1 फिरी यहोवाए मूसे सेइं ज़ोवं, 2 "इस्राएली लोकन सेइं ज़ो कि ज़ैखन कोई मड़द या कौन्श यहोवारे लेई नाज़ीर *बेनतां अलग रानेरी खास मिन्नत मन्ने। 3 तैखन तै दाछ़रो रस ते शराबी करां अलग राए, ते तै दाछ़रो रस ते शराबरो सिरको न पीए, बल्के दाछ़रो किछ भी रस न पीए, ते न दाछ़ बल्के न नीली ते न शुकोरी खाए। 4 ज़ेत्रे दिहाड़े तै नाज़ीर अलग राए, तेत्रे दिहाड़न तगर दाछ़ी सेइं पैदा भोनेबाले बीज़े करां लेइतां शेकड़न तगर ज़ैन किछ दाछ़ी सेइं पैदा भोते, तैस मरां किछ न खाए।

5 "फिरी ज़ेत्रे दिहाड़न तगर अलग रानेरी मिन्नत कियोरू भोए, तेत्रे दिहाड़े तै छ़ुरे सेइं अपने दोग्गेरी टिन्ड न बनाए; ते ज़ांतगर तैना दिहाड़े पूरे न भोन, ज़ैन मां तै यहोवारे लेई अलग रेइतां पवित्र राए, ते अपने दोग्गे बेडोने दे। 6 ज़ेत्रे दिहाड़े तै यहोवारे लेई अलग राए, तेत्रे दिहाड़न तगर तै कोन्ची लाशी कां नेड़े न गाए। 7 चाहे तैसेरो बाजी, या अम्मा, या ढ्ला, या बेइन भी की न मरे, फिरी भी तै तैन केरि वजाई सेइं अशुद्ध न भोए, किजोकि अपने परमेशरेरे लेई अलग रानेरो निशान तैसेरे दोग्गे पुड़ भोल्हो। 8 अपने अलग रानेरे सारे दिहाड़न मां तै यहोवारे लेई पवित्र भोल्हो।

9 "अगर कोई तैसेरे सामने अचानक मेरि गाए, ते तैसेरो अलग रानेरो ज़ै निशान तैसेरे दोग्गे पुड़ भोए, त तै अशुद्ध भोल्हो, त तै शुद्ध भोनेरे दिहाड़े, यानी सत्तोवं दिहाड़े तै अपने दोग्गेरी टिन्ड बनावाए। 10 अठोवं दिहाड़े तै दूई घुग्गू, या कबूतरेरे दूई बच्‍चे मिलापे बाले तेम्बु मां याजके कां आने, 11 फिरी याजक एक्‍की पापबलि देनेरे लेई ते होरि होमबलि देनेरे लेई तैस नाज़ीर मन्नोरे मैन्हेरे लेई प्रायश्चित केरे, किजोकि तै लाशी कां राने सेइं पापी भोवरो थियो, ते याजक तैस्से दिहाड़े तैस फिरी पवित्र केरे फिरी तै बाल बडेइ सकते। 12 ते तै फिरी अपने अलग रानेरे दिहाड़न फिरी यहोवारे लेई अलग केरे, ते एक्‍की सालेरू गबड़ू दोषबलि केरनेरे लेई आने, ते ज़ैना दिहाड़े पेइले बीतोरेन, तैना गन्ने मां न एज्जेले, किजोकि तैसेरो अलग रानेरो निशान अशुद्ध भोवरो थियो।

13 "फिरी ज़ैखन नाज़ीर मैन्हेरे अलग रानेरे दिहाड़े पूरे भोन, तैस मौकेरे लेई तैसेरो एहे कानूने, यानी मिलापे बाले तेम्बु कां एन्हतां तैसेरे दारे मां आने। 14 फिरी तै यहोवारे लेई होमबलि केरतां एक्‍की सालेरू अक बगैर नुक्से गबड़ू पापबेलरे लेई, ते एक्‍की सालेरी अक बगैर नुक्से गबड़ी, ते मेलबलि देनेरे लेई अक हुड़, 15 ते अखमीरी रोट्टी केरि अक टोकरी, यानी तेले सेइं सन्नोरे अट्टेरे फुलके, ते तेले सेइं च़ोपड़ोरे अखमीरी दूनोई, ते तै तैन बेलि केरि अन्नबलि ते पीनेरे च़ढ़तलरे सब चढ़ावे नेड़े आने। 16 एन सब किछ एन्हतां याजक यहोवारे सामने पुज़ेइतां तैसेरी पापबलि ते होमबलि च़ाढ़े। 17 ते अखमीरी रोट्टी केरि टोकरी समेत हुड़े यहोवारे लेई मेलबलि केरतां, ते तैस मेलबेलरी अन्नबलि ते पीनेरी च़ढ़तल भी च़ाढ़े। 18 तैखन नाज़ीर अपने अलग रानेरे निशाने बाले दोग्गे मिलापे बाले तेम्बु कां एइतां दारे मां कट्टाए, ते अपने दोग्गेरे बालन अग्गी मां छ़डे, ज़ै मेलबलि करां बुन भोनीए। 19 फिरी ज़ैखन नाज़ीर अपने अलग रानेरे निशाने बाले दोग्गे कट्टेइ छ़डे, तैखन याजक हुड़ेरी एग्री बनेवरी चावड़ी, ते खमीरी रोट्टी केरि टोकरी मरां अक अखमीरी रोट्टी, ते अक अखमीरी दूनोई नाज़ीरेरे हथ्थन मां दे, 20 ते याजक इन हिलानेरे च़ढ़तलरे लेई यहोवारे सामने हिलाए, हिलेवरी छाती ते सलहोरी ज़ंघ इना भी याजकेरे लेई पवित्र ठहरन, इसेरां बाद नाज़ीर दाछ़रो रस पी सकते।

21 "नाज़ीरेरी मिन्नतरी, ते ज़ै च़ढ़तल तैनी अपने अलग भोनेरे वजाई सेइं यहोवारे लेई च़ाढ़नी भोल्ही तैसेरो ईए कानूने। ज़ै च़ढ़तल तै अपने पूँजरे मुताबिक च़ैढ़ी सके, तैस करां जादे ज़ेरि मिन्नत मन्नोरी भोए, तेन्च़रे अपने अलग रानेरे कानूनेरे मुताबिक तैनी केरनू भोल्हु।"

22 फिरी यहोवाए मूसे सेइं ज़ोवं, 23 "हारून ते तैसेरे मट्ठन सेइं एन ज़ो, कि तुस इस्राएली लोकन इन वचन्न सेइं आशिर्वाद देइयां केरथ।

24 यहोवा तीं आशिर्वाद दे, ते तेरी हिफाज़त केरे;

25 यहोवा तीं पुड़ अपने तुत्तरेरी लौ चमकाए*,

ते तीं पुड़ अनुग्रह केरे।

26 यहोवा अपनु तुत्तर तेरे पासे फिराए, ते तीं शान्ति दे।

27 "एन्च़रे सेइं तैना मेरू नवं इस्राएली लोकन मां रखन, ते अवं तैन बरकत देंतो रालो।"