मिन्नत मन्नेरी विधि
1 फिरी मूसे इस्राएली गोट्लां केरे प्रधान मड़दन सेइं ज़ोवं, "यहोवा ऐह हुक्म दित्तोरोए कि: 2 ज़ैखन कोई मड़द यहोवा कां मिन्नत मन्ने, या अपने आपे करारे सेइं बन्धनेरे लेई कसम खाए, त तै अपनु वचन न टाले; ज़ैन किछ तै अपने ऐशी सेइं ज़ोए, तैसेरे मुताबिक तै ज़रूर पूरू केरे। 3 ते ज़ैखन कोई कुवारी कौन्श अपने अड्लाहे हालती मां अपने बाजी केरे घरे मां रेइतां यहोवा कां मिन्नत मन्ने, त तै अपने आपे करारे सेइं बन्धे, 4 त अगर तैसारो बाजी तैसारी मिन्नत या वचन शुन्तां ज़ैस सेइं तैसां अपनो आप बंधोरो भोए, तैस जो किछ न ज़ोए, तैखन त तैसारी सब मिन्नतां बेनोरी राहेली, होरू कोई बन्धन कि न भोए, ज़ैस सेइं तैसां अपनो आप बंधोरो भोए तै भी बनोरो रालो। 5 पन अगर तैसारो बाजी तैसारी गल शुन्तां तैस्से दिहाड़े ठाके, त तैसारी मिन्नतां या होरी किसमेरू बन्धन, ज़ैस सेइं तैसां अपनो आप बंधोरो भोए, तैन मरां अक भी बरकरार न रालो, ते यहोवा एन ज़ैनतां कि तैसारे बाजी तैस ठाकेरूए, तैसारो ऐह पाप माफ़ केरेलो। 6 या फिरी अगर तै कौन्श अपने मुन्शेरे अधीन भोए ते बन्धू केरे, या बगैर सोच विचार केरनेरे अलावा किछ ज़ोए, ज़ैस सेइं तै बन्धने मां पे, 7 ते या अगर तैसारो मुन्श तैस दिहैड़ी शुन्तां किछ न ज़ोए; तां त तैसारी मिन्नत बनोरी राहेली, या ज़ैस बन्धने सेइं तैसां अपनो आप बंधोरो भोए, तै भी बरकरार रालो। 8 पन अगर तैसारो मुन्श तैसारी गल शुन्तां तैस्से दिहाड़े तैस ठाके, त ज़ै मिन्नत तैसां मन्नोरीए, या ज़ै गल बगैर सोच विचार केरनेरां अलावा तैसां अपनो आप बंधोरो भोए, तै ट्लुटी गालो; ते यहोवा तैस कौन्शरो पाप माफ़ केरेलो। 9 फिरी विधवा कौन्श या शारोरी कौन्शरी मिन्नत, या कोन्ची भी किसमेरे करारेरू बन्धन कि न भोए, या ज़ैस बन्धने सेइं तैसां अपनो आप बंधोरो भोए, तै भी बरकरार रालो। 10 फिरी विधवा या शारोरी कौन्शरी मिन्नत मन्ने, या कसम खेइतां अपने आपे बन्धे, 11 ते तैसारो मुन्श शुन्तां किछ न ज़ोए, ते न तैस ठाके, तां त तैसारी सैरी मिन्नतां बरकरार राहेली, ते कोई भी बन्धन कि न भोए, ज़ैस सेइं तैसां अपनो आप बंधोरो भोए, तैन बरकरार रालू। 12 पन अगर तैसारो मुन्श तैसेरी मिन्नत शुन्तां तैस्से दिहाड़े पूरे तरीके सेइं तैस ट्लोड़ी छ़डे, तैसारी मिन्नत यानी ज़ैन किछ तैसारे ऐशेरां अपने बन्धनेरे बारे मां निसोरू भोए, तैस मरां अक भी बरकरार न रालू; तैसारे मुन्शे सब ट्लोड़ी छ़डोरूए, एल्हेरेलेइ यहोवा तैस कौन्शरो पाप माफ़ केरेलो। 13 कोई भी मिन्नत या कसम कि न भोए, ज़ैस सेइं तैस कौन्शां एपनी ज़िन्दगी दुख देनेरे लेई करार बन्धोरी भोए, तैसारो मुन्श तैस मज़बूत भी केरी सकते ते ट्लोड़ी भी सकते। 14 मतलब तैसारो मुन्श कोन्ची भी दिहाड़े तैस किछ कि न ज़ोए, त तै तैसारी सैरी मिन्नतां बन्धन ज़ैस सेइं तै बन्धोरी भोए, मज़बूत केरते, तैनी तै रख्खोरीए, किजोकि तैनी शुन्नेरे दिहाड़े किछ नईं ज़ोवरू। 15 ते अगर तै शुन्तां बड़े दिहाड़ना पत्ती ट्लोड़ी दे, त एपनी कौन्शरो पाप तैए भुगतेलो।"
16 मुन्शेरे ते कौन्शरे दरमियाने मां, ते बाजी ते अड्लैही कुइयरे दरमियाने मां ज़ैन विधि केरो हुक्म यहोवाए मूसे दित्तोरे थियो तैना इना थिये।