1 Pedro 5

बुज़ुर्गन ते च़ुनोरे लोकन बिस्तार

1 अवं साथी बुज़ुर्गन सेइं इन ज़ोनू चाताईं किजोकि अवं तुश्शो ज़ेरो आईं। मीं एप्पू तैना दुख हेरोरेन ज़ैना मसीहे बड़े पेइले झ़ैल्‍ले। ज़ैखन तै दुबारां एज्जेलो, त अवं तैसेरे महिमा मां शामल भोनोईं। अवं तुश्शो साथी बुज़ुर्ग भोने सेइं तुसन कां ई बिनती केरताईं, 2 ज़ेन्च़रे पुहाल अपनि भैड्डां हेरतन, तुस भी तेन्च़रे हर एक्‍केरी हेरगेश केरा, ज़ैना परमेशरे तुश्शे रखवैली मां रखोरेन। इन अपने मेर्ज़ी सेइं केरा किजोकि परमेशर इन चाते। तुस इन एल्हेरेलेइ न केरा कि तुसन पुड़ दबाव बनाव गाते। ते इन कम एल्हेरेलेइ न केरा कि तुस कमाई केरनि चाथ, पन इस इच्छाई सेइं केरा कि तुस परमेशरेरी ते लोकां केरि सेवा केरनि चातथ। 3 ते ज़ैना लोक तुसन सौंफे तैन पुड़ हुकूमत न केरा, बल्के तैन केरे लेई रोड़ी मिसालां बना। 4 ते ज़ैखन यीशु मसीह ज़ै इश्शो प्रधान पुहालेरो ज़ेरोए, वापस एज्जेलो त तै तुसन तैन इनाम देलो ज़ेसेरी शोभा कधे खतम न भोल्ही। 5 तेन्च़रे हे जुवान लोकव, तुस भी बुज़ुर्गां केरे अधीन राथ, तुस सारे एक्‍की होरेरी मद्दत बड़े नर्म स्भावे सेइं केरा। किजोकि कोई पवित्रशास्त्रे मां पेढ़ी बटते "परमेशर घमण्ड केरनेबालां केरि खलाफत केरते, पन तै तैन केरे लेई भलोए ज़ैना दीन आन।" 6 एल्हेरेलेइ अपनो आप परमेशरे कां दीन बनाथ तै तुश्शी हिफाज़त केरनेरे लेई शेक्ति बालोए, ज़ैस सेइं तै तुसन ठीक वक्ते पुड़ आदर दे। 7 परमेशरे अपने परेशैनी ते फिकरां केरे बारे मां ज़ोथ, किजोकि तैस तुश्शू ध्याने। 8 खबरदार राथ, ते बींझ़े राथ, किजोकि तुश्शो दुश्मन शैतान तुसन पुड़ हमलो केरनेरे लेई तियारे, कि तुस परमेशरे मन्नू शारा। तै गरज़नेबाले शेरेरो ज़ेरो तोपने लगोरोए कि केस मारे ते खाए। 9 तुस विश्वासे मां मज़बूत भोइतां तैसेरो मुकाबलो केरा, तैन विश्वासी लोकन याद रखा ज़ैना दुनियारे अलग-अलग ठैरन मां आन, तैना भी तुश्शो ज़ेरो दुख झ़ैल्‍लने लगोरेन। 10 हुनी परमेशर ज़ै सारे अनुग्रहे सेइं भेरतांए, तैने अस हमेशारी महिमाई मां शामल भोनेरे लेई च़ुनोरेम किजोकि इश्शो रिश्तो यीशु मसीह सेइं आहे। थोड़े वक्तेरे दुख झ़ैल्‍लनेरे बाद परमेशर तुसन सही बनालो ताके तुसन मां कोई गलती न राए, तै तुश्शे दिलन मज़बूत केरेलो ताके तुस मज़बूती सेइं तैस पुड़ विश्वास केरथ। 11 तै शेक्ति सेइं हमेशा राज़ केरेलो। आमीन।

आखरी नमस्कार

12 मीं सिलवानुसेरे मद्दती सेइं ई निकड़ी ज़ेरि चिट्ठी लिखी ते तुसन जो भेज़ी, अवं तैस ज़ानताईं तै मसीह मां वफादार ढ्लाए, मेरे लिखनेरो मकसद ईए कि तुश्शो होसलो बधेईं ते याकीन दूवेईं कि ज़ै अनुभव तुस केरने लगोरेथ तै सच़्च़े परमेशरेरे अनुग्रहेरो अक हिस्सोए, इस अनुग्रहे मां मज़बूती सेइं बनोरे राथ। 13 बाबेल नगरेरे विश्वासी ज़ैना परमेशरे च़ुनोरेन ठीक तेन्च़रे ज़ेन्च़रे तुस च़ुनोरेथ, तैना तुसन जो नमस्कार ज़ोतन। मरकुस ज़ै मेरे मट्ठेरो ज़ेरोए तुसन जो नमस्कार ज़ोते। 14 मसीहेरे प्यारे सेइं एक्‍की होरि जो नमस्कार केरा। अवं प्राथना केरताईं परमेशर तुसन सेब्भन ज़ैन केरो रिश्तो मसीह सेइं साथी शान्ति दे।