Mateus 21

यरूशलेमो रे विजय प्रवेश

1 जेबे सेयो यरूशलेम नगरो रे नेड़े पऊँची की जैतून पाह्ड़ो पाँदे बैतफगे गांव रे नेड़े आए, तेबे यीशुए आपणे दो चेले ये बोली की पेजे 2 "आपणे सामणे रे गांव रे जाओ, तेती पऊँछदे ई तुसा खे एक गह्दी बानी री मिलणी और तेसा साथे एक बच्चा तुसा खे मिलणा, तिना खे खोली की मांगे ली आओ। 3 जे तुसा खे कोई कुछ बोलोगा, तेबे तिना खे बोलणा कि प्रभुए खे इना ते कुछ मतलब ए, तेबे तिना तेबुई से पेजी देणे।" 4 ये तेबे ऊआ ताकि जो वचन भविष्यबक्ते बोलेया था, से पूरा ओ;

5 "सिय्योनो री बेटिया खे बोलो,

‘देख, तेरा राजा तांगे आओआ,

से नम्र ए और गह्दे पाँदे बैठी रा,

बल्कि लादूओ रे बच्चे पाँदे।’ "

6 चेलेया जाई की जिंयाँ यीशुए बोलेया था तिंयाँ ई कित्तेया। 7 गह्दिया और बच्चे खे ल्याई की तिना पाँदे आपणे टाल्ले पाए और यीशु तिना पाँदे बैठीगे। 8 तेबे बऊत जणेया आपणी-आपणी चादरी बाटा रे बछाइतिया और कईए खजूरो रिया डाल़िया बाडी-बाडी की तिना रे स्वागतो खे की बछाइतिया। 9 जो पीड़ आगे-आगे और पीछे-पीछे चली री थी, से आक्का पाई-पाई की बोलणे लगी री थी,

"दाऊदो री ल्वादा खे होशन्ना;

धन्य ए से, जो प्रभुए रे नाओं ते आओआ, स्वर्गो रे होशन्ना।"

10 जेबे सेयो यरूशलेमो नगरो रे पऊँचे, तो सारे नगरो रे अलचल ऊईगी और लोक बोलणे लगे, "ये कुण ए?" 11 लोके बोलेया, "ये गलीलो रे नासरतो रा भविष्यबक्ता यीशु ए।"