1 तैखन सारे लोक चिन्डां लगे मारने, ते सैरी राती तैना लोक लेरां देंते राए। 2 ते सब इस्राएली लोक मूसे ते हारूनेरे खलाफ शिकायत केरने लगे; ते सारी मण्डली तैस सेइं इन ज़ोने लगी, "रोड़ू भोथू कि अस मिस्र मुल्खे मां मुओरे भोथे! या इस सुनसान ठैरी मां मेरि गाथे! 3 यहोवा असन तैस मुल्खे मां नेइतां किजो तलवारी सेइं माराने चाते? इश्शी कौन्शां ते बच्‍चे तैन केरि लुटी मां च़ले गानेन; कुन इश्शे लेई रोड़ू नईं कि अस मिस्र मुल्खे जो वापस गाम?" 4 फिरी तैना एप्पु मांमेइं ज़ोने लगे, "एज्जा अस कोन्ची अपनो प्रधान बनाम, कि अस मिस्रे मुल्खे जो वापस गेई सकम।" 5 तैखन मूसो ते हारून सारे इस्राएली लोकां केरे मेण्डलरे सामने तुत्तरेरे भारे झुके, 6 ते नूनेरू मट्ठू यहोशू ते यपुन्नेरू मट्ठू कालेब, ज़ैना मुल्खेरो भेद घिन्ने बालन मरां थिये, दुखे सेइं तैनेईं अपना-अपना लिगड़ां छ़िन्दतां, 7 सारे इस्राएली लोकां केरि मेण्डली सेइं ज़ोने लगे, "ज़ैस मुल्खेरो भेद घिन्नेरे लेई असां इरां-उरां घुमतां एवरेम, तै मुल्ख बड़ो रोड़ो मुल्खे। 8 अगर यहोवा असन पुड़ खुश भोल्हो त तैस मुल्खे मां ज़ैस मां दुद्ध ते मैछ़ेरी गड्डां बेगचन पुज़ेइतां तै मुल्ख असन देलो। 9 सिर्फ एत्रू केरा कि यहोवारे खलाफ बगावत न केरा; ते न तैस मुल्खेरे लोकन करां डरा, किजोकि तैन अस खतम केरि सकतम, तैन पुड़ेरां हिफाज़तरी छाव त हेटी जेवरीए, ते यहोवा असन सेइं साथीए, ते तैन करां न डरा।" 10 तैखन मेण्डलरे लोक चिन्डां मैरतां एन लगे ज़ोने, कि एन जो घोड़ेईं बाथ, तैखन यहोवा परमेशरेरी महिमा मिलापे बाले तेम्बु मरां इस्राएली लोकन पुड़ महिमा बांदी भोइ।

11 तैखन यहोवाए मूसे सेइं ज़ोवं, "एना लोक केइस तगर मेरी निन्दा केरते राले, ते मेरे चमत्कार हेरतां भी केइस तगर भी विश्वास न केरेले? 12 अवं तैन महामैरी सेइं मारेलो, ते तैन केरे अपने हिस्से मरां भी तैन केढतां छ़डेलो, पन तीं मरां अक महान कौम पैदा केरेलो, ज़ै तैन करां बड़ी ते ताकतबर भोल्ही।" 13 मूसे यहोवा सेइं ज़ोवं, "तैखन त मिस्री ज़ैन मां तीं अपनि शक्ति हिरेइतां तैना लोक केढतां आनोरेन, एन शुनेले, 14 ते इस मुल्खेरे लोकन सेइं ज़ोले, तैनेईं त एन शुनेरूए कि तू ज़ै यहोवा एन लोकन मां रहतस ते सामने लेइहोतस, ते तेरी बिदलार तैन पुड़ टिकोरी रहचे, ते तू दीसां बिदलारारे खम्भे मरां ते राती अग्गरे खम्भे मरां भोइतां इन केरे अग्री-अग्री च़लतस। 15 एल्हेरेलेइ अगर तू एन लोकन एक्‍की बार मैरी छ़डस, ते ज़ैन कौमेईं तेरी मुशूरी शुनोरीए तैना ज़ोली, 16 कि यहोवा तैन लोकन तैस मुल्खे मां पुज़ेई न बटो, ज़ैस देनेरी तैनी कसम खेवरी थी, एस वजाई सेइं तैनी तैना सुनसान ठैरी मां मैरी छ़डोरेन। 17 एल्हेरेलेइ हुनी प्रभुएरी शेक्तरे महिमा तेरे ज़ोनेरे मुताबिक भोल्ही। 18 कि यहोवा क्रोध केरने मां च़िर लानेबालो ते बड़ो दया केरनेबालोए, ते अधर्म ते पाप माफ़ केरनेबालोए, पन तै पापी कोन्ची भी तरीके सेइं बेकसूर न बनालो, ते सियाना केरे पापां केरि सज़ाह तैन केरे मट्ठन, ते तैन केरे पोट्लड़न, ते पड़पोट्लड़न देतस। 19 हुनी इन लोकां केरे पाप अपने बेड़ि दयारे मुताबिक, ते ज़ेन्च़रे तू मिस्र मुल्खेरां लेइतां इड़ी तगर माफ़ केरतो एवरोस, तेन्च़रे तू हुन्ना भी माफ़ केर।"

20 यहोवाए ज़ोवं, "तेरी बिनतरे मुताबिक अवं माफ़ केरताईं; 21 पन मेरी ज़िन्दगरी कसमे कि सच़्च़े सारी धरती यहोवारी महिमाई सेइं भेरोई गाली; 22 तैन सब लोकेईं ज़ैनेईं मेरी महिमा मिस्र मुल्खे मां ते जंगले मां लाहोरीए, ते मेरे कियोरे चमत्कारेरां कम्मां लेइतां भी दशे फेरेईं* मेरी अज़मैइश की, ते मेरी गल्‍लां न मेन्नी, 23 एल्हेरेलेइ ज़ैस मुल्खेरे बारे मां मीं तैन केरे सियानन सेइं कसम खेवरी थी, तैना तैस कधी भी न लाहेले; बल्के ज़ेत्रेइं मेरी निन्दा कियोरीए, तैन मरां कोई भी लेही न बटेलो। 24 पन एस वजाई सेइं कि मेरे दास कालेबे मां होरि आत्माए, ते तैनी पूरे तरीके सेइं मेरे हुक्मे पुड़ अमल कियोरूए, अवं तैस, तैस मुल्खे मां ज़ैस मरां तै भोइतां एवरोए पुज़ेइलो, ते तैसेरू खानदान तैस मुल्खेरू मालिक भोल्हु। 25 अमालेकी ते कनानी लोक वैदी मां रहतन, एल्हेरेलेइ कालां तुसां घुमतां च़ला, ते लाल समुन्दरेरां बत्तां जंगले मांजो गाथ।"

26 फिरी यहोवाए मूसे ते हारूने सेइं ज़ोवं, 27 "ऐह बुरी मण्डली मीं पुड़ बुड़बुड़ाती रहतीए, एस अवं केइस तगर बरदाशत केरतो रालो? इस्राएली ज़ैना मेरे खलाफ बुड़बुड़ातन, एन मीं शुनेरूए। 28 एल्हेरेलेइ तैन सेइं ज़ो, कि यहोवाए एन ज़ोवरूए, कि मीं मेरी ज़िन्दगरी कसमे कि ज़ैना गल्‍लां तुसेईं मेरे शुनते ज़ोवरिन पक्‍को अवं तैसेरे मुताबिक तुसन सेइं बर्ताव केरेलो। 29 तुसन सेब्भन मरां ज़ैना 20 साल या तैस करां जादे उमरारे ज़ेत्रे गनोरे थिये ज़ैना मेरे खलाफ बुड़बड़ाते थिये तैन केरि लाशां एस जंगले मां राहेली। 30 तैन मरां यपुन्नेरू मट्ठू कालेब ते नूनेरू मट्ठू यहोशूएरे अलावा होरो कोई तैस मुल्खे मां न गेइ बटेलो, ज़ेसेरे बारे मां मीं वाधो कियोरोए, कि तुसन तैस मां बसेइलो। 31 पन तुश्शे बाल बच्‍चे ज़ैन केरे बारे मां तुसेईं ज़ोवरू थियूं, कि तैना लुटी मां च़ले गाले, तैन अवं तैस मुल्खे मां पुज़ेइलो, ते तैना तैस मुल्खे ज़ानेले, ज़ै तुसेईं घटिया समझ़ोरोए। 32 पन तुश्शी लाशां एस्से जंगले मां राहेली। 33 ते ज़ांतगर तुश्शी लाशां जंगले मां शड़न तांतगर, मतलब 40 साल तुश्शे बाल बच्‍चे जंगले मां तुश्शे बदमैशरो फल भोगते ते भटकते राले। 34 ज़ेत्रे दिहाड़े तुस तैस मुल्खेरो भेद घिन्ते राए, मतलब 40 दिहाड़े तैन केरि गिनतरे मुताबिक एक्‍की दिहाड़ेरे बदले अक साल मतलब 40 सालन तगर तुस अपने अधर्मेरी सज़ाह भुगतेले, तैखन तुसन पतो लग्गेलो कि मेरी बगावत केरनि केरि भोचे। 35 मीं यहोवाए एन ज़ोई छ़डोरूए, कि एना बुरे लोक ज़ैना मेरे खलाफ अकोट्ठे भेवरेन, एस्से जंगले मां मेरि मिटी गाले, ते इस मां कोई शक नईं अवं एरू केरेलो।"

36 तैखन ज़ैना मड़द मूसे तैस मुल्खेरो भेद घिन्नेरे लेई भेज़ोरे थिये, तैनेईं वापस एइतां तैस मुल्खेरी निन्दा केरतां सारे लोक बुड़बुड़ानेरे लेई उकसावरे थिये, 37 तैस मुल्खेरी निन्दा केरनेबाले मड़द यहोवारे मारने सेइं तैसेरे सामने मेरि जे। 38 पन तैस मुल्खेरो भेद घिन्ने बाले मड़दन मरां नूनेरू मट्ठू यहोशू ते यपुन्नेरू मट्ठू कालेब दूईये ज़ींते राए।

39 तैखन मूसे एना सैरी गल्‍लां इस्राएली लोकन शुनेई छ़ेडी ते तैना बड़ो मातम केरने लगे। 40 ते तैना झ़ेझ़ां उठतां एन ज़ोइतां पहाड़ेरी च़ोटी पुड़ जो च़ढ़ने लगे, "असेईं ज़रूर पाप कियोरोए, पन हुनी असां तियारम, ते तैस ठैरी जो गामेले, ज़ेसेरे बारे मां यहोवाए वाधो कियोरो थियो।" 41 तैखन मूसे ज़ोवं, "तुस यहोवारे हुक्मे किजो ट्लोड़तथ? एन कामयाब न भोल्हु। 42 यहोवा हुनी तुसन सेइं साथी नईं, एल्हेरेलेइ न च़ढ़ा, नईं त दुश्मन्न करां हार खाएले। 43 तैड़ी तुश्शे अग्गर अमालेकी ते कनानी लोकन, एल्हेरेलेइ तुस तलवारी सेइं मारे गाले, तुस यहोवाए शैरतां मुड़ी जेवरेथ, एल्हेरेलेइ तै तुसन सेइं साथी न रालो।" 44 पन तैना ज़िद केरतां पहाड़ेरी च़ोटी पुड़ च़ैढ़ी जे, पन यहोवारे करारेरो सन्दूख ते मूसो डेरन मरां न निस्से। 45 तैखन अमालेकी ते कनानी ज़ैना तैस पहाड़े पुड़ रहते थिये, तैनेईं तैन पुड़ चढ़ाई की ते होर्मा तगर मारते च़ले आए।