चोरी कित्ते दे, अपंग ओर बमार डांगरा खे बलिया रे रूपो दे चढ़ाया करोए! क्या माखे तुसा ते एड़ी पेंट लणी चाईयो?" यहोवा पूछोआ। 14 स्रापित ए एड़ा तोखा देणे वाल़ा माणूं, जो आपणी पेडा बीचा ते एक सबी ते बढ़िया खाडूए खे देणे री प्रतिज्ञा करोआ, पर यहोवे खे एक नकम्मा खाड्डू चढ़ाओआ। कऊँकि सेना रे यहोवे री ये बाणी ए, कि आऊँ महान राजा ए, ओर सबी जातिया रे लोक मेरा आदर करोए।