1 बुढे मैन्हु न झ़िड़क पन तैस एन्च़रे आदरी सेइं सलाह दे ज़ेन्च़रे अपने बाजी, एप्पू करां निकड़े मैन्हु एन्च़रे सलाह दे ज़ेन्च़रे अपने निकड़े ढ्लाए। 2 बुढी कुआन्शन सेइं एन्च़रे बर्ताव केर ज़ेन्च़रे अम्मा सेइं, ते जुवान कुआन्शन सेइं एन्च़रे बर्ताव केर ज़ेन्च़रे अपने बेइनी सेइं। इन साफ दिले सेइं केर।

3 तैन विधवां केरि आदर केरा, ज़ैन केरो कोई हेरगेश केरनेबालो नईं तैन केरू ध्यान रखा। 4 ते अगर कोन्ची विधवारां मट्ठां या पोट्लड़ां या धियोड़ां भोन, ते तैनेईं पेइले अपने घरेरे लोकां केरू ध्यान रेखतां परमेशरेरी भक्ति केरनि शिखोरी लोड़े। ते तैना एन केरतां अपने अम्मा-बाजी ते दादा देदी केरू हक देन, किजोकि इन परमेशरे पसंद एइते। 5 ज़ै विधवा आहे ते तैसेरो ध्यान रखनेबालो कोई नईं, तै परमेशरे पुड़ उमीद रखतीए, ते रात दिहैड़ी बिनती ते प्राथनाई मां परमेशरे करां मद्दत मगतीए। 6 पन ज़ैना विधवां अपनो सारो वक्त एशे मां बितैतिन तैना जिसमानी रूपे सेइं त ज़ींतिन पन आत्मिक रूपे सेइं मेर्रीन। 7 इन गल्‍लां केरो भी हुक्म दे कि तैना बेइलज़ाम रान। 8 पन अगर कोई अपने रिश्तेदारां केरि ते खास केरतां अपने घरानेरू ध्यान न रख्खे, ते तै विश्वासे करां मुकरोरोए, ते ज़ै विश्वास न केरे तैस करां बुरो बनोरोए।

9 तैस्से विधवारू नवं लिखू गाए, ज़ै शठ सालन करां घट न भोए, ते अपने मुन्शे सेइं वफादार राहोरी भोए। 10 ते होरे लोक तैसेरे बारे मां ज़ानते भोन कि तैसां हमेशा रोड़ां कम्मां कियोरन। ज़ेन्च़रे कि, तैसां बच्‍चे रोड़े च़ारे पाले, ते तैना विश्वासी लोक अपने घरे मां आने, ज़ैना सफरे मां थिये, ज़ेन्च़रे होरि लोकां केरि सेवा कियोरी भोए, ते तैन लोकां केरि मद्दत कियोरी भोए ज़ैना मुसीबती मां थिये, ते ज़ैसां हर किसमेरां रोड़ां कम्मां कियोरां भोन। 11 पन जुवान विधवां केरां नंव्वां न लिख, किजोकि ज़ैखन तैन केरि जिसमानी इच्छा तैस वाधे करां शेक्ति बाली भोती, ज़ै तैनेईं विधवा रेइतां मसीहेरी सेवा केरनेरे लेई कियोरोए, त तैना ड्लाह बनानो चैतिन। 12 दुबारां ड्लाह केरतां तैना दोषी भोतिन, किजोकि तैनेईं अपनो पेइलो वाधो बरकरार नईं रखोरो। 13 एन्च़रे तैना घरे-घरे फिरतां आलसी भोनू शिखतिन, ते सिर्फ आलसी नईं, पन होरि केरे खलाफ गल्‍लां केरतिन, ते होरि केरे कम्मन मां दखल देतिन, ते तैना गल्‍लां ज़ोतिन ज़ैना न लोड़न ज़ोरी। 14 एल्हेरेलेइ अवं इन चाताईं, कि जुवान विधवां ड्लाह बनान; ते तैन बच्‍चे भोन ते घरबार सुमालन, ते दुश्मन्न बदनाम केरनेरो मौको न देन। 15 किजोकि किछ जुवान विधवां कुआन्शेईं परमेशरे करां दूर भोइतां शैताने पत्ती च़लनू शुरू कियोरू। 16 अगर कोन्ची विश्वास केरनेबालेरी टब्बरे मां विधवां भोन, त तैए तैन केरि मद्दत केरे न तैन केरि ज़िमेवारी कलीसियाई पुड़ भोए। तैखन कलीसिया तैस विधवारी मद्दत केरि बटतीए ज़ेसेरो कोई न भोए।

17 ज़ै बुज़ुर्ग रोड़े च़ारे कम केरते तै आदर हासिल केरनेरे ते बराबर तनखाएरे काबले, खास केरतां तैना ज़ैना परमेशरेरू वचन शुनाने, ते शिखालने मां बड़ी मेहनत केरतन। 18 किजोकि पवित्रशास्त्रे मां इन लिखेरूए, "कि तू जोट्लोरे दांतेरू आशी न बेन्धां," किजोकि, "मज़दूर अपने मज़दूरारो हकदारे।" 19 कोई दोष कोन्ची बुज़ुर्गे लव गाए, त ज़ांतगर दूई या जादे लोक न ज़ोन कि असेईं ऐह पाप केरतो लाहोरोए, तांतगर न शुन। 20 ज़ैना लोक पाप केरतन तैन सेब्भी विश्वासी लोकां केरे सामने झ़िड़क, ताके होरे विश्वासी लोक भी डरन। 21 परमेशर ते मसीह यीशु, ते च़ुनोरे स्वर्गदूत हाज़र सेमझ़तां अवं तीं हदायत देताईं, ध्यान राए कि तू केन्चेरो न्याय जल्दी न केरस, ते कोन्चेरी तरफदारी न केर। 22 कलीसियारो बुज़ुर्ग च़ुन्नेरे बारे मां जल्दी कधे नईं केरनि। ते होरि केरे पापन मां शामल न भो, अपनो आप पवित्र बनोरो रख।

23 अग्रोवं जो पानी न पी, पन अपने पेटेरे ते अपने बार-बार बिमार भोनेरे लेई थोड़ो-थोड़ो दाछ़रो रस भी कम्मे मां आन।

24 अवं ज़ोताईं कि जल्दी बुज़ुर्ग नईं च़ुन्ने, किजोकि किछ लोक खुले आम पाप केरतन, न्याये करां पेइले भी तैना विश्वासी लोकां केरे सामने दोषी आन। हांलाकि होरि लोकां केरे पाप बांदे न भोन पन बादे मां पिशाने गातन। 25 एन्च़रे ज़ैखन लोक रोड़ां कम्मां केरतन, त तैन होरि विश्वासी केरे ज़िरिये हेरू गाते। अगर तैना तैन एक्‍की बारे साफ च़ारे लेही बटन, आखर तैना तैन पिशानेले।