गिनती 23

बिलामेरी पेइली नबूवत

1 तैखन बिलामे बालाके सेइं ज़ोवं, "इड़ी मेरे लेई सत वेदी बनावा, ते इस ठैरी सत बछ़ड़ां ते सत हुड़ तियार केर।" 2 तैखन बालाके बिलामेरे ज़ोनेरे मुताबिक कियूं; ते बालाके ते बिलामे मिलतां हर एक्‍की वेदी पुड़ अक बछ़ड़ू ते अक हुड़ च़ाढ़ो। 3 फिरी बिलामे बालाके सेइं ज़ोवं, "तू एपनी होमबेलि कां खड़ो रह, ज़ांतगर अवं अलग गाताईं; भोइ सकते यहोवा मीं सेइं मुलाकात केरने एज्जे, ते ज़ैन तै मीं पुड़ बांदू केरेलो, अवं तैन्ने तीं सेइं ज़ोलो" तैखन तै एक्‍की नग्गे पहाड़े पुड़ जेव। 4 तैखन परमेशर बिलामे सेइं मिलो ते बिलामे तैस सेइं ज़ोवं, "मीं सत वेदी तियार कियोरिन, ते हर एक्‍की वेदी पुड़ अक बछ़ड़ू ते अक हुड़ च़ाढ़ोरोए।" 5 तैखन यहोवा बिलामेरे ज़बानी पुड़ अक गल छ़डी, ते ज़ोवं, "बालाके कां वापस गा, ते इस तरीके सेइं ज़ोइयां।" 6 ते तै तैस कां वापस अव, ते कुन हेरू कि तै सारे मोआबी हाकिमन सने एपनी होमबेलि कां खड़ोए। 7 तैखन बिलामे अपनि ई गल शुरू की, ते ज़ोने लगो,

"बालाके अवं अरामेरां,

मतलब मोआबेरे राज़े अवं पूर्वेरे पहाड़न मरां कुजव:

‘एई मेरे लेई याकूबे लानत दे, एई इस्राएले मेरे लेई धमकी दे!’

8 पन ज़ैन लोकन परमेशरे लानत नईं दित्तोरी, अवं तैन केन्च़रे लानत देईं?

ते ज़ैन केरे खलाफ यहोवा नईं ज़ोवरू, अवं तैन केरे खलाफ केन्च़रे ज़ोईं?

9 चट्टानां केरी च़ोटी पुड़ेरां तैना मीं लेइहोतन,

ते पहाड़ां केरी च़ोटन पुड़ेरां अवं तैन हेरताईं;

तै एरी कौमे, ज़ै अकैल्‍ली बस्सोरी राहेली,

ते गैर कौमन करां अलग गनी गाली!

10 याकूबेरी धूड़री सिकन कौन गेनि सकते,

या इस्राएली लोकां केरे च़ेवरोवं हिस्सेरी गिनती कौन केरी सकते?

रोड़ू भोथू, कि अवं भी धेर्मी केरी मौतां मेरि गाथो?

ते मेरो अन्त भी तैन केरो ज़ेरो भोथो!"

11 तैखन बालाके बिलामे सेइं ज़ोवं, "तीं मीं सेइं एन कुन कियूं? मीं त तू अपने दुश्मन पुड़ लानत केरनेरे लेई कुजेवरो थियो, पन तीं त तैन बरकते बरकत दित्तोरीए।" 12 तैनी ज़ोवं, "ज़ैना गल्‍लां यहोवाए मीं शिखैलोरिन, कुन मीं तैना रोड़ेच़ारे ज़ोवरी न लोड़न?"

बिलामेरी दूइयोवं नबूवत

13 तैखन बालाके तैस सेइं ज़ोवं, "मीं सेइं साथी होरी ठारी पुड़ च़ल, ज़ैट्ठां तैना तीं लेइहोले; तू तैन सेब्भन त नन्ना, पन सिर्फ बेइरींए ज़ेरे हेरी सकेलो, तैट्ठां तैन मेरे लेई लानत दे।" 14 तैखन तैनी तै सोपीम नंव्वेरे मैइदाने मां पिसगा नव्वेंरी च़ोटी पुड़ नियो, ते तैड़ी सत वेदी बनेइतां हर एक्‍की वेदी पुड़ अक बछ़ड़ू ते अक हुड़ च़ाढ़ो। 15 तैखन बिलामे बालाके सेइं ज़ोवं, "एपनी होमबेलि कां एड़ी खड़ो रा, ते अवं उड़ी गेइतां यहोवाए सेइं मुलाकात केरीं।" 16 ते यहोवा बिलामे सेइं मुलाकात की, ते तैनी तैसेरी ज़बानी पुड़ अक गल छ़डी, "बालाके कां वापस गा, ते इस तरीके सेइं ज़ोइयां।" 17 ते तै तैस कां वापस जेव, ते कुन हेरते कि मोआबी हाकिमन समेत बालाक एपनी होमबेलि कां खड़ोए। ते बालाके पुछ़ू, "यहोवाए कुन ज़ोवरूए?" 18 तैखन बिलामे अपनो सन्देश शुरू कियो, ते ज़ोने लगो,

"हे बालाक मन लेइतां शुन,

हे सिप्पोरेरे मट्ठा, मेरी गल्‍ली पुड़ कन्न ला:

19 परमेशर मैन्हु नईं कि तै झूठ ज़ोए,

ते न तै मैन्हुए कि तै अपनि मर्ज़ी बदले।

कुन ज़ैन किछ तैनी ज़ोवरूए तैस न केरे?

कुन तै वचन देइतां तैस पूरे न केरे?

20 हेर बरकते देनेरो हुक्म मीं मैल्होरोए,

तैनी बरकत देइ दित्तोरीए, ते अवं तैस बेदली न सेखी।

21 तैनी याकूबे मां कोई बुराई न लाही;

ते न इस्राएले मां अन्याय लाव।

तैसेरो परमेशर यहोवा तैस सेइं साथीए,

ते राज़ेरी ज़ेरी ललकार तैन मां भोतीए।

22 तैना मिस्रे मरां परमेशरे केढतां आनोरेन,

ते तैन मां जंगली दांतेरी ज़ेरी ताकते।

23 सच़्च़े कोई भी मन्ट्ल याकूबे पुड़ न च़ेलि सके,

ते इस्राएलेरे खलाफ कोई दुष्ट बोली न ज़ोई सके;

पन याकूबेरे ते इस्राएलेरे बारे मां एन ज़ोवं गालू,

कि हेरा, परमेशरे केत्रू आजीब कम कियोरूए।

24 शुन, तैन दल शेरनरे बराबर खड़ू भोल्हु,

ते शेरेरो ज़ेरो खड़ो भोल्हो;

तै ज़ांतगर शिकार न खाए, ते मारेरो खून न पीए,

तांतगर वापस न एज्जेलो।"

25 तैखन बालाके बिलामे सेइं ज़ोवं, "तैन न लानत देइयां, ते न बरकत देइयां।" 26 बिलामे बालाके सेइं ज़ोवं, "कुन मीं तीं सेइं नईं ज़ोवरू, कि ज़ैन किछ यहोवा मीं सेइं ज़ोलो, तैन्ने मीं ज़ोनू पेनूए?"

बिलामेरी ट्लेइयोवं नबूवत

27 बालाके बिलामे सेइं ज़ोवं, "च़ल तीं अवं एक्‍की होरी ठारी पुड़ नेताईं, भोइ सकते परमेशरेरी मर्ज़ी भोए त तैट्ठां तैन मेरे लेई लानत दे।" 28 तैखन बालाके बिलाम पोरेरी च़ोटी पुड़ ज़ैट्ठां यशीमोन मुल्ख लेइहोतो थियो, तैड़ी नियो। 29 ते बिलामे बालाके सेइं ज़ोवं, "इड़ी मेरे लेई सत वेदी बनावा, ते इड़ी सत बछ़ड़ां ते सत हुड़ तियार केर।" 30 बिलामेरे ज़ोनेरे मुताबिक बालाके हर एक्‍की वेदी पुड़ अक बछ़ड़ू ते अक-अक हुड़ च़ाढ़ो।