आत्मिक वरदानां
1 हे मेरे ढ्लाव ते बेइनव, हुनी तुश्शे तैस सवालेरे बारे मां ज़ै तुसेईं पवित्र आत्मारे वरदानां केरे बारे मां पुछ़ो, अवं चाताईं तुस रोड़े च़ारे समझ़ा। 2 तुस ज़ानतथ, कि तुस विश्वास केरने करां पेइले ज़ेन्च़रे ज़ीते थिये तुसन पुड़ भूतां केरो अस्सर भोतो थियो, कि तुस मूरती केरि पूज़ा केरथ, ज़ैना ज़ींती न भोन। 3 एल्हेरेलेइ अवं चाताईं तुस ज़ानथ, कि ज़ै कोई परमेशरेरे आत्मारे ज़ुवाने सेइं ज़ोते, तै न ज़ोए, कि यीशु लानतीए, सिर्फ अक्के पवित्र आत्माए, ज़ै इस काबल बनाते, कि कोई भी इन ज़ोई सकते कि "यीशु प्रभुए।"
4 वरदानां त बड़े किसमां केरन, पन इना सब परमेशरेरो आत्मा देते। 5 अस बड़े किसमां केरू कम परमेशरेरे लेई केरतम, पन अस तैस्से एक्की प्रभुएरी सेवा केरतम। 6 परमेशर इश्शे ज़िन्दगी मां अलग-अलग किसमे सेइं कम केरते, पन तैए परमेशर ज़ै असन सेब्भन तैसेरेलेइ कम केरनेरी काबलीत देते। 7 असन सेब्भन अक एरी काबलीत दित्तोरीए, ज़ैस सेइं पवित्र आत्मारी हज़ूरी साबत भोती, ताके अस अपने सैथी विश्वासी लोकां केरि मद्दत केरम।