7 अवं इन चाताईं, कि ज़ेरो अवं अड्लाव आई, तेरहे सब मैन्हु भोन; पन परमेशरे किछन ड्लाह केरनू वरदान दित्तोरूए, ते किछन अकैल्लू रानेरू वरदान दित्तोरू।
8 मेरी सलाह अड्लां ते विधवां केरे ईए, कि तैना अड्लाहे रान, ज़ेन्च़रे अवं आईं। 9 पन अगर तैना अपनो आप कैबू न केरि बटन, त ड्लाह बनान, किजोकि ड्लाह बनानो इच्छान मां मसत राने करां रोड़ूए।
26 किजोकि इन दिहाड़न मां विश्वासी लोकां केरे लेई बुरी गल्लां भोने लेगोरिन, एल्हेरेलेइ मीं लगते कि इन तुश्शे लेई रोड़ूए, अवं ई सलाह देताईं कि ज़ैना ज़ेरे आन तैना एन्च़रे रान। 28 पन अगर तू ड्लाह भी केरस, त पाप नईं; ते अगर कुवारी ड्लाई गाए त कोई पाप नईं; पन एरे लोकन इस दुनियाई मां बड़ी परेशैनी भोल्ही, ते अवं बच़ाने चाताईं। 29 हे ढ्लाव ते बेइनव, अवं इन ज़ोताईं, इश्शो इस दुनियाई मां जादे वक्त नईं राहोरो, एल्हेरेलेइ जादे फिक्र न केरा कि तुश्शी कुआन्शां आन या नईं, पन प्रभुएरी सेवारे बारे मां सोचते राथ।
32 मेरी इच्छा ईए कि तुस दुनियारे ज़िन्दगरी खुवैइशन करां आज़ाद राथ, अड्लाव मैन्हु प्रभुएरी सेवा केन्च़रे केरनि ई फिक्र केरते कि प्रभुए खुश केरे। 33 पन ड्लावरो मैन्हु दुनियारी गल्लां केरि फिक्री मां रहते, कि केन्च़रे अपने कुआन्शी खुश रख्खे। 34 तैने दूई चीज़ां केरे बारे मां सोचोरू लोड़े, अपनि कुआन्श खुश केरनेरे बारे मां ते प्रभु खुश केरनेरे बारे मां। ड्लावरी ते अड्लाई मां भी फर्के, अड्लाई प्रभुएरी फिक्री मां रहतीए, कि केन्च़रे अपनि आत्मा, ते जिसम दूईये पवित्र रख्खे, पन ड्लावरी दुनियारे फिक्री मां रहतीए, कि अपने मुन्शे खुश रख्खे। 35 ई गल तुश्शे फैइदेरे लेई ज़ोताईं, न कि तुसन फसानेरे लेई, बल्के एल्हेरेलेइ ज़ेन्च़रे लोड़े तेन्च़रे कियूं गाए, ताके तुस अक मन भोइतां प्रभुएरी सेवाई मां लगोरे राथ।
38 ज़ै अपनि कुवैरारो ड्लाह कराते, तै रोड़ू केरते, ते ज़ै न कराए तै भी रोड़ू केरते।
39 ज़ांतगर कोन्ची कुआन्शरो मुन्श ज़ींतो रहते, तांतगर तैस सेइं साथी राहोरू लोड़े, पन ज़ेइस तैसेरो मुन्श मेरि गाए, ज़ैस सेइं चाए ड्लाह बनेई बटतीए, सिर्फ विश्वासी लोकन मां। 40 पन अगर तै फिरी दुबारां ड्लाह न बनाए, त मेरे खियाले मां बड़ी धने ते अवं समझ़ताईं, कि परमेशरेरी आत्मा मीं च़लाने लगोरीए।