1 फिरी यहोवाए मूसे सेइं ज़ोवं, 2 "इस्राएली लोकन सेइं इन ज़ो कि ज़ैखन तुस अपने रानेरे मुल्खे मां पुज़ेले ज़ै अवं तुसन देताईं, 3 ते यहोवारे लेई कुन होमबलि कुन मेलबलि ते कोई हबन च़ाढ़थ, चाहे तै कोई खास मिन्नत पूरी केरनेरी भोए चाहे अपने मेर्ज़री बलि भोए, चाहे तुश्शे ठहरावरे वक्तां केरि भोए, चाहे तुश्शे बेछ़ी-दांतां चाहे भैड्डां-छ़ेल्‍ली केरि भोए, ज़ैस सेइं यहोवारे लेई खुश केरनेबाली खुशबू भोए; 4 तैखन तैस होमबलि या मेलबलि सेइं साथी गबड़ू यहोवारे लेई च़ेवरोवं हीन तेले सेइं सन्नोरो एपारो दशोवं हिस्सो मैदो अन्नबलि केरतां च़ाढ़नो, 5 ते च़ेवरोवं हीन दाछ़रो रस पीनेरी च़ढ़तल केरतां देनो। 6 ते हुड़ेरी बेलि सेइं साथी ट्लेइयोवं हीन तेले सेइं सन्नोरो एपारो दूई दशोवं हिस्सो मैदो अन्नबलि केरतां च़ाढ़नो; 7 ते तैसेरी पीनेरी च़ढ़तल यहोवारे लेई खुश केरनेबाली खुशबू ते ट्लेइयोवं हीन दाछ़रो रस देनो। 8 ते ज़ैखन तू यहोवारे लेई होमबलि या खास कोई मिन्नत पूरी केरनेरे लेई बलि या मेलबलि देनेरे लेई बछ़ड़ू च़ाढ़स, 9 तैखन बछ़ड़ेरो च़ाढ़ने बालो, तैस सेइं साथी अध्धो हीन तेले सेइं सन्नोरो एपारो ट्लाई दशोवं अंश मैदो अन्नबलि केरतां च़ाढ़े। 10 ते तैसेरी पीनेरी च़ढ़तल अध्धो हीन दाछ़रो रस च़ाढ़नो, तैन यहोवारे लेई खुश केरनेबालू हबन भोल्हु।

11 "अक-अक बछ़ड़ू या हुड़ या गबड़ू या छ़ेड़े सेइं साथी च़ढ़तल च़ाढ़ी गाए। 12 तुश्शे बलि देनेरे जानबरां केरि ज़ेत्री गिनती भोए, त एस गिनतरे मुताबिक एक्‍की-एक्‍की सेइं साथी एन्च़रे सेइं केरनू। 13 हर कोई ज़ै इस मुल्खेरो भोए यहोवारे लेई खुश केरनेबालू हबन च़ाढ़नेरे मौके एस्से तरीके सेइं केरते रान।

14 "अगर कोई एजने बाले पीढ़ी मां परदेशी या होरो कोई ज़ै तुसन सेइं साथी रहतो भोए, ते तै यहोवारे लेई खुशबू देनेबाले हबन च़ाढ़नू चाहे, त ज़ेन्च़रे सेइं तुसां केरेले, तै भी तेन्च़रे केरे। 15 मेण्डली मां तुश्शे लेई, तुसन सेइं साथी रानेबाले परदेशी दूईयां केरे लेई, अक्‍के नियम भोल्हो, तुश्शी पीढ़ी-पीढ़ी मां हमेशारे लेई एहे नियम भोल्हो, कि ज़ेन्च़रे सेइं तुस भोथ, तेन्च़रे सेइं परदेशी भी यहोवारे लेई भोल्हे। 16 तुश्शे ते तुसन सेइं साथी रानेबाले परदेशी केरे लेई अक्‍के कानून ते अक्‍के नियम भोल्हो।" 17 फिरी यहोवाए मूसे सेइं ज़ोवं, 18 "इस्राएली लोकन मेरू इन वचन शुना, कि ज़ैखन तुस तैस मुल्खे मां पुज़थ, ज़ैस मुल्खे मां अवं तुसन नेताईं, 19 ते तैस मुल्खेरी पैदावारारू अन्न खाथ, तैखन यहोवारे लेई सल्‍लोरी च़ढ़तल च़ैढ़ां केरथ। 20 अपने पेइले सन्नोरे अट्टे करां अक दूनोई सल्‍लोरी च़ढ़तली मरां यहोवारे लेई च़ैढ़थ; ज़ेन्च़रे तुस खलाड़ी मरां सल्‍लोरी च़ढ़तल च़ाढ़ेले तेन्च़रे तैस भी उठेइयां केरथ। 21 अपनि पीढ़ी-पीढ़ी तगर अपने पेइले सन्नोरे अट्टे मरां यहोवारे लेई च़ढ़तल च़ाढ़ते रेइयथ।

22 "फिरी एन सेब्भी हुक्मन पुड़ ज़ैना यहोवा परमेशरे मूसे दित्तोरेन, कोई भी टेपलोइतां ट्लोड़ेलो, 23 मतलब ज़ैस दिहाड़ेरां देंतो यहोवा हुक्म देने लगो, ते अग्रोवं जो तुश्शी पीढ़ी-पीढ़ी मां तैस दिहाड़रे देंते ज़ेत्रे हुक्म मूसेरे ज़िरिये दित्तोरेन, 24 तैस मां अगर टेपलोइतां कियोरो पाप लोकां केरे अनज़ाने मां भोवरो भोए, त सारी मण्डली यहोवारे लेई खुश केरनेबाली खुशबू देनेबाली होमबलि केरतां अक बछ़ड़ू ते तैस सेइं साथी कानूनेरे मुताबिक पीनेरी च़ढ़तल च़ैढ़थ, ते पापबेलरे लेई अक थाव्वो च़ाढ़नो। 25 तैखन याजक सारे इस्राएली लोकां केरे मेण्डलरे लेई प्रायश्चित केरे, ते तैन माफ़ी मैल्हेली, किजोकि तैन करां पाप टेपलोइतां भोवरोए, ते तैन अपने टेपलोनेरे लेई अपनि च़ढ़तल, मतलब यहोवारे लेई हबन ते अपनि पापबलि तैसेरे सामने च़ाढ़नी। 26 एल्हेरेलेइ सारे इस्राएली लोकां केरे मेण्डलरो, ते तैस मां रानेबाले परदेशी केरो भी तै पाप माफ़ कियो गालो, किजोकि तै सब लोकां केरे अनज़ाने मां भोवरोए। 27 फिरी अगर कोई मैन्हु टेपलोइतां पाप केरे त तै एक्‍की सालेरी अक छ़ल्‍ली पापबलि केरतां च़ाढ़े। 28 ते याजक टेपलोइतां पाप केरनेबाले मैन्हेरे लेई यहोवारे सामने प्रायश्चित केरे, इस प्रायश्चितेरे वजाई सेइं तैसेरो पाप माफ़ कियो गालो। 29 ज़ै कोई टेपलोइतां कोई पाप केरे, चाहे तै इस्राएली लोकन मां देशी भोए, चाहे तुसन मां परदेशी बेनतां रहतो भोए, सेब्भी केरे लेई अक्‍के कानून भोल्हो।

30 "पन कुन देशी कुन परदेशी, ज़ै मैन्हु ज़िद्दी सेइं किछ केरे, तै यहोवारो निन्दा केरनेबालो भोल्हो, ते तै मैन्हु अपने लोकन मरां नाश कियो गालो। 31 तै ज़ै यहोवारो वचन घटिया समझ़ते, ते तैसेरो हुक्म मन्ने बालो नईं, एल्हेरेलेइ तै मैन्हु ज़रूर नाश कियो गालो ते तैस अपने पापेरी सज़ाह मैल्हेली।"

32 ज़ैखन इस्राएली लोक सुनसान ठैरी मां रहते थिये, तैन दिहाड़न मां अक मैन्हु थैकरे दिहाड़े कैड़ु घेरतो मैल्हो। 33 ते ज़ैन तै कैड़ु घेरतो मैल्हो, तैनेईं तै मूसे ते हारून, ते सारे मेण्डली कां नियो। 34 तैनेईं तै पाबंद केरतां रख्खो, किजोकि एरे ज़ेरे मैन्हु सेइं कुन लोड़ते कियोरू तैन बांदू न थियूं कियोरू। 35 तैखन यहोवाए मूसे सेइं ज़ोवं, "तै मैन्हु ज़रूर मारो गाए, सारे लोक डेरन करां बेइर तैस जो घोड़ेईं देन।" 36 इस तरीके सेइं ज़ेन्च़रे यहोवाए मूसे हुक्म दित्तोरो थियो, तैसेरे मुताबिक सारे मेण्डलरे लोकेईं तै डेरन करां बेइर नेइतां तैस जो घोड़ेईं दित्ती, ते तै मेरि जेव।

37 फिरी यहोवाए मूसे सेइं ज़ोवं, 38 "इस्राएली लोकन सेइं ई गल ज़ो, कि अपने पीढ़ी-पीढ़ी मां अपने लिगड़ां केरे कूने पुड़ झालर लेइतां रखनी, ते एक्‍की-एक्‍की कूनेरी झालरी पुड़ अक नीलो फीतो लेइतां रखनो; 39 ते तै तुश्शे लेई एरी झालर भोए, ज़ैस सेइं ज़ैखन-ज़ैखन तुस तकथ, तैखन-तैखन तुसन यहोवारे सारे हुक्म याद एज्जन, ते तैन तुस मन्नथ, ते तुस अपने-अपने मने मां ते अपनो आप कैबू मां रेखतां व्यभिचार न केरथ, ज़ेन्च़रे अज़ तगर केरते एवरेथ। 40 पन तुस यहोवारे सारे हुक्म याद केरतां तैन मन्ते रेइयथ, ते अपने परमेशरेरे लेई पवित्र बना। 41 अवं यहोवा तुश्शो परमेशर आईं, ज़ैनी तुस मिस्र मुल्खे मरां केढतां आनोरेथ, कि तुश्शो परमेशर भोईं, अवं तुश्शो परमेशर यहोवा आईं।"