1 अगर अवं मैन्हु, ते स्वर्गदूतां केरि भाषां केरि, ते प्यार न रेखी, त अवं ठन-ठन केरनेबाली पितल, ते झ़न-झ़न केरनेबाली झ़ाझ़ाईं। 2 ते अगर अवं भविष्यिवाणी केरि सेखी, ते सब भेद ज़ैनी, ते मीं इड़ी तगर पूरो विश्वास भोए, कि पहाड़न घिसेईं, पन प्यार न रेखी, त अवं किछ भी नईं। 3 ते अगर अवं अपनि सारी जेइदात कंगालन देईं, या अपनो जिसम फुकनेरे लेई देईं, ते प्यार न रेखी, त इन मेरे कोन्ची कम्मेरू नईं। 4 ज़ैना लोक होरन सेइं प्यार केरतन तैना सबर ते दयाई सेइं कम केरतन, तैना जलन न केरन, तैना अपनि बडीयाई न केरन, ते न घमण्ड केरन। 5 तैना होरन बेइज़्ज़त न केरन, तैना खुदगरज़ न भोन, जल्दी क्रोध न केरन ते ज़ैना बुरी गल्‍लां तैन केरे खलाफ भोइ, तैन तैना याद न केरन। ते तैन केरे खलाफ ज़ैना पाप केरतन तैना, तैन बड़े आसान तरीके सेइं माफ़ केरतन। 6 तैना खुशी न भोन ज़ैखन लोक बुरू केरतन, पन तैना तैखन खुश भोतन ज़ैखन लोक तैन केरतन ज़ैन ठीक ते सच़्च़ू। 7 तैना सब गल्‍लां झ़ैल्‍लतन, प्यार विश्वास कधी न गुवाए, ते असन परमेशरे पुड़ भरोसो केरनेरे काबल बनाते, मुशकलन ते तकलीफन मां सबर रखते।

8 भविष्यिवाणी ते गैर भाषां ते खास ज्ञान बेकार भोल्हु। पन प्यार हमेशारे लेई रालो! 9,10 किजोकि इश्शू ज्ञान ते इश्शी भविष्यिवाणी केरनेरी काबलीत अध्धीए, पन ज़ैखन सिद्ध एज्जेलो, त ज़ैन अधूरूए तैसेरी ज़रूरत नईं। 11 इन मैन्हेरे बेडोनेरू ज़ेरूए। ज़ैखन अवं बच्‍चो थियो, त बच्‍चां केरो ज़ेरो गल्‍लां केरतो थियो ते सोचतो ते समझ़तो थियो। पन ज़ैखन अस बड्डे भोतम, त बच्‍चां केरि गल्‍लां शारतम। 12 एन्च़रे असन सेइं भी आहे ज़ैना अस विश्वास केरतम, किजोकि अस तैस मैन्हेरे ज़ेरे आम ज़ै खराब शीशे मां शकल हेरते, (किजोकि अस सब किछ रोड़े च़ारे न ज़ानम) सिर्फ एजने बाले वक्ते मां, अस सब किछ समझ़मेले, एल्हेरेलेइ असेईं परमेशर आमने सामने हेरनोए। हुना मेरू ज्ञान पूरू नईं। पन तैस एजने बाले वक्ते मां (ज़ैखन तै दिहाड़ी एज्जेली) रोड़ेच़ारे ज़ैनेलो, परमेशर भी मीं ज़ानेलो। 13 लिहाज़ा, हुनी, ट्लाई किसमां केरि चीज़न ज़ैना असेईं ज़रूरी केरनिन, परमेशरे पुड़ विश्वास, परमेशरेरे वाधन पुड़ उमीद, ते परमेशर ते होरन सेइं प्यार। पन इन ट्लाई गल्‍लन मां ज़ै महाने, तै ईए: परमेशरे ते होरन सेइं प्यार केरन।