1,2 पवित्रशास्त्रे मां इन लिखेरूए कि, "हर अक गल दूई या ट्लेइ गवाहां केरे गवाही केरे ज़िरिये सेइं पक्‍की की गाली।" मीं तैन लोकन हदैइत दित्तोरीए ज़ैना पाप केरते थिये, ज़ैखन अवं दूइयोवं बार एवरो थियो। हुनी अवं फिरी तैन ते होरि सेब्भी लोकन हदैइत देताईं कि ठीक तेन्च़रे ज़ेन्च़रे मीं पेइलू भी कियोरूए इस चिट्ठी मां खबरदार केरताईं। हुनी अवं ट्लेइयोवं बार एजनेबालो आईं, ते अगर तैनेईं हेजू भी पाप केरनो बंद नईं कियोरो, तैन मरां कोई भी सज़ाही करां न बच़ेलो। 3 अवं ज़ोताईं कि तुस इना गल्‍लां केरू सबूत चातथ, कि मसीह मेरे ज़िरिये गल्‍लां केरते, पन ज़ैखन मसीह तुसन सेइं बर्ताव केरते त तै कमज़ोर नईं; पन तुसन मां शेक्ति बालोए। 4 तै कमज़ोरारे वजाई सेइं क्रूसे पुड़ च़ाढ़ो त जेव, फिरी भी परमेशरेरे शेक्ति सेइं ज़ींतोए। अस भी कमज़ोरम, ठीक तेन्च़रां, ज़ेन्च़रे मसीह थियो; पन ज़ैखन अस तुसन सेइं बर्ताव केरमेले अस भी तैस सेइं साथी ज़ींते भोमेले ते असन सेइं साथी परमेशरेरी शक्ति भोल्ही।

5 अपनो आप परखा, कि तुश्शो विश्वास सच़्च़ोए कि नईं; एप्पू परखा, कुन तुसन अपने बारे मां ई पतो नईं, कि यीशु मसीह तुसन मां आहे, नईं त तुस निकम्मे भोए। 6 पन मेरी उमीदे, कि तुस बुझ़ेले, कि अस निकम्मे नईं निसोरे। 7 चाए अगर तुसन इन लेइहोते कि अस सच़्च़े प्रेरित नईं, अस तुश्शे लेई परमेशरे कां प्राथना केरने लगोरेम, कि गलती केरनेरे बगैर सिर्फ रोड़ू केरा। 8 किजोकि अस सच़्च़ेरे खलाफ किछ न केरि बटम, पन सच़्च़ेरे लेई केरि बटतम। 9 ज़ैखन अस कमज़ोरम, ते तुस ताकतबरथ, अस खुशी रहतम, ते ई प्राथना भी केरतम, कि तुस विश्वासे मां सिद्ध भोते राथ। 10 एल्हेरेलेइ अवं तुश्शे पिठी पतर इना गल्‍लां लिखताईं, कि मौजूद भोइतां मीं तैस अधिकारेरे मुताबिक ज़ै प्रभुए बिगाड़नेरे लेई नईं पन बनानेरी लेई मीं दित्तोरोए, सेखती सेइं किछ न केरनू पे।

11 हे ढ्लाव ते बेइनव, खुशी राथ, सिद्ध बनते राथ; एक्‍की होरि हिम्मत देथ; ते मेल मिलापे सेइं राथ, ते प्यार केरनेबालो ते शान्ति देनेबालो परमेशर तुसन साथी भोल्हो। 12 मसीहेरे प्यारे सेइं एक्‍की होरि जो नमस्कार केरा। 13 सब पवित्र लोक तुसन जो नमस्कार ज़ोतन। 14 प्रभु यीशु मसीहेरो अनुग्रह ते परमेशरेरो प्यार ते पवित्र आत्मारी संगती तुसन सेब्भन साथी भोए।