1 Au commencement estoit la Parole, et la Parole estoit avec Dieu: et cette Parole estoit Dieu.

2 Elle estoit au commencement avec Dieu.

3 Toutes choses ont esté faites par elle: et sans elle rien de ce qui a esté fait, n'a esté fait.

4 En elle estoit la vie, et la vie estoit la lumiere des hommes.

5 Et la lumiere luit és tenebres, et les tenebres ne l'ont point comprise.

6 Il y eut un homme envoyé de Dieu, qui avoit nom Jean.

7 Il vint pour [porter] tesmoignage, à ce qu'il rendist tesmoignage de la lumiere, afin que tous creussent par lui.

8 Il n'estoit pas cette Lumiere-là, mais il [estoit envoyé] pour tesmoigner de la Lumiere.

9 Elle estoit la Lumiere veritable, qui illumine tout homme venant au monde.

10 Elle estoit au monde, et le monde a esté fait par elle: mais le monde ne l'a point connuë.

11 Il est venu chez soi: et les siens ne l'ont point receu.

12 Mais à tous ceux qui l'ont receu, il leur a donné ce droit d'estre faits enfans de Dieu, [assavoir] à ceux qui croyent en son Nom:

13 Lesquels ne sont point nez de sang, ni de la volonté de la chair, ni de la volonté de l'homme: mais ils sont nez de Dieu.

14 Et cette Parole a esté faite chair: et a habité entre nous (et nous avons contemplé sa gloire, voire une gloire comme de l'Unique [issu] du Pere) pleine de grace et de verité.