1 कुरिन्थियों 11:23-26

23 ज़ै शिक्षा मीं प्रभु करां पुज़ी तै शिक्षा मीं तुसन दित्ती, कि प्रभु यीशुए ज़ैस राती तै ट्लुवाव जेव तैने रोट्टी नी। 24 ते शुक्र केरतां ट्लोड़ी, ते ज़ोवं, "कि ई रोट्टी मेरे जानी हिराती, ज़ै तुश्शे मुक्तरे लेई बलिदान की गातीए, मेरी यादी मां इन्ने केरा।" 25 ते एन्च़रे ज़ैखन तैनेईं रोट्टी खाइ, यीशुए दाछ़रो कटोरो भी नेव, ते ज़ोवं, "ई कटोरो मेरे खूने मां नंव्वो करारे, ज़ैखन भी पीथ, मेरे यादी मां इन्ने केरा।" 26 किजोकि ज़ैखन ई रोट्टी खाथ, ते इस कटोरे मरां पीथ, त प्रभुएरे मौती ज़ांतगर तै न एज्जे, इस बारे मां ज़ोते राथ।