1 हे ढ्लाव ते बेइनव, अवं तुसन तैए खुशखबरी याद कराताईं ज़ै मीं तुसन शुनेवरी थी, ते ज़ैस सन्देशे पुड़ तुसेईं विश्वास कियोरो थियो, ते ज़ैस पुड़ तुस तुसेईं लगातार भरोसो रखोरोए। 2 अगर तुस तैस खुशखेबरी पुड़ लगातार विश्वास केरते राले, ज़ै मीं प्रचार की, त परमेशर तुसन बच़ालो। नईं त तुश्शो विश्वास केरनो बेफैइदो भोव।

3 एल्हेरेलेइ मीं तुसन खास सन्देश दित्तो, ज़ै मीं प्रभु यीशु मसीह करां मैल्हो। तै सन्देश ईए, कि पवित्रशास्त्ररेरे मुताबिक यीशु मसीह इश्शे पापां केरे लेई मरो 4 ते दब्बो जेव, ते पवित्रशास्त्ररेरे मुताबिक ट्लेइयोवं दिहाड़े मुड़दन मरां ज़ींतो भोव। 5 ते कैफा (यानी पतरस) ते 12 चेलन लेइहोव। 6 फिरी 500 करां जादे चेलन एक्‍की साथी लेइहोव, ज़ैन मरां हेजू बड़े ज़ींतन ते किछ मेरि जेवरेन। 7 फिरी याकूबे लेइहोव फिरी सेब्भी प्रेरितन लेइहोव। 8 ते आखरी मां तैनी अपनो आप मीं पुड़ भी बांदो कियो, अवं ज़ै तैस बच्‍चेरे ज़ेरो आईं ज़ै ठीक वक्ते पुड़ नईं ज़र्मोरो। 9 किजोकि अवं प्रेरितन मरां सेब्भना निकोड़ोईं, बल्के इस काबल भी नईं कि लोक मींजो प्रेरित ज़ोन, किजोकि अवं परमेशरेरे कलीसियारे विश्वासी लोकन सतातो थियो। 10 पन परमेशरेरे अनुग्रहे सेइं अवं प्रेरित आईं। ते तैसेरो अनुग्रहेरो अस्सर ई भोव कि, मीं तैन होरि प्रेरितन करां बेद्धतां मेहनत भी की, ते ई मेहनत मीं अपने तरफां न की, बल्के परमेशरे मेरी मद्दत की, कि अवं इन केरि। 11 ते चाए अवं भोइ, चाए होरे प्रेरित भोन, अस तैस मसीहेरे बारे मां सन्देश प्रचार केरतम, ते इस्से पुड़ तुसेईं भी विश्वास कियो।

12 एल्हेरेलेइ हुनी अवं पुछ़ताई, ज़ैखन मसीहेरो ई प्रचार कियो गाते, कि तै मुड़दन मरां ज़ींतो भोव, ते तुसन मरां किछ किजो ज़ोतन, कि मुड़दां केरू ज़ींतू भोनू अथ्थी नईं? 13 अगर मुड़दां केरू ज़ींतू भोनू अथ्थी नईं, ते फिरी मसीह भी नईं ज़ींतो भोवरो। 14 ते अगर मसीह भी मुड़दन मरां ज़ींतो नईं भोवरो, त फिरी इश्शो सन्देश प्रचार केरनो भी बेफैइदोए; ते तुश्शो मसीह पुड़ विश्वास केरनो भी बेफैइदोए। 15 अगर मुड़दे ज़ींते न भोन, त असेईं इन ज़ोइतां परमेशरेरे बारे मां झूठ ज़ोवं, कि परमेशरे मसीह ज़ींतो कियो ज़ैन तैनी हकीकति मां नईं कियोरू। 16 अवं दुबारां फिरी ज़ोताईं, अगर कोई मुड़दन मरां ज़ींतो न भोए, ते फिरी मसीह भी मुड़न मरां ज़ींतो नईं भोवरो। 17 ते अगर मसीह मुड़दन मरां ज़ींतो नईं भोवरो, त तुश्शो मसीह पुड़ विश्वास भी बेफैइदोए, ते तुस हेजू तगर अपने पापन मां ज़ींने लगोरेथ। 18 बल्के ज़ैना मसीह पुड़ विश्वास केरनेबाले मर्रेन, तैना भी नाश भोए। 19 अगर अस सिर्फ इस ज़िन्दगी मां मसीह करां उमीद रखतम ते फिरी अस सेब्भी मैन्हन करां नुभागम।

20 पन सच़ त इन आहे कि परमेशरे मसीह मुड़दन मरां इन साबत केरनेरे लेई ज़ींतो कियोरो, ते ज़ैना मर्रेन, तैन मां पेइलो फल भोए। 21 किजोकि ज़ैन पेइले मैन्हे यानी आदमे कियूं, तैसेरे वजाई सेइं सब मैन्हु मरे, एन्च़रे ज़ैना विश्वासी लोक एजने बाले वक्ते मां मुड़दन मरां ज़ींते किये गाले, तैन भी एक्‍की मैन्हेरे केरनेरे वजाई सेइं आहे, ते तै मैन्हु मसीहे। 22 एल्हेरेलेइ एक्‍की मैन्हेरे पापेरे यानी आदमेरे वजाई सेइं सब मैन्हु मरतन, तेन्च़रे एक्‍की मैन्हेरे ज़िरिये सेइं यानी यीशु मसीहे वजाई सेइं सारे फिरी मुड़दे ज़ींते किये गाले। 23 पन हर कोई ठीक तरीके सेइं ज़िन्दगरे लेई वापस एज्जेलो, पन मसीह मुड़दन मरां ज़ींतो भोनेबालो पेइलोए, फिरी ज़ैन लोकां केरो रिश्तो तैस सेइं साथीए, तैना भी ज़ींते भोल्हे। 24 एसेरां पत्ती, मसीह सैरी दुष्ट शेक्ति नाश केरेलो ज़ैना परमेशरेरी खलाफत केरतिन। ते दुनियारो खातमों भोल्हो। तैखन मसीह, अपने बाजी परमेशर अपनु राज़, राज़ केरनेरे लेई पूरे तरीके सेइं देलो। 25 मसीहे तेइस तगर राज़ेरू ज़ेरू राज़ केरनू ज़रूरीए, ज़ांतगर परमेशर तैसेरे सारे दुश्मन्न तैसेरे अधीन न केरे। 26 सेब्भना आखरी ज़ै दुश्मन खतम कियो गालो तै मौते। 27 ज़ैखन पवित्रशास्त्र ज़ोते परमेशरे सब किछ तैसेरे अधीने मां केरेलो त इस मां परमेशर नईं, किजोकि सब किछ मसीहेरे अधीन केरनेबालो परमेशरे। 28 ते सब किछ परमेशरेरे मट्ठेरे अधिकारे मां केरनेरे बाद, तैखन तै अपनो आप रोड़े च़ारे परमेशरेरे अधिकारे मां केरेलो, ज़ैने तैस अधिकार दित्तो। सिर्फ परमेशर अकैल्‍लो प्रभुए तैए हर एक्‍की मां, ते हर गल्‍ली मां कम केरते।

29 हुनी तुस इस बारे मां सोचा, तुसन मां किछ एरे आन ज़ैना मर्रे लोकां केरे लेई बपतिस्मो नेतन, ते कोई तैन बपतिस्मो देते, अगर ज़ेन्च़रे किछ लोक ज़ोतन, विश्वासी लोक मुड़दन मरां ज़ींते नईं भोने, त फिरी एन केरनेरी कोई कीमत नईं ते फिरी एन केरनेरी वजा नईं। 30 ते इश्शे लेई, अगर मुड़दे ज़ींते किये गान त अपनो आप खतरे मां रखनो बेवकूफी आहे। 31 हे ढ्लाव ते बेइनव, इन पक्‍कू आहे कि तुश्शे बारे मां घमण्ड केरताईं, किजोकि तुस इश्शे प्रभु यीशु मसीह मां आथ, इन भी पक्‍कू आहे कि अवं रोज़ मौतरे खतरे मां रहताई। 32 मीं इफिसुस नगरे मां बेड़ि तैन केरे वजाई सेइं मुश्किलां झ़ेल्‍ली ज़ैना मेरी खलाफत केरते थिये, तैना जंगली जानबरां केरे ज़ेरे थिये। लोकां केरे खियाले सेइं मीं तैन मुशकलन सेइं कुन हासिल कियूं? किछ भी नईं। एल्हेरेलेइ इन साफे कि मुड़दे दुबारां ज़ींते न किये गान, त इन रोड़ूए ज़ैन लोक ज़ोने लगोरेन, "एज्जा, खाम पीम, किजोकि असेईं कालां मरनू आहे ते इन सब खतम भोनू।" 33 ज़ैना एरी गल्‍लां ज़ोतन तैन केरे वजाई सेइं बेवकूफ न बना, "बुरी संगती रोड़े चाल-चलने बगाड़तीए।" 34 तुस अपने सोचरे रोड़ी बत्तां वापस एज्जा ते पाप केरनो शारा। किजोकि तुसन मां किछ एरे आन ज़ैन केरो रिश्तो परमेशरे सेइं साथी नईं। अवं तुसन छिथानेरे लेई इन ज़ोताईं।

35 पन किछ पुछ़तन, "कि मुड़दे केन्च़रे ज़ींते भोतन, ते केरहे जिसमे मां एइतन?" 36 हे बे समझ़ाव, बीज़े पुड़ ध्यान देथ, ज़ैखन बीज़ बेवं गाते, त पौदो बन्ने करां पेइलू तैस मरनू पेते। 37 ते ज़ैन तू बेतस, चाए इन गेहुं भोन या होरू किछ। इन ज़ै भोनेबालो पौदोए एन तैसेरू ज़ेरू नईं। 38 तैस बेनेरे पत्ती परमेशर तैस एपनी मेर्ज़रे मुताबिक बडाते ज़ांतगर गेहुं केरि या होरि आन्नेरे डाल बांदे न भोन। 39 इस दुनियाई मां हर ज़ींती चीज़ां अलग-अलग आन इन सेब्भी केरो जिसम अक्‍कां ज़ेरो नईं। मैन्हु केरो जिसम जानबरां केरो ज़ेरो नईं। च़ुल्‍लोड़ू केरो जिसम, मेछ़ली केरे जिसमे करां अलगे। 40 ज़ेन्च़रे इस धेरतली पुड़ बड़े किसमां केरे जिसम भोतन तेन्च़रे अम्बरे मां भी दिहाड़ो चाँदनी, ते तारे आन, पन अम्बरेरी चीज़ां केरि शोभा होरि ज़ेरिए ते धेरतरे चीज़ां केरि शोभा होरि ज़ेरिए। 41 ते दिहाड़ेरी शोभा होरिए, चैंदनरी शोभा होरिए, ते तारां केरि शोभा होरिए, किजोकि तारे-तारेरी शोभाई मां फर्के।

42 मुड़दां केरू ज़ींतू भोनू भी एरू आहे। ज़ै जिसम नाश भोनेरे हालती मां दब्बो गाते, पन ज़ैखन ज़ींतो कियो गालो त कधी नाश न भोल्हो। 43 ज़ैखन अस मरतम (इश्शो जिसम) बदसूरत ते कमज़ोर भोतन। पन ज़ैखन तै दुबारां ज़ींतो भोतो त तै बड़े खूबसूरत ते मज़बूत भोते। 44 ज़ेन्च़रे इश्शे जिसमे मास ते खूने सेइं आन, एरे जिसम आन ज़ैन परमेशरेरो आत्मा ज़िन्दगी देते। ते इश्शे जिसम ज़ै मासे त कने खूनेरोए तैस जिसमे मां बेदलोलो, ज़ै परमेशरेरो आत्मारे तरफां दित्तो गाते। 45 पवित्रशास्त्रे मां इन भी लिखेरूए, "कि पेइलो मैन्हु, मतलब आदम, ज़ींतो प्राणी बनो," त आखरी आदम, यानी मसीह, हमेशारी ज़िन्दगी देनेबालो बनो। 46 मासे ते खूने सेइं साथी पेइले जिसम वजूदे मांए फिरी तैना जिसम ज़ैना परमेशरेरो आत्मा देते। 47 पेइलो मैन्हु ज़मीनरो मतलब मित्ती सेइं बनोरो थियो, तेन्च़रे दूइयोवं मैन्हु यानी मसीह, सुर्गेरां एवरो थियो। 48 लोक ज़ैना इस धेरतरेन तैना धेरतरे पेइले मैन्हु आदमेरे ज़ेरेन। पन ज़ैना लोक सुर्गेरेन तैना सुर्गेरे मैन्हु यानी मसीहेरे ज़ेरे आन। 49 ते ज़ेन्च़रे असेईं तैसेरू रूप ज़ै मित्तरो थियो धारण कियूं, तेन्च़रे तैस ज़ै सुर्गेरोए तैसेरू रूप धारण केरमेले।

50 हे ढ्लाव ते बेइनव, इश्शे जिसम इस धेरती पुड़ मास ते खूने सेइं बनोरो भोते, अस एरे ज़ेरे जिसमे सेइं साथी सुर्गे मां परमेशरेरे राज़्ज़े मां रानेरे काबल न भोल्हे। अस सुर्गे मां अपने मरने बाले जिसमे सेइं साथी न रेइ बटमेले, ज़ै मरते, किजोकि तैड़ी कोई मौत नईं। 51 शुना, अवं तुसन सेइं भेदेरी गल ज़ोताईं, अस सब नईं मरने, पन ज़ैखन आखरी नरशिंगेरी आवाज़ भोल्ही, त अस सब एक्‍की पले मां बेदलोनेम, 52 ते इन एक्‍की पले मां, ज़ेन्च़रे कोई चिप केरते, ज़ैखन आखरी नरशिंगो बज़ाव गालो त ज़ैना मर्रे थिये तैना ज़ींते भोनेन ताके हमेशारे लेई ज़ींते रान, ते अस ज़ैना ज़ींतेम, इश्शे जिसम बेदलोनेन। 53 किजोकि इश्शो जिसम ऐसैनी सेइं मरते ते शड़ते, ते ई तैस जिसमे मां बेदलोई गालो ज़ै कधे न मरे ते न शड़े। 54 ज़ैखन इन भोल्हु, तैखन पवित्रशास्त्रे मां लिखोरू परमेशरेरू तैन वचन पूरू भोल्हु, ज़ैन ज़ोते, "मौत रोड़े च़ारे हाराई गाली ते तैसेरू कोई वजूद न रालू।" 55 एन्च़रे ज़ैन पवित्रशास्त्रे मां लिखोरू तैन पूरू भोल्हु,

"हे मौत तेरी ज़ींत कोड़ि राई?

हे मौत तेरो डस कोड़ि राव?"

56 मौती तकलीफ देनेरी शक्ति पापे करां मैलतीए, ते पापे कानूने करां शक्ति मैलतीए। 57 पन परमेशरेरू शुक्र भोए, ज़ै इश्शे प्रभु यीशु मसीहेरे ज़िरिये पापे ते मौती पुड़ ज़ींत देते। 58 हे मेरे ट्लारे ढ्लाव ते बेइनव, विश्वासे मां मज़बूत राथ ते गलत शिक्षाई सेइं न टेपलोथ, ते हमेशा प्रभुएरू कम जोशे सेइं केरा, किजोकि तुस इन ज़ानतथ, कि ज़ैन किछ तुसेईं प्रभुएरे लेई कियूं तैन बेफैइदू नईं।