1,2 हे कुआन्शव, तुस भी अपने मुन्शां केरे अधीन राथ। एल्हेरेलेइ अगर इन मां कोई एरो भोए ज़ै परमेशरेरे वचने न मनतो भोए, तुश्शे ज़ींनेरे तरीके सेइं तुश्शे बगैर ज़ोने तैन केरे विश्वास केरनेरी वजा भोल्ही। तैना तुश्शे रोड़े ते पवित्र बर्ताव हेरतां मसीह पुड़ विश्वास केरेले। 3 ते तुश्शी सजावट दिखावेरी न भोए, मतलब अलग-अलग किसमे दोग बनानो, ते सोन्नेरे गेहने, या किसमां-किसमां केरां लिगड़ां लाना। 4 बल्के तुस अपने गुना केरे ज़िरिये अपनो आप खूबसूरत बनाथ ज़ै तुसन करां दूर न गाए, मतलब नेरमी ते शांत स्भावे सेइं ज़ै परमेशरेरे लेई बड़ो कीमतीए। 5 ते पेइले ज़माने मां पवित्र कुआन्शां भी, ज़ैना परमेशरे पुड़ उमीद रेखती थी, तैना अपनो आप इस तरीके सेइं सज़ैती ते अपने-अपने मुन्शां केरे अधीन रैती थी। 6 ज़ेन्च़रे सारा अब्राहमेरे अधीन रहती थी ते तैस ज़ो मालिक ज़ोती थी, ते तुस भी अगर भलियाई केरथ, ते केन्ची किसमेरे फिक्रन सेइं न डरथ त सारारे कुइयां केरि ज़ेरि भोल्ही।

7 तेन्च़रे हे मुन्शव, तुस भी समझ़दैरी सेइं कुआन्शन सेइं ज़िन्दगी बीताथ ते इन याद रखा कि तैना तुसन करां कमज़ोरन, एल्हेरे तुसेईं तैन केरि आदर कियोरी लोड़े, किजोकि तुस दूईये तैस वरदानेरे हिसेदार आथ ज़ैन परमेशर तुसन अनुग्रहे सेइं दित्तोरूए, तै हमेशारी ज़िन्दगीए। एरू केरा ताके ज़ैखन तुस प्राथना केरथ त परमेशर तुश्शी प्राथना शुने।

8 आखरी मां अवं तुसन इन ज़ोताईं, तुसेईं सेभेइं अक मन भोवरू लोड़े ते एक्‍की होरि सेइं हमदरदी केरा ते एक्‍की होरि सेइं ढ्ला बेइनां केरो ज़ेरो प्यार केरा, ते एक्‍की होरि पुड़ दया केरा, एक्‍की होरेरे लेई नर्म बना। 9 बुरैइारे बदले बुराई न केरा, गैई केरे बदले गैई न देथ, पन इसेरे बदले बरकत देथ, किजोकि परमेशरे तुस होरन बरकतां देनेरे लेई कुजेवरेथ। अगर तुस इन केरतथ, त परमेशर तुसन भी बरकतां देलो। 10 किजोकि पवित्रशास्त्र ज़ोते, "अगर कोई मैन्हु ज़िन्दगरो आनन्द नेनो चाते, ते रोड़े दिहाड़े हेरने चाते त तैनी ध्यान लोड़े दित्तोरू कि बुरी गल्‍लां न ज़ोए। ते तैनी होरन धोखो न लोड़े दित्तोरो। 11 ते बुरू केरनू बंद कियोरू लोड़े बल्के तैनी रोड़ू कियोरू लोड़े। होरन सेइं मेल मिलापे सेइं ज़ींनेरे लेई मेहनत कियोरी लोड़े। 12 किजोकि प्रभु तैन लोकां केरू ध्यान रखते ज़ैना तैन्ने केरतन ज़ैन सही आहे, ते तै हमेशा तैन केरि प्राथना शुन्नेरे लेई तियार रहते। पन परमेशर तैन केरे खलाफ कम केरते ज़ैना बुरू केरतन।"

13 अगर तुस हमेशा भलू केरनेरी कोशिश केरथ, त फिरी कोई भी तुसन हकीकति मां नुकसान न पुज़ेई बटे। 14 अगर अस धार्मिकतारे स्भावेरे वजाई सेइं दुख झ़ैल्‍लम, त अस सच़्च़े धन भोल्हे, पन अगर कोई असन डराते त तैस करां डर्रू न लोड़े ते न घबरावरू लोड़े। 15 पन इसेरे बदले, तुसेईं मसीहेरी आराधना अपने ज़िन्दगरे प्रभुएरे रूपे मां कियोरी लोड़े। ते ज़ै कोई तुसन तुश्शे उमीदरे बारे मां किछ पुछ़े ज़ैस मां सारे विश्वासी शामल आन, त तैस जुवाब देनेरे लेई हमेशा तियार राथ, पन नेरमी ते आदरी सेइं। 16 हमेशा तैन्ने केरा ज़ैन सही भोए। तैखन अगर लोक तुश्शे लेई बुरू ज़ोले त तैना मसीह सेइं तुश्शो रिश्तो भोनेरे वजाई सेइं तुश्शो रोड़ो बर्ताव हेरेले त तैना छिथोले। 17 किजोकि इन रोड़ूए अगर इश्शां रोड़ां कम्मां केरे वजाई सेइं अस दुख झ़ैल्‍लम, अगर इश्शे लेई परमेशरेरी इच्छा ईए। इन इश्शे बुरां कम्मां केरे वजाई सेइं दुख झ़ैल्‍लने करां बड़ू रोड़ूए। 18 अवं इन ज़ोताईं, मसीहे भी इश्शे पापां केरे लेई दुख झ़ैल्‍लो ते मरो। तै एक्‍की बारे मरो ते तैस दुबारां मरनेरी ज़रूरत नईं। तै अक धर्मी मैन्हु थियो ज़ै पापी लोकां केरे लेई मरो ताके तै असन परमेशरे कां आने। तैनेईं तैसेरो जिसम मारो पन तै पवित्र आत्मारे शेक्तरे ज़िरिये ज़ींतो कियो। 19 तैट्ठां बाद तैसेरी आत्मा तैन आत्मान खुशखबरी शुनाने जेई, ज़ैना परमेशरे तैस ठैरी कैद कियोरिन ज़ैड़ी मर्रे लोकां केरि आत्मा रैती थी। 20 इन तैन मैन्हु केरि आत्मा आन ज़ैनेईं बड़े पेइले परमेशरेरो हुक्म न थियो मन्नोरो। ज़ैखन नूह किश्ती बनाने लगोरो थियो, त परमेशरे बड़े सबरी सेइं बलगू कि तैना पापन करां मन फिरान। पन सिर्फ अठ तैस भयानक तूफाने करां बच़े। 21 पुराने वक्ते मां तैन केरि मुक्ति हुना इश्शे लेई ज़ैखन अस बपतिस्मो नेतम मिसाले। ज़ैस पैनी मां अस बपतिस्मो नेतम तैन इश्शे जानरो मैल दूर न केरे, पन ई अक निशाने कि असेईं परमेशरे करां माफ़ी मगोरीए ताके इश्शो मन असन परेशान न केरे। असन माफ़ी मैल्ही बटतीए किजोकि यीशु मसीह मेरतां ज़ींतो भोवरोए, 22 ते तै सुर्गे जो जेवरो। तैड़ी हुनी तै परमेशरेरे देइने पासे खास ठैरी, तैड़ी तै सारे स्वर्गदूतन ते अधिकैरन ते शेक्तन पुड़ राज़ केरने लगोरोए।