1 फिरी यहोवा हारूने सेइं ज़ोवं, "पवित्र ठारारे अधर्मेरो भार तीं पुड़ ते तेरे मट्ठन पुड़ ते तेरे बाजी केरे घराने पुड़ भोल्हो; ते तुश्शे याजकेरे धर्मेरे खलाफ अधर्मेरो भार तीं पुड़ ते तेरे मट्ठन पुड़ भोल्हो। 2 ते लेवी केरे गोट्ले, मतलब, तेरे सियाना केरे गोट्ले मरां ज़ैना तेरे ढ्लान तैन भी साथी ऐन्हां, ते तैना तीं सेइं साथी मिली गान, ते तैना तेरी सेवा केरते रान, पन करारेरे सन्दूखेरे तेम्बु कां तू ते तेरां मट्ठां सिर्फ एज्जन। 3 ज़ैन तीं सौंफू जेवरूए, तैसेरी ते सारे तेम्बेरी भी हिफाज़त केरन, पन पवित्र ठारारी चीज़ां ते वेदी कां सामने न गान, एरू न भोए कि तैना भी ते तुस लोक भी मेरि गाथ। 4 ते तैना तुसन सेइं मिली गान, ते मिलापे बाले तेम्बु कां सारी सेवारी चीज़ां केरी हिफाज़त केरते रान, पन ज़ै तुश्शे कुलेरो न भोए, तै तुश्शे लोकां केरे नेड़े न एज्जे। 5 ते पवित्र ठार ते वेदी कां रखवाली तुस्से केरते रेइयथ, ज़ैस सेइं इस्राएली लोकन पुड़ मेरो कोप न भड़के। 6 पन मीं एप्पु तुश्शे लेवी ढ्ला ज़ैना इस्राएली लोकन मरां अलग कियोरेन, ते तैना मिलापे बाले तेम्बु कां सेवा केरनेरे लेई तुसां यहोवाए सौंफी छ़डोरेथ। 7 पन वेदरी ते मझ़ाटेरे पड़देरी गल्‍लां केरी सेवारे लेई तू ते तेरां मट्ठां अपने याजक पदेरी हिफाज़त केरथ, ते तुस्से सेवा केरते रेइयथ, किजोकि अवं तुसन याजक पदेरी सेवा दानेरे रूपे मां देताईं, अगर ज़ै तेरे कुलेरो न भोए, अगर तै नेड़े अव त तै मारो गालो।"

8 फिरी यहोवा हारूने सेइं ज़ोवं, "शुन, अवं एप्पु तीं सल्‍लोरी च़ढ़तल सौंफी देताईं, मतलब, इस्राएली लोकां केरी पवित्र कियोरी चीज़ां ज़ेत्री भोन तैन अवं तेरो अभिषेके बालो हिस्सो बनेइतां तीं ते तेरे मट्ठन हमेशारू हक बनेइतां देइलो। 9 ज़ैना परमपवित्र चीज़ां अग्गी मां भस्म न की गान, तैना तेरी भोल्ही, मतलब, इस्राएली लोकां केरी सब च़ढ़तलन मरां तैन केरी सब अन्नबेलि सब पापबेलि, ते सब दोषबलि *ज़ैना तैना मीं देले, तैना तेरे ते तेरे मट्ठां केरे लेई परमपवित्र भोल्ही। 10 तैना परमपवित्र चीज़ां* बुझ़तां खेइयां केरथ; तैन हर अक मड़द खेइ सकते, तैना तेरे लेई पवित्रन। 11 फिरी तैना चीज़ां भी तेरी भोल्ही, मतलब, ज़ेत्री च़ढ़तल इस्राएली लोक हिलानेरे लेई देन, तैन अवं तीं ते तेरे मट्ठन कुइयन हमेशारू हक केरतां देताईं, तेरे घराने मां ज़ेत्रे शुद्ध भोल्हे, तैना तैस खेइ सकतन। 12 फिरी अवं तेरे लेई ज़ैतूनेरो तेल ते नव्वों दाछ़रो रस, ते गेहुं, मतलब, तैन केरी पेइली फसल ज़ै तैना यहोवा जो देन, तै अवं तुसन देताईं। 13 तैन केरे मुल्खेरी हर किसमेरी पेइली फसल, ज़ै तैना यहोवा कां आन्न, तै तेरी भोल्ही, तेरे घरे मां ज़ेत्रे शुद्ध भोल्हे, तैना तैस खेइ सकतन। 14 इस्राएली लोकन मरां ज़ैन किछ भी अर्पण कियूं गालू, तैन भी तेरू भोल्हु। 15 सेब्भी प्रैणन मरां ज़ेत्रे भी एपनी-एपनी अम्मा केरे ज़ेठे बच्‍चे भोल्हे, तैन लोक यहोवारे लेई च़ाढ़न, चाहे मैन्हेरे भोन चाहे जानबरां केरे ज़ेठे बच्‍चे भोन, तैना सब तेरे भोल्हे, पन मैन्हेरे ते अशुद्ध जानबरां केरे ज़ेठे कीमत घिन्तां छ़ेडी देइयां। 16 ते ज़ैना छुटाने भोन, ज़ैखन तैना एक्‍की महीनेरे भोन तैखन तैन केरी कियोरी कीमतरे मुताबिक, मतलब, पवित्र ठारारे 20 गेरा शेकेलेरे हिसाबे सेइं 5 शेकेल *नेइतां तैन छुटेइयां। 17 पन बेछ़ी या भैड या छ़ेलरो ज़ेठो बच्‍चो न शैरां, तैना त पवित्रन, तैन केरो खून वेदी पुड़ छिड़कनो, ते तैन केरी चर्भी बलि केरतां फुकनी, ज़ैस सेइं यहोवारे लेई खुश केरनेबाली खुशबू भोए। 18 पन तैन केरू मास तेरू भोल्हु, ते हिलेवरी छाती, ते देइनी ज़ंघ भी तेरी भोल्ही। 19 पवित्र चीज़ां केरी ज़ेत्री भी च़ढ़तलां इस्राएली लोक यहोवा जो देन, तैन अवं तीं ते तेरे मट्ठन कुइयन हमेशारू हक केरतां देताईं, ते तेरे खानदानेरे लेई यहोवाए हमेशारे लेई लूनेरो अटल करार केरताईं।" 20 फिरी यहोवाए हारूने सेइं ज़ोवं, "इस्राएली लोकां केरे मुल्खे मां तेरो कोई हिस्सो न भोल्हो, ते न तैन मां तेरो कोई अंश भोल्हो, किजोकि तैन मां तेरो हिस्सो ते तेरो अंश अव्वें आईं।

21 "फिरी मिलापे बाले तेम्बेरी ज़ै सेवा लेवी लोक केरतन, तैसेरे बदले मां तैन इस्राएली लोकां केरो दशोवं हिस्सो तैन केरो अपनो खास हिस्सो केरी देताईं। 22 ते अग्रोवं भी इस्राएली लोक मिलापे बाले तेम्बु कां नेड़े न एज्जन, एरू न भोए कि तैन केरे दोग्गे पुड़ पाप लग्गे, ते तैना मेरि गान। 23 पन लेवी लोक मिलापे बाले तेम्बेरी सेवा केरते रान, ते तैन केरे अधर्मेरो भार तैन्ना छ़ूते रान, ऐह तुश्शी पीढ़ी मां हमेशारी विधि भोल्ही; ते इस्राएली लोकन मां तैन केरो कोई खास हिस्सो न भोल्हो। 24 किजोकि इस्राएली लोक ज़ै दशोवं हिस्सो यहोवा जो सल्‍लोरी च़ढ़तल केरतां देले, तैस अवं लेवी लोकां केरो खास हिस्सो केरतां देताईं, एल्हेरेलेइ मीं एन केरे बारे मां ज़ोवरूए, कि इस्राएली लोकन मां तैन कोई खास हिस्सो न मैल्हेलो।"

25 फिरी यहोवा मूसे सेइं ज़ोवं, 26 "तू लेवी लोकन सेइं ज़ो, कि ज़ैखन-ज़ैखन तुस इस्राएली लोकां केरे हथ्थेरां दशोवं हिस्सो नेथ ज़ै यहोवा तुसन तुश्शो खास अपनो हिस्सो केरतां देते, तैखन-तैखन तैस मरां यहोवारे लेई सल्‍लोरी च़ढ़तल केरतां दशोवं हिस्सेरो दशोवं हिस्सो देइयथ। 27 ते ई तुश्शी सल्‍लोरी च़ढ़तल तुश्शे लेई एरी गनी गाली, ज़ेन्च़रे खलाड़ी मां अन्न, या रसकुण्डे मां दाछ़रो रस गनो गाते। 28 एस्से तरीके सेइं तुस भी अपने सब दशोवं हिस्से मरां ज़ै इस्राएली लोकन करां मैल्हेलो, यहोवारे लेई अक सल्‍लोरी च़ढ़तल केरतां देइयथ; ते यहोवारी ऐह सल्‍लोरी च़ढ़तल हारून याजके जो देंते रेइयथ। 29 ज़ेत्रू दान तुसन मैल्हेलू, तैस मरां रोड़े करां रोड़ो हिस्सो, ज़ै पवित्र भोल्हो, तै यहोवारे लेई सल्‍लोरी च़ढ़तल केरतां पूरी-पूरी देइयथ। 30 एल्हेरेलेइ तू लेवी लोकन सेइं ज़ो, कि ज़ैखन तुस तैस मरां रोड़े करां रोड़ो हिस्सो सेल्हतथ, तैखन ऐह तुश्शे लेई खलाड़रू अन्न, ते रसकुण्डेरे रसेरे बराबर गनु गालू। 31 ते तैस तुस अपने टब्बरे समेत सेब्भी ठारन मां खेइ सकतथ, किजोकि मिलापे बाले तेम्बेरी ज़ै सेवा तुस केरेले, तैसेरे बदले मां एन्ने भोल्हु। 32 ते ज़ैखन तुस तैसेरो रोड़े करां रोड़ो हिस्सो छ़ुइतां देथ तैखन तैसेरे वजाई सेइं तुसन पाप न लग्गेलो। पन इस्राएली लोकां केरी पवित्र कियोरी चीज़न अपवित्र न केरथ, एरू न भोए कि तुस मेरि गाथ।"