1 हुनी अवं सेब्भन करां बेद्धतां इन ज़ोताईं, कि बिनती, ते प्राथना, ते दरखुवासां, सेब्भी मैन्हु केरे लेई की गान। 2 राज़ां ते सेब्भी उच्‍चे पदे बालां केरा लेई प्राथना केरा, ताके तैना असन सुखे ते बगैर खतरे सेइं ज़ींने देन ते अस परमेशरेरी आराधना केरि बटतम ते होरि लोकन सेइं रोड़ो बर्ताव केरि बटम। 3 इन इश्शे मुक्ति देनेबाले परमेशरे रोड़ू लगते ते पसंद एइते। 4 तै इन चाते, कि सेब्भी मैन्हन मुक्ति मैल्हे; ते तैना सच़्च़ेरे ज्ञाने ज़ानन। 5 किजोकि सिर्फ अक्‍के परमेशरे, ते अक मैन्हु आहे ज़ै परमेशर ते लोकां केरो बिचवाई कराने बालो, ते तै मैन्हु यीशु मसीह आहे। 6 सेब्भी लोकन पाप ते मौतरी शेक्ति करां छुटकारो देनेरे लेई मसीहे अपनो आप बलिदान कियो। तैसेरे मौतरे ज़िरिये परमेशरे ठीक वक्ते पुड़ सबूत दित्तू कि तै सेब्भी लोकन बच़ानो चाते। 7 ई वजाए, परमेशरे अवं खुशखबरी प्रचार केरनेबालो ते प्रेरित भोनेरे लेई च़ुनो। तैने अवं गैर कौमन विश्वासेरो सच़्च़ो सन्देश शिखालनेरे लेई च़ुनो। अवं झूठ नईं लोरो ज़ोने बलके सच़ ज़ोने लगोरोईं।

8 अवं चाताईं, कि हर ठैरी सभान मां मड़द परमेशरेरे लेई समर्पित हथ खड़े केरतां बगैर सरकां ते बगैर बेंसी सेइं प्राथना केरन। 9 तेन्च़रे मसीही कुआन्शां भी इज़्ज़तदार लिगड़ां लेइतां, ते अपनो आप रोड़ेच़ारे सज़ेइतां, न कि अलग-अलग किसमे सेइं दोग बनाने, ते सोन्ने, ते मोती, ते कीमती लिगड़न सेइं। 10 बलके इसेरे बदले तैनेईं होरि केरे लेई रोड़ां कम्मां केरतां अपनो आप खूबसूरत लोड़े बनावरो, किजोकि परमेशरेरी भक्ति केरनेबैली कुआन्शन इन शोभा देते। 11 ज़ैखन होरे लोक विश्वासी लोकन शिखालन त सेब्भी कुआन्शेईं च़ुपच़ाप ते आदरी सेइं शुन्तां शिखोरू लोड़े। 12 अवं अज़ाज़त न देईं कि कुआन्शां मड़दन शिखालन ते तैन पुड़ अधिकार रखन। ज़ैखन तुस आराधना केरनेरे लेई अकोट्ठे भोथ त कुआन्शेईं च़ुप लोड़े राहोरू। 13 अवं इन एल्हेरेलेइ ज़ोताईं किजोकि परमेशरे पेइलो आदम बनाव, तैसेरे पत्ती हव्वा बनाई। 14 होरि वजा ईए कि कुआन्शां सप्पे करां धोखो खाव न कि आदमे, एन्च़रां हव्वा परमेशरेरो हुक्म ट्लोड़ो। 15 फिरी भी कुआन्श बच्‍चे ज़ाने सेइं परमेशरेरे करां मुक्ति हासिल केरेली, अगर मसीह पुड़ लगातार विश्वास केरती राए, ते होरि लोकन सेइं प्यार केरती राए, ते शुद्ध त कने रोड़े तरीके सेइं बर्ताव केरे।