1 यरूशलेम शईरो खे लाणत ए! एसरे लोक ओरी खे केसोए। सेयो परमेशरो री आज्ञा खे मानणे ते ना करोए ओर सेयो अशुद्ध ए, 2 सेयो केसी री गल्ल नि मानदे। सेयो यहोवे री चतौणिया खे नि मानदे। सेयो एस पाँदे परोसा नि करदे। सेयो आपणे परमेशरो ते मताद नि मांगदे। 3 यरूशलेमो रे परदान दहाड़ने वाल़े शेर ए। तेसरे राजा भेड़िये ए जो सांजा खे शकार करोए, जो प्यागा खे आड्डी पनि छाडदे। 4 तेसा रे भविष्यबक्ता तोखा देणे वाल़े ओर विश्वासघाती ए, तेसा रे पुरोईते पवित्र जगा अशुद्ध कित्ती ओर मूसे रे बिधानो रे खलाफ काम करी राखेया। 5 परमेशर जो तेसा बीचे ए, से तर्मी ए, तेस बुराई नि करनी, से लोका साथे न्याय करोआ। पर बुरे लोका खे आपणे कित्ते रे बुरे कामा रिया बजा ते शर्म नि आऊँदी।

6 मैं दूजी जातिया एथो तक नाश कित्तिया कि तिना रे कुणे वाल़े गुम्मट ऊजड़ी गे, मैं तिना रिया सड़का एथो तक सूनिया कित्तिया कि कोई तिना दे नि चलदा, तिना रे शईर एथो तक नाश ऊए कि तिना दे कोई माणूं बल्कि कोई बी प्राणी नि रया। 7 परमेशरे बोलेया, "एबे तां मेरा डर मानणा ओर मेरी बकणा मानणा, जेते कि तेसा दे रणे री जगा, जो ठराई राखेया तिजी रे मुताबिक नाश नि ओ। पर सेयो सारे बुरे लोक तेड़े ई बुरे काम ओर जादा करना चाओए जो तिने पईले करी राखे।" 8 इजी बजा ते परमेशरो री ये बाणी ए, "एबे तूँ तेस दिनो रा इंतजार कर, जेबे आऊँ तेरे खलाफ आपू गवा रे रूपो दे खड़ा ऊणा। मैं ये फैंसला कित्तेया ए: मां देश कट्ठे करने, मां राज्य कट्ठे करने; मां तिना पाँदे आपणा गुस्सा पड़काणा; तिना पाँदे आपणे गुस्से री आग बरसाणी। मेरे जल़नी री आगी ते सारी तरती पस्म ऊई जाणी।"

9 तेस बखते मां जातिया-जातिया री पाषा बदली देणी। मां तिना खे शुद्ध बोली प्रदान करनी। लोका मां यहोवे रा नाओं पुकारना, ओर मिली-जुली की मेरी सेवा करनी। 10 मेरे तित्तर-बित्तर ऊए दे लोक कूशो री नदिया ते पारा ते मांगे आऊणे। तिना मेरी आराधना करनी। तिना माखे पेंट ल्याऊणी। 11 तेस बखते तुसा, मेरे लोका खे एबे शर्मिंदा ऊणे री जरूरत नि ऊणी कि तुसे मेरे खलाफ बिद्रोह कित्तेया। मां सेयो सब लोक टाई देणे जो कमण्डी ए, ओर तुसा फेर मेरे पवित्र पाह्ड़ो पाँदे मेरे खलाफ बिद्रोह नि करना। 12 कऊँकि मां तां बीचे एक दीन ओर नम्र लोका रा दल बचायी की राखणा ओर तिना यहोवे रे नाओं री शरण लणी। 13 इस्राएलो रे बचे रे लोका ना तो बुराई करनी ओर ना चूठ बोलणा ओर ना तिना रे मुंए ते छलो री गल्ल निकल़नी। सेयो खाणा ओर राम करना ओर तिना खे डराणे वाल़ा कोई नि ऊणा।*

14 ओ सिय्योन, जोरे की गा, ओ इस्राएल, जयजयकार कर! ओ यरूशलेम, आपणे पूरे दिलो ते खुशी मना ओर तुसा रा मन खुशिया रे परी जाओ। 15 कऊँकि यहोवे आपणा न्याय करने वाल़ा आथ टाई लणा, ओर तेरे दुश्मणा री सेना ओरे-पोरे करी देणी। ओर इस्राएलो रे राजा यहोवे आपू तां बीचे रया करना! अन्तो दे तेरे कष्ट दूर ऊई जाणे, ओर तूँ फेर कदी बी बिपदा ते नि डरना। 16 तेस बखते यरूशलेमो खे ये बोलेया जाणा, "ओ सिय्योन डर नि, ओर कमजोर नि पड़।" 17 तेरा परमेशर यहोवा तां बीचे रओआ, से उद्धार करने दे पराक्रमी ए, से तेरी बजा ते खुश ऊणे ते मगन ऊणा, से आपणे प्यारो रिया बजा ते चुप रणा, तेस गाणा, कऊँकि से तुसा रिया तँईं बऊत खुश ए! 18 यहोवा बोलोआ, "तुसे लोक इजी री खातर उदास ओर बेज्जत थे कऊँकि तुसे आपणे तार्मिक त्योआरा दे शामिल नि ऊई सके पर मां तुसे फेर बेज्जत नि ऊणे देणे। 19 तेस बखते मां तिना सबी ते जो ताखे दु:ख देओए, अन्त करी देणा ओर मां लंगड़े ठीक करने ओर जिना री बेज्जतिया री चर्चा सारी तरतिया दे फैली री, तिना री तारीफ ओर कीर्ति सब जगा दे फैलाणी। 20 मां तेस बखते ई तुसे लई जाणे ओर तेस बखते ई तुसे कट्ठे करने ओर जेबे मां तुसा सामणे तुसा रे बन्दी लोक वापस ल्याऊणे, सबी लोका तुसा री तारीफ करनी। ये तेबे ऊणा जेबे मां तुसा रिया आखी रे सामणे तुसा रे गुलाम वापस ल्याऊणे!" यहोवे ये सब बोली राखेया।