25 Or il y avoit une certaine femme travaillée d'une perte de sang [depuis] douze ans:

26 Laquelle avoit beaucoup souffert [entre les mains] de plusieurs medecins, et avoit despensé tout son bien, et n'avoit rien profité: mais plustost elle estoit allée en empirant.

27 Elle ayant ouï parler de Jesus, vint en la foule par derriere, et toucha son habillement.

28 Car elle disoit, Si seulement je touche ses habillemens, je serai guerie.

29 Et incontinent le flux de son sang s'estancha, et elle sentit en son corps, qu'elle estoit guerie de [son] fleau.

30 Et aussi-tost Jesus reconnoissant en soi-mesme la vertu qui estoit sortie de lui, se retourna vers la foule, disant, Qui a touché mes habillemens?

31 Et ses disciples lui dirent, Tu vois que la foule t'empresse, et tu dis, Qui m'a touché?

32 Mais il regardoit tout à l'entour, pour voir celle qui avoit fait cela.

33 Alors la femme craignant et tremblant, sçachant ce qui avoit esté fait en sa personne, vint et se jetta devant lui, et lui dit toute la verité.

34 Et il lui dit, Ma fille, ta foi t'a sauvée: va t'en en paix, et sois guerie de ton fleau.