1 हे ट्लारव, अवं दूइयोवं चिट्ठी लिखने लगोरोईं, अवं दूईये चिट्ठन मां तुसन किछ गल्‍लां याद करेइतां होसलो देनेरी कोशिश केरने लगोरोईं। ज़ैना तुसेईं पेइली शिखोरिन ताके तुस सही तरीके सेइं सोचथ। 2 अवं इन एल्हेरेलेइ लगोरोईं केरने, कि अवं तुसन तैना गल्‍लां याद करैनी चाताईं ज़ैना बड़े पेइले पवित्र नेबेईं ज़ोवरिन ते इश्शे प्रभु ते मुक्ति देनेबाले यीशु मसीहेरी शिक्षा आन। ज़ैना प्रेरित तुसन कांए तैनेईं तुसन शिखैलोरिन। 3 सेब्भन करां खास गल ईए, कि तुस ज़ानथ, कि आखरी दिहाड़न मां मसीहेरे वापस एजने करां पेइले, लोक तुश्शो मज़ाक बनाने कि तुस विश्वास केरतथ कि मसीह दुबारां वापस एजनोए, तैना आदी भोनेरे वजाई सेइं एना बुरी चीज़ां केरेले ज़ैन सेइं तैना खुश भोतन। 4 तैना ज़ोले, "तैसेरो एजनेरो वाधो सच़ नईं, तै बिलकुल भी नईं एजनो! किजोकि ज़ैना शुरुआती मां इश्शे मसीही बुज़ुर्ग थिये तैना सब मरे, पन किछ भी बेदलोव। सब किछ तेरहु आहे, ज़ेन्च़रे दुनिया बनानेरे वक्ते करां थियूं।" 5 तैना एन एल्हेरेलेइ ज़ोतन किजोकि तैना इन बिस्सरनू चातन, कि बड़े पेइले अम्बर ते धरती परमेशरेरे हुक्मे सेइं बनाव जेव। तैन्ने धरती पैनी मरां कढी ते पैनी करां अलग की। 6 फिरी तैनी पैनेरो इस्तेमाल कियो कि पुरानी दुनिया बड़े तूफाने सेइं नाश केरे। 7 पन परमेशरे अम्बर ते धरती तैस्से हुक्मेरे ज़िरिये रखोरेन, ताके तैन अग्गी सेइं नाश केरे। तै तैन तैस दिहैड़ी तगर रखेलो ज़ेइस तै तैन लोकां केरो न्याय केरेलो ते नाश केरेलो ज़ैना तैसेरी आदर न केरन।

8 हे ट्लारव, ज़ैना गल्‍लां अवं हुन्ना ज़ोने लगोरोईं तैन नज़रानदाज़ न केरा, कि प्रभुएरी नज़री मां अक दिहाड़ी हज़ार सालन बराबरे ते हज़ार साल एक्‍की दिहैड़रे बराबर आन (तैना तैसेरेलेइ अक्‍कां ज़ेरे आन)। 9 किछ लोक सोचतन कि प्रभु अपनो वापस एजनेरो वाधे पूरे केरने मां च़िर लगोरो लाने। पन परमेशर एन्च़रे च़िर नईं लाने लगोरो, बल्के इसेरे बदले तै तुसन सेइं सबर लगोरो केरने। किजोकि तै न चाए कोई भी नाश भोए। पन तै चाते कि हर कोई अपनो मन बदले त कने गलत केरनू शारे ते तैस कां एज्जे। 10 पन मसीह पक्‍को वापस एज्जेलो, तै अचानक एज्जेलो ज़ेन्च़रे च़ोर अचानक एइते। तैस वक्त अम्बरे मां गरज़नेरी ज़ेरि शोर भोल्ही, ते अम्बर गाईब भोइ गालू। सब किछ ज़ैन अम्बरे मां आए, दिहाड़ो, चाँदनी, तारे सब अग्गी सेइं बिलकुल नाश भोल्हु, तैस दिहाड़े परमेशर न्याय केरनेरे लेई तैन सब किछ बांदू केरेलो ज़ैन लोकेईं इस दुनियाई मां कियोरूए। 11 एल्हेरेलेइ कि परमेशर इना सैरी चीज़ां पेक्‍की नाश केरेलो ज़ेन्च़रे मीं ज़ोवं, एल्हेरेलेइ तुसेईं पवित्र ज़िन्दगी ज़ीयोरी लोड़े ते अपनो आप परमेशरे सौंफोरो लोड़े। 12 ज़ेन्च़रे तुस तैस दिहैड़ी बलगने लगोरेथ ज़ेइस परमेशर दुनियारो न्याय केरने एज्जेलो, ते बड़ी कोशिश केरा कि तै दिहाड़ी जल्दी एजनेरे लेई। तैस दिहाड़े परमेशर अम्बरे अग्गी सेइं फुकेलो ते नाश केरेलो त कने अम्बरेरी सैरी चीज़ां अग्गरे गेर्मी सेइं गेलेली। 13 पन अस विश्वासी नंव्वे अम्बरे ते नंव्वे धेरती बलगने लगोरेम ज़ेसेरो वाधो परमेशरे कियोरो, ज़ैड़ी लोक परमेशरेरे इच्छाई सेइं ज़ीयेले।

14 एल्हेरेलेइ, हे ट्लारव, ज़ेन्च़रे तुस तैस दिहैड़ी बलगने लगोरेथ ज़ेइस परमेशर इस दुनियारो न्याय केरेलो, त तुस पूरी कोशिश केरा कि तुस शैन्ति सेइं परमेशरेरे नज़री मां शुद्ध ते बेइलज़ाम भोथ। 15 ते इश्शे प्रभुएरे सबरारे बारे मां सोचा तैने तुसन मौको दित्तो, कि तुस एजने बाले न्याये करां बच़थ। इन इश्शे ट्लारे विश्वासी सैथे पौलुसे भी तुश्शे लेई तैस समझ़रे मुताबिक अपने चिट्ठी मां लिखोरू ज़ै परमेशरे तैस दित्तोरीए। 16 तैने अपने सैरी चिट्ठन मां ज़ैना तैने विश्वासी लोकन जो लिखी, इना सैरी गल्‍लां तुसन लिखी। पन किछ तैसेरी लिखोरी गल्‍लां समझ़नी मुश्किल आन। तैन लोकां केरे लेई ज़ैनेईं रोड़े च़ारे नईं पढ़ोरू ज़ैन इस बारे मां पक्‍को पतो नईं कि तैना कुन विश्वास केरतन, तैना गलत तरीके सेइं इन मुश्किल गल्‍लां केरे मतलब कढतन, ज़ेन्च़रे तैना पवित्रशास्त्रेरी किछ गल्‍लां केरो गलत तरीके मतलब समझ़तन। एन्च़रे केरने सेइं तैना अपनो आप इस काबल बनातन कि परमेशर तैन नाश केरे। 17 एल्हेरेलेइ, हे ट्लारव तुस पेइले ज़ानतथ कि इना गल्‍लां भोनिन, एल्हेरेलेइ तुस हुशार राथ ताके ज़ैना लोक कानूने न मनन तैना तुसन झूठ ज़ोइतां धोखो न देन, ते तुस सेच़्च़ी गल्‍लन विश्वास केरनो शारथ। 18 पन तुस इश्शे प्रभु ते मुक्ति देनेबाले यीशु मसीहेरे अनुग्रह ते ज्ञाने मां बद्धते गाथ। तैसेरी महिमा हुन्ना भी भोए, ते हमेशा भोती राए। आमीन।