1 ओ यहूदा रे लोको, जो आपणे बुरेया कामा ते नि शर्मांदे, कट्ठे ऊई जाओ! 2 परमेशरो रा न्याय आऊणे ते पईले कट्ठे ऊई जाओ। परमेशरो रे न्याय रा दिन अवा रे ड्वाए दे पूए जेड़ा उडी जाणा। छोड़ ई प्रभुए रा महान गुस्सा तुसारे खलाफ आऊणा। तेसरे गुस्से रा दिन तुसारे खलाफ आऊणा। 3 ओ तरतिया रे सब शरीफ लोको, ओ परमेशरो रे बिधानो खे मानणे वाल़ेयो, तेसखे टोल़दे रओ, तर्मो साथे टोल़ो, नम्र ऊई की टोल़ो, जे तुसे एड़ा करोगे तो परमेशरो रे न्याय रे दिने तेस तुसा री रक्षा करनी। 4 कऊँकि गाजा शईर ओर अश्कलोन शईर उजाड़ ऊई जाणे, अशदोद शईरो दे रणे वाल़े दिने-दपईरे निकयाल़ी देणे ओर एक्रोन शईर पट्टी देणा।

5 समुद्रो रे कनारे रणे वाल़ेया पाँदे लाणत ए, करेती जातिया पाँदे लाणत ए, ओ कनान, ओ पलिश्तिया रे देश, परमेशरो रा वचन तेरे खलाफ बोलणे लगी रा ए ओर मां तूँ एड़ा नाश करना कि तांदे कोई नि बचणा। 6 तेस समुद्रो रे कनारे ई ग्वाल़ेया रे कअर ऊणे ओर पेडा रिया गवाईणी समेत चराईया ई चराईया ऊणिया। 7 मतलब सेई समुद्रो रा कनारा यहूदा रे कराने रे बचे रे लोका खे मिलणा, तेती तिना खे काओ रे मदान मिलणे। तिना अश्कलोनो रे कअरा पाँदे कब्जा करी लणा ओर तिना दे रणे। तिना रे परमेशरो तिना री देखपाल़ करनी। तेस तिना खे फेर सफल ऊणे रा आर्शीवाद देणा।

8 सेना रा यहोवा, इस्राएलो रा परमेशर बोलोआ, "आऊँ जाणूंआ कि मोआब ओर अम्मोनिये लोके क्या कित्तेया! तिने लोके आसा रे लोका री बेज्जती कित्ती। तिने लोके आपणे देशो खे ओर जादा बढ़ाणे खे तिना री जमीन लई।" 9 इजी बजा ते इस्राएलो रा परमेशर, सेना रे परमेशर यहोवे री ये बाणी ए, "मेरी जिन्दगिया री कसम, पक्का मोआब ओर अम्मोन नाश ऊई जाणे, सदोम ओर गमोरा जेड़े शईर पूरी तरआ ते नाश ऊई जाणे। तिना री जमीन चींआ रे डाल़ा, लूणो री खानी, ओर हमेशा उजाड़ रणे वाल़ी जगा बणी जाणी। मेरे लोका बीचा ते बचे रे लोका सेयो लूटी लणे ओर तिना री जमीन लई लणी।" 10 ये तिना रे कमण्डो रा बदला ऊणा, कऊँकि तिने सेना रे यहोवे री प्रजा री बेज्जती कित्ती ओर तिना रा मजाक उडाया।

11 यहोवे सेयो डराई देणे कऊँकि तेस देशो रे सब देवता नाश करी देणे। तेबे सारी दुनिया रे देश सबी आपणे-आपणे देशो दे यहोवे री आराधना करनी। 12 ओ कूशो रे लोको, तुसे बी मां आपणियां तलवारी की कायी देणे। 13 यहोवे आसा रे उत्तर-पूर्बा दे बसे दे अश्शूरो खे सजा देणी ओर नाश करी देणा। तेस इजी री राजधानी नीनवे ऊजड़ ओर बेकार करी देणी, एक एड़ी जगा जो रेगिस्तानो जेड़ी सूकी ऊणी। 14 तेबे सिर्फ बणो रे जानवरा रे चूण्ड तेस बर्बाद शईरो दे रणे। उल्लू ओर काओ तिना खम्बेया पाँदे बैठणे जो खड़े छाडीते दे ए। तिना री आवाज दवारिया ते आऊँदी सुणने लगणी। काओ द्वारा री पैड़िया पाँदे बैठणे। तिना लोका रे खाली कअरा दे काल़े पंछी बैठणे। 15 येई तेस शईरो साथे ऊणा जो आपणी तागती पाँदे इतणा परोसा करोआ ओर सोचोआ की आऊँ बचेया दा ए। सेयो बोलोए कि कोई बी दूजा शईर आसा बराबर नि ए ये पूरी तरआ ते खंडहर बणी जाणे, बणो रे जानवरा इना दे बसणा। जो कोई बी इना शईरा रिये जाणा तेस इना रा मजाक ड्वाणा ओर इना ते कृणा करनी।