1 फिरी यहोवाए मूसे सेइं ज़ोवं, 2 "इस्राएली लोकन हुक्म दे, कि तैना सब कोढ़ी लोकन ते ज़ेत्रन धात भोए, या लाशी सेइं हुरतां अशुद्ध भोवरे भोन, तैन सेब्भन अपने डेरन मरां केढी देन; 3 एरे ज़ेरे बिमार लोकन चाहे मड़द भोन चाहे कौन्शां भोन, तैन डेरन मरां बेइर केढतां छ़ेडां; कोन्च एरू न भोए कि तुश्शे डेरन मां ज़ैड़ी अवं रहताईं तैन केरे वजाई सेइं अशुद्ध न केरन।" 4 ते इस्राएली लोकेईं एन्च़रे बिमार लोक डेरन मरां बेइर कढे; ज़ेन्च़रे यहोवाए मूसे सेइं ज़ोवरू थियूं।

5 फिरी यहोवाए मूसे सेइं ज़ोवं, 6 "इस्राएली लोकन सेइं ज़ो कि ज़ैखन कोई मड़द या कौन्श एरहो कोई पाप केरतां ज़ै लोक केरते रहतन, यहोवा सेइं धोखो केरन, ते तै मैन्हु दोषी भोल्हो। 7 तैखन तै मैन्हु अपनो कियोरो पाप मन्ने, ते एपनी गेलतरो पूरे मावज़ै मां पंच़ोंव हिस्सो दे, ज़ेसेरो तैनी कसूर कियोरो थियो। 8 अगर तैस मैन्हेरो कोई नेड़ेरो रिश्तेदार न भोए, ज़ैस तैसेरे दोषेरो बदलो दित्तो गाए, त तै बदलो यहोवा जो दे, ते तै हिस्सो ते तै हुड़ याजके दित्तो गाए, ते तै तैस प्रायश्चित बाले हुड़े करां जादे भोए ज़ैस सेइं तैसेरेलेइ प्रायश्चित कियूं गाए। 9 ते ज़ेत्री पवित्र कियोरी चीज़ां इस्राएली लोक च़ढ़तलरे तौरे पुड़ याजके कां आन्न, तैना तैसेरी भोन; 10 सब मैन्हु केरि पवित्र कियोरी चीज़ां याजकेरी भोल्ही; कोई ज़ैन किछ याजके दे तैन तैसेरू भोल्हु।"

11 फिरी यहोवाए मूसे सेइं ज़ोवं, 12 "इस्राएली लोकन सेइं ज़ो, कि अगर कोन्ची मैन्हेरी कौन्श बुरी चाल च़ेलतां तैस सेइं धोखो केरे, 13 ते कोन्ची गैर मड़दे सेइं साथी जिसमानी रिश्तो बनाए, ते इस गल्‍लरो पतो तैसारे मुन्शे न भोए, ते तै अशुद्ध भोइ जेई, पन तैसेरे खलाफ कोई गवाही न भोए ते न तै कौन्श तैस मौके पुड़ ट्लेइयोरी भोए; 14 ते तैसेरे मुन्शेरे दिले मां शक पैदा भोए कि तै एपनी कौन्शी पुड़ जलन केरे कि तै अशुद्ध भोवरीए; पन अगर तै अशुद्ध न भोए भोवरी; 15 त तै मड़द अपनि कौन्श साथी नेइतां याजकेरे सामने पेश केरे, ते तैसेरेलेइ एपारो दशोवं हिस्सो जौआं केरू अट्टू च़ाढ़नेरे लेई आने, पन तैस पुड़ तेल न छ़डे, ते न लोबान रख्खे, किजोकि तै जलन करानेबाली ते याद करानेबाली यानी तै अधर्मेरी याद करानेबाली अन्नबलि भोल्ही।

16 "तैखन याजक तैस कौन्शी नेड़े नेइतां यहोवारे सामने खड़ी केरे; 17 ते याजक मित्तरे भांडे मां पानी आने, ते पवित्र ठारारी धूड़ एन्हतां तैस पैनी मां छ़डे। 18 तैखन याजक तैस कौन्शी यहोवारे सामने खड़ी केरतां तैसारे दोग्गेरे बाल खोल्‍ले, ते याजक याद करानेबाले अन्नबलि ज़ै जलनी बालीए ते तैसारे हथ्थे मां याद केरनेरी अन्नबलि ट्लुवाए। ते याजक एप्पु अपने हथ्थे मां तैन लानत देने बालू ट्लिठू पैनेरू भांड ठेमतां रख्खे। 19 ते तैखन याजक तैस कौन्शी कसम देइतां ज़ोए, कि अगर कोन्ची मड़दे तीं सेइं कोई कुकर्म न कियोरो भोए, या तू अपने मुन्शे छ़ेडतां होरि पत्ती गेइतां अशुद्ध न भोवरी भोस, त इन ट्लिठू पानी ज़ैन लानत देते, तीं नुकसान न पुज़ाए। 20 पन अगर तू अपने मुन्शे छ़ेडतां होरि पत्ती गेइतां अशुद्ध भोवरी भोस, ते अपने मुन्शे छ़ेडतां कोन्ची होरि मड़दे तीं सेइं जिसमानी रिश्तो बनेवरो भोए, 21 (ते याजक तैस लानत देनेबाली कसम देइतां ज़ोए) यहोवा तेरी ज़ंघ शड़ाए, ते तेरू पेट आफरे*, ते लोक तेरू नवं घिन्तां लातन ते फिटकार देन। 22 यानी, तैन पानी ज़ैन लानतरी वजाह भोते, तेरू पेट आफरे, ते तेरी ज़ंघ शड़ाए। तैखन तै कौन्श ज़ोए, आमीन, आमीन।

23 "तैखन याजक लानतरे इना लफज़ एक्‍की किताबी पुड़ लिखतां तैस ट्लिठे पैनी सेइं मटाए। 24 ते तैस कौन्शी तैन ट्लिठू पानी पियाए, ज़ैन लानतरी वजाह भोते, ते तैन पानी लानतरी वजाह भोल्हु ते तैस कौन्शरे पेटे मां गेइतां ट्लिठू भोइ गालू। 25 ते याजक तैस कौन्शरे हथ्थे मां तै जलनी बाली अन्नबलि एन्हतां यहोवा कां हिलेइतां वेदी कां नेड़े आने। 26 ते याजक तैस अन्नबेलि मरां तैसारो याद कराने बालो हिस्सो, यानी अक मुठड़ी भेरतां वेदी पुड़ फुक्‍के, ते तैसेरां बाद कौन्शी तैन पानी पियाए। 27 ते ज़ैखन तै तैन पानी तैस पियाए, तैखन अगर तै अशुद्ध भोवरी भोए, ते अपने मुन्शे सेइं धोखो कियोरो भोए, त तैन पानी ज़ैस सेइं लानत पेचे, तैस कौन्शरे पेटे मां गेइतां ट्लिठू भोइ गालू, ते तैसारू पेट आफरेलू, ते तैसारी ज़ंघ भी शेड़ि गाली, ते तैस कौन्शरू नवं तैसारे लोकन मां लानती भोल्हु। 28 पन अगर तै कौन्श अशुद्ध न भोए भोवरी, ते शुद्धे भोए, त तै बेकसूर राहेली, ते तैस बच्‍चे भी भोइ सकतन।

29 "जलनरे कानून एन्च़रे सेइं आन, कि ज़ैखन कोई कौन्श ड्लाहेरां बाद अपने मुन्शे छ़ेडतां कोन्ची होरि पत्ती गेइतां अशुद्ध भोवरी भोए, 30 या कोई मैन्हु एपनी कौन्शी पुड़ शक केरने सेइं जलन रख्खे त तै मैन्हु* अपने कौन्शी यहोवा कां खड़ी केरे, ते याजक तैस पुड़ इस सारे कानूनेरे मुताबिक केरे। 31 तैखन तैस कौन्शी तैसेरे पापेरी सज़ाह मैल्हेली, पन तैसारो मुन्श तैस पापे करां छुटेलो।"